Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Jésus: Lege ni, tâ tënë na fini

 CHAPITRE 76

Lo te kobe na ndo ti mbeni Farizien

Lo te kobe na ndo ti mbeni Farizien

LUC 11:37-54

  • JÉSUS AFÂ NGBANGA NA NDO TI AFARIZIEN SO AYEKE HANDA LÊ TI AZO

Na ngoi so lo yeke na Judée, mbeni Farizien atisa Jésus ti gue ti te kobe na da ti lo, na Jésus ayeda (Luc 11:37, 38; haka ni na Luc 14:12.). Ti aFarizien, kozo ti tene ala te ye, ala yeke sukula ka maboko ti ala juska na nduzu si. Me, Jésus asara ape (Matthieu 15:1, 2). A yeke nga sioni ape tongana mbeni zo asukula maboko ti lo tongaso, nga a yeke Nzapa pëpe la ahunda ti sara tongaso.

Li ti Farizien ni akpe ti bâ so Jésus asara ye alingbi na ngobo ni so ape. A yeke ndali ni la, Jésus atene: “Ala aFarizien, ala yeke sukula tere ti kopo na ti sembe, me na yâ ni, bê ti ye ahon ndo ti ala nga nzara ti sarango ye ti sioni ahon ndo ti ala. Ala, azo so li ti ala ayeke dä ape so! Zo so asara tere ti ye ni so, lo sara nga yâ ni ape?”—Luc 11:39, 40.

Kpale ni ge ayeke pëpe tënë ti sukulango maboko kozo na tengo kobe, me kpale ni ayeke so amokonzi-nzapa ni ayeke handa lê ti azo. A-Farizien nga na ambeni mba ti ala ni, so ayeke sukula maboko ti ala juska na nduzu si so, asukula pëpe asioni ye so ayeke na bê ti ala. Ni la, Jésus amû wango so na ala, lo tene: “Amatabisi so ala yeke mû, zia si a duti aye so alondo na gbe ti bê ti ala, na ala yeke ga nzoni na yâ ti tanga ti aye ni kue.” (Luc 11:41). Tënë so ayeke tâ tënë! A lingbi ndoye la apusu mbeni zo ti mû ye, me pëpe nzara ti fango na lê ti azo so lo la lo yeke nzoni mingi.

A-Farizien ayeke mû lani ye na azo. Me, Jésus atene: “Ala yeke mû dîme ti akugbe nde nde kue ti tongo na ye tongana kugbe ti menthe nga na kugbe ti rue. Me ala sara sanka ti mbilimbili nga na ndoye ti Nzapa. A yeke aye so ala doit fade ti sara ni la, me a yeke nzoni ala sara sanka ti tanga ti aye ni so ape.” (Luc 11:42). Ndia ti Nzapa ahunda lani na azo ti mû dîme (wala dixième) ti alê ti kobe ti yaka ti ala (Deutéronome 14:22). Ye so a hunda nga ti ga na akugbe ti menthe, ti rue nga na ambeni kugbe nde so a yeke zia ka na yâ ti kobe si anzere. A-Farizien ayeke mû ka dixième ti akugbe so kue. Me tongana a ndu tënë ti ambeni commandement ti Nzapa so ayeke kota mingi, na tapande ti sara ye na lege ni nga ti sara tere kete na gbe ti Nzapa, eskê aFarizien ni ayeke sara ye alingbi na ni?—Michée 6:8.

Jésus atene: “Mawa na ala, aFarizien, ndali ti so ala ye gi akozo ngende na yâ ti asynagogue nga ala ye si azo abara ala na yâ ti agara! Mawa na ala, ndali ti so ala yeke tongana adû ti kuâ so azo abâ ni ape, na ala yeke tambela na ndo ni sân ti hinga atene a yeke dû ti kuâ la!” (Luc 11:43, 44). Biani, azo apeut ti tï na yâ ti mara ti dû ti kuâ tongaso na ti ga sioni na lê ti Ndia. Jésus asara tënë so tongaso ti fa so a yeke bâ asioni ye ti aFarizien hio ape, ala yeke sara ni na hondengo ni.—Matthieu 23:27.

Mbeni koli so ahinga Ndia ti Nzapa mingi angbâ atene na Jésus atene: “Maître, na tenengo atënë so, mo yeke zonga e nga.” Mara ti azo tongana koli so ayeke na bezoin ti hinga so ala sara kua ti ala ti fango ye na lege ni ape. Ni la, Jésus atene: “Mawa na ala nga, ala so ahinga Ndia mingi, ndali ti so ala yeke zia na ndo ti azo akungba so a yeke ngangu ti tene azo ni ayô ni, me ala wani ala yeke ndu ni na li ti maboko ti ala ape! Mawa na ala, ndali ti so ala yeke leke adû ti kuâ ti aprophète, me akotara ti ala la afâ aprophète ni!”—Luc 11:45-47.

Akungba so Jésus ayeke sara tënë ni ge so ayeke angobo ti akotara, so a tene ni na azo gi na yanga, nga na afango ye ti aFarizien so ague nde na ye so Ndia afa ni. Akoli so asara si gigi aga lani ngangu na azo. Ala tene so azo kue adoit ti ngbâ ti yô anengo kungba so. Akotara ti ala afâ aprophète ti Nzapa, ti londo na Abel ti ga na ni. Fadeso, ala kue ayeke sara ye tongana ti akotara ti ala ni, atâa so na bango ni, ala yeke fa so ala ye aprophète na lege so ala yeke leke adû ti kuâ ndali ti aprophète ni. Ala yeke gi même lani gingo ti fâ kota Prophète ti Nzapa so ahon atanga ni kue. Ni la, Jésus atene so Nzapa ayeke fâ ande ngbanga na ndo ti ala. A yeke lani ye so asi ngu 38 na pekoni, na ngu 70 ti ngoi ti e.

Jésus akiri atene: “Mawa na ala, ala so ahinga Ndia mingi, ndali ti so ala zi clé ti porte so amû lege na zo ti hinga Nzapa. Ala wani ala lï na yâ ni ape nga azo so aye ti lï dä, ala kanga lege na ala!” (Luc 11:52). Akoli so, so ala la adoit fade ti zi nda ti Tënë ti Nzapa na azo so, ala la fadeso ayeke sara si azo ahinga wala amä yâ ti tënë ti Nzapa ni encore ape.

Na mango atënë ti Jésus so, ascribe na aFarizien asara ye tongana nyen? Tongana Jésus aye ti londo ti hon, na ngonzo na bê, ala komanse ti gi lo na tënë na ala yeke hunda atënë kirikiri na lo. A yeke pëpe ndali ti so ala ye ti hinga ye la ala hunda ndo tongaso. Me, ala hunda ndo tongaso ndali ti so ala ye ti handa Jésus ti tene lo tene mbeni tënë so ndali ni ala lingbi ti hunda ti tene agbu lo.