Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Jésus: Lege ni, tâ tënë na fini

 CHAPITRE 69

Babâ ti ala ayeke Abraham wala Zabolo?

Babâ ti ala ayeke Abraham wala Zabolo?

JEAN 8:37-59

  • A-JUIF ATENE BABÂ TI ALA AYEKE ABRAHAM

  • KOZO TI TENE A DÜ ABRAHAM, JÉSUS AYEKE TI LO DÄ AWE

Na ngoi so lo ngbâ na Jérusalem ndali ti Matanga ti aTabernacle (wala akpangba), Jésus akiri afa ambeni tâ tënë so alingbi ti sö fini ti azo. Me, ambeni Juif so ayeke nga na ngoi ti matanga ni so alondo ti tene na lo atene: “E yeke ahale ti Abraham, mbeni zo agbu e na ngbâa lâ oko ape.” Jésus akiri tënë atene: “Mbi hinga so ala yeke ahale ti Abraham, me ala yeke gi lege ti fâ mbi ngbanga ti so tënë ti mbi amaï na yâ ti bê ti ala ape. Aye so mbi bâ ni na mbage ti Babâ ti mbi, mbi sara tënë ni. Me ti ala, ala sara aye so ala mä na mbage ti babâ ti ala.”—Jean 8:33, 37, 38.

Tënë ti Jésus ayeke polele: Babâ ti lo ayeke nde na babâ ti ala. Me, teti so ala mä yâ ti tënë ti Jésus ni tongaso ape, aJuif ni akiri atene: “Babâ ti e ayeke Abraham.” (Jean 8:39; Ésaïe 41:8). A yeke tâ tënë so ala yeke ahale ti Abraham. Tongaso, ala pensé ti ala atene ala yeke na oko mabe ti Abraham, so ayeke lani kamarade ti Nzapa.

Me, Jésus atene mbeni tënë so apeut ti son bê ti ala, lo tene: “Tongana ala yeke amolenge ti Abraham, ka ala sara aye so Abraham asara.” Tâ tënë, molenge ayeke sara ka gi ye tongana ti babâ ti lo. Jésus akiri atene: “Me fadeso ala yeke gi lege ti fâ mbi, mbi so mbi yeke tene na ala tâ tënë so mbi mä na mbage ti Nzapa. Abraham asara lani tongaso ape.” Na pekoni, Jésus atene mbeni tënë so ala gi li ti ala na ni gbä, lo tene: “Ala yeke sara aye so babâ ti ala asara.”—Jean 8:39-41.

Ade aJuif ni ahinga nga zo so Jésus angbâ ti sara tënë ti lo so ape. Ala tene so ala yeke amolenge so a dü ala na gigi ape. Ala tene: “A dü e na lege ti lango-sioni ape. Babâ ti e ayeke gi oko, Nzapa.” Me, Nzapa la ayeke biani Babâ ti ala? Jésus atene: “Tongana Nzapa ayeke fade Babâ ti ala, ka ala ndoye mbi, ndali ti so mbi londo na Nzapa la si mbi ga na ndo so. Mbi ga ti bê ti mbi ape, me a yeke Lo la si lo tokua mbi.” Jésus angbâ ahunda mbeni tënë so gi lo wani la lo kiri tënë na ni. Lo tene: “Ngbanga ti nyen ala hinga ye so mbi yeke sara tënë ni so ape? A yeke ngbanga ti so ala lingbi ti mä tënë ti mbi ape.”—Jean 8:41-43.

Jésus atara ti fa na ala aye so ayeke si tongana ala ke lo. Me fadeso lo tene vîi na ala, lo tene: “Ala yeke ti babâ ti ala Zabolo, na ala ye ti sara aye so bê ti babâ ti ala aye.” Sarango ye ti babâ ti ala ni ayeke tongana nyen? Jésus afa ni polele: “Na ngoi so lo to nda ni, lo yeke zo ti fango zo, lo ngbâ na yâ ti tâ tënë pëpe.” Jésus akiri atene: “Zo so ayeke ti Nzapa amä atënë ti Nzapa. Ndani la ala mä tënë ape, ngbanga ti so ala yeke ti Nzapa ape.”—Jean 8:44, 47.

