Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Jésus: Lege ni, tâ tënë na fini

 CHAPITRE 55

Atënë ti Jésus ason bê ti azo mingi

Atënë ti Jésus ason bê ti azo mingi

JEAN 6:48-71

  • TI TE NYAMA TI TERE TI JÉSUS NA TI NYON MÊNË TI LO

  • BÊ TI AZO MINGI ASON NA ALA KE TI MÛ PEKO TI LO

Na yâ ti mbeni synagogue na Capernaüm, Jésus ayeke fa na azo so lo la lo yeke mapa so alondo na yayu. Lo sara tënë ni so na ndo ti tënë so lo tene na azo so alondo na mbage ti est ti Kota ngu ti Galilée si aga, so lani lo mû na ala mapa na susu so.

Lisoro so Jésus asara na azo ni ade ti hunzi ape. Lo tene: “Akotara ti ala ate ândö manne na benyama, atâa so kue ala kui.” Me na mbage, lo tene: “Mbi la mbi yeke mapa so ayeke na fini, so alondo na yayu si aga. Tongana mbeni zo ate mapa so, lo yeke ngbâ na fini lakue lakue. Biani, mapa so mbi yeke mû ni ande ayeke nyama ti tere ti mbi so mbi yeke mû ndali ti fini ti dunia so.”—Jean 6:48-51.

Lani, na nze ti mars wala avril ti ngu 30 tongaso, Jésus atene na Nicodème so Nzapa aye dunia so mingi si lo mû Molenge ti lo tongana mbeni Sauveur. Fadeso, Jésus afa na azo ni so a lingbi ala te nyama ti tere ti lo, so ti tene ala sara aye so afa so ala yeke na mabe na sacrifice so lo yeke gue ti mû ande. A yeke na sarango tongaso la si ala yeke wara fini ti lakue lakue.

Me azo ni ake atënë ti Jésus ni. Ala komanse ti hunda ndo atene: “Koli so alingbi ti mû na e nyama ti tere ti lo ti te ni tongana nyen?” (Jean 6:52). A yeke gi hakango ye la Jésus amû so, me pëpe tâ tengo nyama ti tere ti lo. Ye so lo tene na pekoni la afa ye so lo ye biani ti tene fade.

Lo tene: “Tongana ala te nyama ti terê ti Molenge ti zo ape na ala nyon mênë ti lo ape, ala yeke na fini na yâ ti ala ape. Zo so ate nyama ti tere ti mbi na lo nyon mênë ti mbi, lo yeke na fini ti lakue lakue. . . . Ngbanga ti so nyama ti tere ti mbi ayeke tâ kobe, na mênë ti mbi ayeke tâ ye ti nyongo ni. Zo so ate nyama ti tere ti mbi na anyon mênë ti mbi, lo yeke beoko na mbi, na mbi yeke beoko na lo.”—Jean 6:53-56.

Tara ti bâ tongana nyen la si tënë ni so ason bê ti aJuif so ayeke mä lani Jésus! Ala pensé ti ala atene Jésus ahunda na ala ti ga azo ti tengo zo wala ti doro Ndia ti Nzapa so atene a lingbi a te mênë ape (Genèse 9:4; Lévitique 17:10, 11). Me, Jésus ayeke sara lani pëpe tënë ti tâ tengo nyama ti tere ti lo wala ti tâ nyongo mênë ti lo. Lo ye ti fa so a lingbi azo so aye ti wara fini ti lakue lakue asara aye so afa so ala yeke na mabe na sacrifice so lo yeke sara, na mungo tere ti lo so sioni oko ayeke dä ape nga na lege so mênë ti lo ayeke tuku. Ye oko, même ambeni disciple ti lo amä yâ ti tënë ni tongaso ape. Ambeni atene: “So tënë ti songo bê la. Zo wa la alingbi ti mä ni?”—Jean 6:60.

Teti so Jésus abâ so ambeni disciple ti lo ayeke diko tënë na gbe ti go, lo hunda ala, lo tene: “Tënë so ason bê ti ala? Ala yeke tene ande nyen tongana ala bâ Molenge ti zo ayeke montê na ndo so lo yeke dä kozo? . . . Atënë so mbi tene na ala ayeke yingo na ayeke fini. Me na popo ti ala, ambeni zo ayeke dä so amä na bê ape.” Na ndo ti tënë so, gbâ ti ambeni disciple amû lege ahon na ala mû peko ti lo encore ape.—Jean 6:61-64.

Jésus ahunda abazengele ti lo 12, lo tene: “Ala nga kue, ala ye ti gue?” Pierre akiri tënë atene: “Seigneur, e gue ande na mbage ti zo wa? Mo yeke na atënë so amû na zo fini ti lakue lakue. E mä na bê nga e hinga so mo yeke Lo so ayeke nzoni-kue so alondo na Nzapa.” (Jean 6:67-69). Na tenengo tënë tongaso, Pierre na tanga ti abazengele afa so ala yeke be-ta-zo na Jésus, atâa so ala mä yâ ti fango ye ti Jésus ni kue ape.

Kiringo tënë ti Pierre so anzere na Jésus, me Jésus atene nga atene: “Mbi soro ala bale-oko na use, ni la ape? Me mbeni oko na popo ti ala ayeke zo ti pango zo.” (Jean 6:70). Jésus ayeke sara tënë ti Judas Iscariote la. Âmanke na ngoi ni so, Jésus akomanse ti bâ sioni nzara so adü na yâ ti bê ti Judas na lege ti asarango ye ti tere ti lo.

Me, a doit ti nzere lani na Jésus ti bâ so Pierre nga na tanga ti abazengele ni angbâ lakue ti mû peko ti lo na yâ ti kua ti songo fini ti azo so lo yeke sara.