Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Jésus: Lege ni, tâ tënë na fini

 CHAPITRE 30

Songo so ayeke na popo ti Jésus na Babâ ti lo

Songo so ayeke na popo ti Jésus na Babâ ti lo

JEAN 5:17-47

  • NZAPA AYEKE BABÂ TI JÉSUS

  • LO MÛ ZENDO SO FADE A YEKE ZINGO AKUÂ

Na ngoi so ambeni Juif atene lani so Jésus la adoro ndia ti Sabbat na savango mbeni koli, Jésus akiri tënë na ala, lo tene: “Babâ ti mbi angbâ ti sara kua juska fadeso, na mbi kue mbi ngbâ ti sara kua.”—Jean 5:17.

Na savango koli so, Jésus adoro pëpe Ndia so Nzapa amû na ndo ti Sabbat. Kua ti lo ti fango tënë nga na ti savango azo ague oko na anzoni kua so Nzapa asara. Tongaso, lango oko oko, Jésus angbâ ti sara anzoni ye. Kiringo tënë ti lo akiri agbi yâ ti bê ti awato ti lo, na ala komanse ti gi lege ti fâ lo. Ngbanga ti nyen tongaso?

Na ndo ti bango ndo ti ala so ayeke nga na lege ni ape so, so a tene Jésus la adoro ndia ti Sabbat na savango azo so, aJuif ni akiri atene so Jésus asara kota siokpari ndali ti so lo tene ni la ni yeke Molenge ti Nzapa. Ala bâ ni tongana zongango Nzapa la lo sara so, mo bâ mo tene Jésus ni atene fade atene ni na Jéhovah ani lingbi tere. Me mbeto ti ala asara nga Jésus ape, na lo kiri tënë na ala na fango tongana nyen la songo ti lo na Nzapa ayeke kota mingi. Lo tene: “Babâ ni aye Molenge ni mingi, ni la lo fa na Molenge ni aye kue so lo wani lo sara.”—Jean 5:20.

Babâ ni ayeke Zo so amû fini na zo, na lo fa ni na lege so lo mû na ambeni koli ândö ngangu ti zingo ambeni zo na kuâ. Jésus akiri atene: “Gi tongana ti so Babâ ni azingo akuâ na lo sara si ala duti na fini, Molenge ni nga ayeke sara si zo so lo ye ti tene lo duti na fini aduti na fini.” (Jean 5:21). So pendere tënë! Tënë ni amû na e mbeni beku ndali ti kekereke ti e. Même laso, na lege ti yingo, Molenge ni angbâ ti zingo azo na kuâ. Ni la lo ngbâ lo tene: “Zo so amä tënë ti mbi na lo mä na bê na zo so atokua mbi, lo yeke na fini ti lakue lakue, na lo yeke gue na gbele ngbanga ape, me lo londo na yâ ti kuâ lo kiri na fini.”—Jean 5:24.

Na ngoi ni so, mbeni ye tongaso so afa atene Jésus azingo mbeni zo na kuâ ayeke dä ape, me Jésus atene na awato ti lo so londongo ti akuâ ayeke duti ande dä. Lo tene: “L’heure ni ayeke ga so ala kue so ayeke na yâ ti adû ti kuâ ayeke mä ande go ti lo, na ala yeke sigi.”—Jean 5:28, 29.

Teti so kua so lo yeke na ni ti sara ayeke kota mingi, Jésus afa polele so lo yeke na gbe ti Nzapa. Lo tene: “Mbi lingbi ti sara mbeni ye oko tongaso na bê ti mbi wani ape, . . . mbi yeke gi ti sara ye so bê ti mbi wani aye ape, me ti sara ye so bê ti lo so atokua mbi aye.” (Jean 5:30). Me Jésus afa nga kota kua so lo yeke na ni ti sara na yâ ti ye so Nzapa aleke ti sara. Ade na ngoi ni so lo sara ye ni so tongaso ti tene azo kue abâ ape. Me même awato ti lo kue abâ gbâ ti aye so lo sara. Jésus adabe ti ala lo tene: “Ala tokua lani azo na Jean, na lo sara tënë ti témoin na ndo ti tâ tënë.”—Jean 5:33.

Awato ti Jésus so adoit ti mä nga lani tënë so Jean atene na akota zo ti aJuif, a sara angu use awe. Jean asara lani tënë ti mbeni Zo so ayeke ga na peko ti lo, so a iri lo “Prophète” nga “Christ”. (Jean 1:20-25). Jésus adabe ti ala so kozo ala bâ lani Jean na nene ni mingi, lo so ayeke na da ti kanga fadeso. Lo tene: “A sara mbeni ngoi kete awe la ala ye fade ti duti na ngia mingi na yâ ti lumière ti lo.” (Jean 5:35). Me fango tënë ti Jésus ayeke kota mingi ahon ti so Jean asara lani.

Jésus atene: “Akusala so mbi yeke sara so [so na yâ ni a yeke wara nga savango zo so lo londo ti sara so], a yeke ni la si asara tënë ti témoin na ndo ti mbi ti fa so Babâ la atokua mbi.” Na pekoni, lo kiri lo tene: “Babâ so atokua mbi asara tënë ti témoin na ndo ti mbi.” (Jean 5:36, 37). Na tapande, na ngoi ti batême ti Jésus, Nzapa lo wani lo sara tënë ti témoin na ndo ti Jésus.—Matthieu 3:17.

Ti tâ tënë ni, awato ti Jésus ayeke nga na mbeni raison ti ke Jésus ape. Même Mbeti ti Nzapa, so ala tene ala yeke gi ndani so, asara tënë na ndo ti Jésus. Na nda ni, Jésus atene na ala: “Tongana ala mä na bê na Moïse, ka ala yeke mä na bê na mbi nga, ndali ti so Moïse asara tënë ti mbi na mbeti. Me tongana atënë so lo sû na mbeti ala mä na bê na ni ape, ka ala yeke mä na bê na atënë ti mbi tongana nyen?”—Jean 5:46, 47.