Tënë ti Jésus so agbi tâ yâ ti bê ti aJuif ni, ni la ala tene na lo atene: “So e tene: Mo yeke zo ti Samarie nga sioni yingo ayeke na yâ ti mo so, mvene la?” Na iringo Jésus “zo ti Samarie”, ala ye ti fa so lo yeke nga ye oko ape. Me, Jésus asara sanka ti tënë ni, na lo kiri tënë na ala, lo tene: “Sioni yingo ayeke na yâ ti mbi ape, me mbi yeke ne Babâ ti mbi, me ala, ala ne mbi ape.” Jésus angbâ atene mbeni kota tënë na yâ ti mbeni zendo so lo mû, lo tene: “Zo so asara ye alingbi na tënë ti mbi, lo yeke kui lâ oko ape.” Jésus aye pëpe ti tene so abazengele nga na adisciple ti lo ayeke kui ande lâ oko ape. Me, lo ye ti tene so ala yeke hinga pëpe “kuâ ti use ni,” so ayeke mbeni kuâ so beku ti londongo ni ayeke dä ape.—Jean 8:48-51; Apocalypse 21:8.

Me, aJuif ni amä ti ala yâ ti tënë ni tongaso ape. Ala tene: “Fadeso e hinga awe so sioni yingo ayeke na yâ ti mo. Abraham akui, aprophète nga akui, me mo, mo tene: ‘Zo so asara ye alingbi na tënë ti mbi, lo yeke kui lâ oko ape.’ Mo yeke kota ahon babâ ti e Abraham so akui so? . . . Mo ye ti tene mo yeke ti mo zo wa?”—Jean 8:52, 53.

A yeke polele so Jésus angbâ ti fa na ala so lo la lo yeke Messie ni. Me, ahon ti tene gi ni tongaso droit na ala, Jésus atene: “Tongana mbi mû gloire na mbi wani, gloire ti mbi ni ayeke senge senge. Babâ ti mbi la ayeke mû gloire na mbi, lo so ala tene lo yeke Nzapa ti ala so. Ye oko, ala hinga lo ape. Me mbi, mbi hinga lo. Tongana mbi tene mbi hinga lo ape, mbi yeke ga zo ti mvene tongana ala.”—Jean 8:54, 55.

Jésus angbâ amû na ala tapande ti kotara ti ala so ayeke lani be-ta-zo na Nzapa, lo tene: “Tere ti babâ ti ala Abraham anzere lani mingi ngbanga ti so lo ku ti bâ lâ ti mbi. Lo bâ ni na tere ti lo anzere.” Biani, ndali ti so lo mä na bê na zendo so Nzapa amû na lo, Abraham ayeke ku lani gango ti Messie ni. Me, aJuif adë kite na tënë ti Jésus ni, ala tene: “Mo so ade mo wara ngu 50 ape so, mo bâ Abraham?” Jésus atene: “Ti tâ tënë ni, mbi tene na ala: Kozo si Abraham abâ gigi, mbi yeke lani dä.” Jésus ayeke sara tënë ti ngoi so lo yeke lani na fini tongana mbeni ngangu ange na yayu.—Jean 8:56-58.

Tâ gi na mango so Jésus atene ni bâ gigi kozo na Abraham, ngonzo agbu aJuif ni ngangu na ala ye ti bo lo. Me, Jésus akpe zê.

TI HINGA AMBENI TËNË

Abraham—“babâ ti ala kue so ayeke na mabe”

Tongana nyen la Abraham afa so lo yeke na mabe? Na alege wa e lingbi ti mû tapande ti mabe ti Abraham?