Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Jésus: Lege ni, tâ tënë na fini

 CHAPITRE 71

A-Farizien adë gaba na koli so ayeke lani waziba

A-Farizien adë gaba na koli so ayeke lani waziba

JEAN 9:19-41

  • AFARIZIEN ADË GABA NA KOLI SO AYEKE ÂNDÖ WAZIBA

  • AMOKONZI-NZAPA AYEKE “AWAZIBA”

A-Farizien ake ti yeda so a yeke Jésus la asara si koli so, so ayeke lani waziba so, abâ ndo. Tongaso, ala iri babâ na mama ti koli ni. Ababâ na mama ni ahinga so a peut ti ‘tomba ala na yâ ti synagogue’ ndali ti tënë ni (Jean 9:22). A yeke duti ande ngangu mingi na sewa ni, tongana a kangbi ala na tanga ti amba ti ala aJuif. Sewa ni apeut ti wara kpale ti nginza na pekoni.

A-Farizien ahunda atënë use na babâ na mama ni atene: “Molenge ti ala so ala tene ala dü lo waziba so la? A sara tongana nyen si lo yeke bâ ndo fadeso?” Babâ na mama ni akiri tënë atene: “E hinga so molenge ti e la nga e dü lo waziba. Me e hinga ye so asara si lo yeke bâ ndo fadeso ape; wala zo wa la azi lê ti lo ni, e hinga nga ape.” Même si molenge ni afa na ala ye so apassé, babâ na mama ni afa so ala sara ye na hange na ngoi so ala tene: “Ala hunda lo. Lo ga koli awe. Lo lingbi ti sara tënë lo wani.”—Jean 9:19-21.

Tongaso, aFarizien ni airi koli ni ti ga, na ala zia mbeto na yâ ti lo na tenengo na lo so ala yeke na ambeni ye so afa so Jésus ayeke mbeni nzoni zo ape. Ala tene na lo atene: “Mû gloire na Nzapa. E hinga so koli so ayeke wasiokpari.” Sân ti ke tene ti ala ni, koli ni atene: “Wala lo yeke wasiokpari mbi hinga ti mbi ape.” Me, lo ngbâ lo tene: “Ye so mbi hinga ni ayeke so: mbi yeke ândö waziba, me fadeso mbi yeke bâ ndo.”—Jean 9:24, 25.

Me, teti so ala ye ti tene tënë ni angbâ gi ge tongaso ape, aFarizien ni atene: “Nyen la lo sara na mo? Lo zi lê ti mo ni tongana nyen?” Na yâ ti kiringo tënë ti lo, koli ni afa so lo yeke na mbeto ape, lo tene: “Mbi tene ni fade na ala awe, me ala mä ni ape. Ngbanga ti nyen la ala ye ti kiri ti mä ni? Ala nga kue ala ye ti ga adisciple ti lo?” Na kota ngonzo na bê ti ala, aFarizien atene na lo: “Mo la mo yeke disciple ti koli so, me e yeke ti e adisciple ti Moïse. E hinga so Nzapa asara tënë ândö na Moïse. Me ti koli so, e hinga ndo so lo londo dä ape.”—Jean 9:26-29.

Koli ni ahinga li ti lo encore na tënë ni ape, ni la lo tene: “Ye so mbi gi li ti mbi dä gbä ayeke so: Ala hinga ndo so lo londo dä ape, me lo zi lê ti mbi.” Na pekoni, lo ngbâ lo sara mbeni tënë so ala peut nga ti ke ni ape na so afa zo wa la Nzapa ayeke mä lo. Koli ni atene: “E hinga so Nzapa ayeke mä awasiokpari ape, me tongana mbeni zo akpe mbeto ti Nzapa na lo sara ye so bê ti Nzapa aye, Nzapa ayeke mä lo. Ade a mä lâ oko ape so a zi lê ti mbeni zo so a dü lo waziba.” Na nda ni, lo ngbâ lo tene: “Tongana fade koli so alondo na Nzapa ape, ka lo lingbi ti sara ye oko ape.”—Jean 9:30-33.

Teti so ala hinga nga tënë so ala peut ti tene na ndo ni ape, aFarizien ni azonga lo, ala tene: “A dü mo na ngbongboro tere ti mo kue na yâ ti siokpari, me mo yeke fa ye na e?” Ala ngbâ abi lo na gigi.—Jean 9:34.

Tongana Jésus amä tënë ti ye so apassé, lo wara koli ni na lo hunda, lo tene: “Mo mä na bê na Molenge ti zo?” Koli ni atene: “Kota zo, lo yeke zo wa? ti tene mbi mä na bê na lo.” Jésus atene na koli ni polele atene: “Mo bâ lo awe, lo la lo yeke sara tënë na mo so.”—Jean 9:35-37.

Koli ni atene: “Seigneur, mbi mä na bê na lo.” Ti fa so lo yeke na mabe nga lo mû nengo na Jésus, koli ni atï na sese na devant ti Jésus, na Jésus angbâ atene na lo atene: “A yeke ndali ti fango ngbanga so la si mbi ga na yâ ti dunia so: ti tene ala so abâ ndo ape abâ ndo na ala so abâ ndo aga awaziba.”—Jean 9:38, 39.

A-Farizien, so ayeke na place ni so, ahinga ti ala so ala yeke awaziba ape. Me, tongana a bâ ni nzoni, ala yeke sara lani kua ti ala ti wafango ye na lege ni? Ala hunda Jésus atene: “E nga kue e yeke awaziba?” Jésus atene na ala, lo tene: “Tongana ala yeke fade awaziba, ka siokpari ayeke na li ti ala ape. Me so ala tene: ‘E yeke bâ ndo,’ siokpari ti ala angbâ na li ti ala.” (Jean 9:40, 41). Tongana ala yeke fade nga awafango ye na Israël ape, ka zo apeut ti comprendre ndani so ala ke Jésus. So ala hinga Ndia nzoni so, me ala ke Jésus, kota siokpari la ala sara so.