Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Jésus: Lege ni, tâ tënë na fini

 CHAPITRE 72

Jésus atokua adisciple ti lo 70 ti gue ti fa tënë

Jésus atokua adisciple ti lo 70 ti gue ti fa tënë

LUC 10:1-24

  • JÉSUS ASORO ADISCIPLE 70 NA LO TOKUA ALA TI GUE TI FA TËNË

A yeke na hunzingo ti ngu 32 ti ngoi ti e la, so ti tene ngu ota na peko ti so Jésus awara batême. Ade ti ninga ape, Jésus na abazengele ti lo ague na Jérusalem ndali ti Matanga ti aTabernacle. Na pekoni, âmanke ala ngbâ na mbeni kodro so ayeke nduru na Jérusalem ni (Luc 10:38; Jean 11:1). Teti so a ngbâ na Jésus nze omene ti tene lo kui, lo mû tanga ti anze ni kue ti fa tënë na Judée wala na tere ti Ngu ti Jourdain na sese ti Pérée. A lingbi a fa nga tënë na yâ ti akodro ni so nga.

Lani, kete na peko ti matanga ti Pâque ti ngu 30, Jésus afa tënë teti anze mingi na Judée na hongo na yâ ti Samarie. Me, na ngoi ti matanga ti Pâque ti ngu 31, aJuif so ayeke na Jérusalem agi lani lege ti fâ lo. Na pekoni, teti ngu oko na ndambo, lo fa tënë mingi na mbage ti nord, na Galilée. Na ngoi ni so, gbâ ti azo aga adisciple ti lo. Na Galilée, lo leke lani abazengele ti lo, na pekoni lo tokua ala ti gue ti fa tënë, lo tene: “Ala fa tënë, ala tene: ‘Royaume ti yayu aga nduru awe.’” (Matthieu 10:5-7). Ti fadeso, Jésus ayeke leke mbeni kapa ti fango tënë na yâ ti Judée.

Ti sara kapa ti fango tënë so, Jésus asoro adisciple ti lo 70 na lo tokua ala use use. Tongaso, azo na yâ ti agroupe 35 la ayeke fa tënë ti Royaume na yâ ti kodro ni kue, so “akobe ti yaka ni ayeke mingi, me azo ti kua ni ayeke mingi ape.” (Luc 10:2). Jésus ayeke gue ande nga na ando ni so, me a lingbi adisciple ni asi kâ kozo na lo. A lingbi adisciple 70 ni asava kobela ti azo na ala fa a-oko tënë so Jésus ayeke fa lani.

A lingbi adisciple ni angbâ na yâ ti asynagogue la si ala yeke fa ye na azo ape. Jésus atene na ala ti gue na peko ti azo ni na yanga-da ti ala. Lo tene: “Ndo kue so ala gue dä si ala lï na yâ ti mbeni da, ala tene kozoni: ‘Siriri aduti na da so.’ Tongana mbeni zo so aye siriri ayeke dä, siriri ti ala ayeke duti na ndo ti lo.” Me, tënë ti nyen la ala yeke fa na azo ni? Jésus atene: “Ala tene na azo ni: ‘Royaume ti Nzapa aga nduru na ala awe.’”—Luc 10:5-9.

Awango so Jésus amû na adisciple 70 so, ayeke oko na ati so lo mû lani na abazengele ti lo 12, a sara ngu oko tongaso awe, tongana lo ye ti tokua ala ti gue ti fa tënë. Lo fa na ala kozo awe so, a yeke azo kue la si ayeke yamba ande ala nzoni ape. Me a-effort so ala yeke sara ti leke bê ti azo ayeke sara si tongana Jésus aga ande na peko ti ala, gbâ ti azo ayeke gi ande gingo ti mä afango ye ti lo nga ti manda ye na mbage ti lo.

A ninga na pekoni, adisciple 70 ni akiri na mbage ti Jésus. Na ngia na bê ti ala, ala tene na lo: “Seigneur, même asioni yingo amä yanga ti e tongana e di iri ti mo.” Tënë so adoit ti nzere lani na Jésus mingi, ni la lo tene: “Mbi bâ Satan so alondo na yayu atï awe tongana wâ ti bekpa. Mbi mû na ala ngangu ti dö na gbe ti gere ti ala angbo nga na akpalakongo.”—Luc 10:17-19.

Tongana Jésus asara tënë ti dongo ndo ti angbo na akpalakongo na gere, lo ye ti fa na adisciple ni so ala peut ande ti hon ndo ti asioni ye so ala yeke tingbi na ni. Me na mbage, a lingbi ala hinga nga so Satan ayeke londo ande na yayu ti tï na sese. Jésus afa nga na ala ti hinga ye so ayeke kota ye ande. Lo tene: “Ala duti na ngia pëpe ndali ti so asioni yingo amä yanga ti ala. Me ala duti na ngia ngbanga ti so a sû iri ti ala na mbeti na yayu awe.”—Luc 10:20.

Jésus angbâ amû gonda na Nzapa na lê ti azo kue ndali ti so lo sara kua na adisciple ti ni, so ayeke sara tere ti ala kete, ti sara mara ti kota ye tongaso. Lo ngbâ lo tourné na mbage ti adisciple ni, na lo tene: “Ngia ayeke na azo so ayeke bâ aye so ala yeke bâ so. Mbi tene na ala: Gbâ ti aprophète na agbia aye lani ti bâ aye so ala yeke bâ so, me ala bâ ni ape. Nga, ala ye lani ti mä aye so ala yeke mä so, me ala mä ni ape.”—Luc 10:23, 24.

TI HINGA AMBENI TËNË

Royaume ti Nzapa: Ndani so a yeke kota ye na lê ti Jésus

A yeke senge ape la Jésus asara lani tënë ti Royaume ni mingi ahon tanga ti aye kue so.