Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Jésus: Lege ni, tâ tënë na fini

 CHAPITRE 59

Molenge ti zo ayeke zo wa?

Molenge ti zo ayeke zo wa?

MATTHIEU 16:13-27 MARC 8:22-38 LUC 9:18-26

  • JÉSUS ASAVA MBENI WAZIBA

  • A MÛ ACLÉ TI ROYAUME NA PIERRE

  • JÉSUS AFA SO LO YEKE KUI ANDE NGA A YEKE ZINGO LO

Jésus na adisciple ti lo asi fadeso na Bethsaïda. Azo ti kodro ni aga na lo mbeni waziba na ala tene na lo ti ndu koli ni, tongaso si lo wara sava.

Jésus agbu maboko ti koli ni na lo gue na lo na gigi ti kete kodro ni. Na peko ti so lo tuku ngu ti yanga na ndo ti lê ti koli ni, lo hunda lo, lo tene: “Mo bâ mbeni ye?” Koli ni atene: “Mbi bâ azo, me mo bâ mo tene akeke la ayeke tambela.” (Marc 8:23, 24). Jésus angbâ azia maboko na ndo ti lê ti koli ni, na koli ni abâ ndo. Lo tene na koli ni, so ayeke bâ fadeso ndo nzoni, ti kiri na yanda-da na lo tene na lo ti lï na yâ ti kete kodro ni ape.

Na pekoni, Jésus na adisciple ti lo ague na mbage ti nord, na kodro ti Césarée ti Philippe. A yeke kete tambela ape, ndali ti so lege ni ayo kilomètre 40 tongaso. Kete kodro ni so ayeke na li ti mbeni hoto, so tongana zo aluti na ndo ni, lo peut ti bâ Hoto ti Hermon so ayo ahon ni. Ala peut lani ti sara lango use, wala ahon so, na lege.

Na lege, tongana ala si na mbeni place, Jésus agboto tere ti lo na mbeni ndo, lo oko, ti gue ti sambela. A ngbâ gi na lo nze gumbaya wala bale-oko tongaso ti tene lo kui, na lo yeke gi bê ti lo mingi lani na ndo ti adisciple ti lo. Ade ti ninga ape, ambeni disciple ni mingi azia ti mû peko ti lo. Ti ambeni, ala hinga ye ti sara ape wala ala découragé. Peut-être, ala yeke hunda tere ti ala wala ngbanga ti nyen la lo ke ti tene azo asara si lo ga gbia. Nga, ngbanga ti nyen la lo ke ti sara mbeni miracle ti fa na azo wala lo yeke zo wa biani.

Tongana adisciple ni ague na peko ti lo na place so lo ngbâ ti sambela dä, Jésus ahunda ala, lo tene: “Azo ayeke tene ti ala so Molenge ti zo ayeke zo wa?” Adisciple ni atene: “Ambeni zo atene lo yeke Jean Baptiste, ambeni atene lo yeke Élie, ambeni nga atene lo yeke Jérémie wala mbeni prophète nde.” Gbâ ti azo apensé atene âmanke Jésus ayeke mbeni oko ti aprophète so azingo na kuâ. Ti pusu ala ti sigi na tënë ti bê ti ala, Jésus ahunda adisciple ni, lo tene: “Me ti ala, ala tene mbi yeke zo wa?” Droit Simon Pierre atene: “Mo yeke Christ, Molenge ti Nzapa so ayeke na fini.”—Matthieu 16:13-16.

Jésus atene na Pierre so a lingbi lo duti na ngia ndali ti so a yeke Nzapa la afa na lo tënë ni so. Na pekoni, Jésus atene: “Mbi tene na mo: Mo yeke Pierre. Mbi yeke leke congrégation ti mbi na ndo ti kota tênë so, na dû ti kuâ ayeke hon ni na ngangu pëpe.” Jésus aye ti fa so a yeke ni wani la ni yeke leke mbeni congrégation ande, so tongana azo ti yâ ti congrégation ni aduti be-ta-zo na ngoi so ala yeke na fini na ndo ti sese, même tongana ala kui, dû ti kuâ ayeke duti na ngangu na ndo ti ala ape. Lo mû zendo na Pierre, lo tene: “Mbi yeke mû na mo aclé ti Royaume ti yayu.”—Matthieu 16:18, 19.

Jésus afa pëpe so Pierre la ayeke kota ahon tanga ti abazengele kue wala lo fa so Pierre la ayeke gunda ti congrégation. Jésus la ayeke Tênë so a yeke sara ande congrégation na ndo ni (1 aCorinthien 3:11; aÉphésien 2:20). Nde na so, lo mû na Pierre aclé ota. Pierre ayeke duti ande na pasa ti mû lege na ambeni bungbi ti azo ti lï na yâ ti Royaume ti yayu.

Pierre asara kua na kozo clé ni na ngoi ti Pentecôte ti ngu 33 na lege so lo fa na aJuif nga na aProsélyte, so achangé bê ti ala, ye so ala doit ti sara ti tene a sö ala. Lo sara kua na use clé ni ti mû lege na azo ti Samarie so amä na bê ti lï na yâ ti Royaume ti Nzapa. Na pekoni, na ngu 36, Pierre asara kua na ota clé ni ti mû lege na azo so ayeke aJuif ape nga so afâ ganza ape, na tapande ti Corneille nga na ambeni zo, ti lï nga na yâ ti Royaume ni.—Kusala 2:37, 38; 8:14-17; 10:44-48.

Na yâ ti lisoro ti ala na Jésus, li ti abazengele ni aga kirikiri tongana Jésus afa na ala apasi nga na kuâ so ayeke ku lo na yâ ti kete ngoi na Jérusalem. Me, teti so Pierre ahinga ti lo ape so a yeke zingo ande Jésus ti gue na yayu, lo gboto Jésus yamba, na lo suku na lo, lo tene: “Tene mara ti tënë so na tere ti mo ape, Seigneur! Ye tongaso ayeke si ande na mo ape.” Me Jésus atourné peko na lo, na lo tene: “Hon na peko ti mbi kâ, Satan! Mo yeke tênë ti pikango gere ndali ti mbi, ngbanga ti so mo yeke na apensé ti Nzapa pëpe, me ti azo.”—Matthieu 16:22, 23.

Jésus airi ambeni disciple ti lo nde ti ga na tere ti abazengele ti lo, na lo fa na ala kue so a yeke duti ande kete ye ape ti mû peko ti lo. Lo tene: “Tongana mbeni zo aye ti ga na peko ti mbi, zia lo ke tere ti lo wani na lo yô keke ti pasi ti lo si lo mû peko ti mbi lakue lakue. Biani, zo so aye ti sö fini ti lo, fade lo yeke girisa ni. Me zo so agirisa fini ti lo ndali ti mbi nga ndali ti nzoni tënë, fade lo yeke sö ni.”—Marc 8:34, 35.

A yeke tâ tënë so, ti duti disciple ti Jésus, a hunda kangango bê nga na sacrifice. Jésus atene: “Zo so asara kamene ti mbi nga na kamene ti tënë ti mbi na gbele azo ti fadeso, so ayeke be-ta-zo na Nzapa pëpe na so ayeke azo ti sarango siokpari, fade Molenge ti zo ayeke sara nga kamene ti lo na ngoi so lo yeke ga na yâ ti gloire ti Babâ ti lo legeoko na a-ange so ayeke nzoni-kue.” (Marc 8:38). Me tongana Jésus akiri ande, “lo yeke futa zo oko oko alingbi na sarango ye ti lo.”—Matthieu 16:27.