Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Jésus: Lege ni, tâ tënë na fini

 CHAPITRE 54

Jésus: “Mapa so amû fini na zo”

Jésus: “Mapa so amû fini na zo”

JEAN 6:25-48

  • JÉSUS AYEKE “MAPA SO ALONDO NA YAYU”

Lani, na mbage ti est ti Kota ngu ti Galilée ni kâ, Jésus asara miracle ti mû kobe na gbâ ti azo, nga na pekoni lo hon ye ti lo zê, tongana lo bâ so azo ni aye ti sara si lo ga gbia. Na bï ni so lani, Jésus atambela na ndo ti ngu, na Pierre nga kue atambela na ndo ti ngu ni so. Me teti so mabe atia Pierre ni, lo komanse ti linda ngu, me Jésus agbu maboko ti lo. Jésus asara nga si pupu akaï, peut-être ti sara si ngö ti adisciple ti lo alï ngu ape.

Fadeso, Jésus akiri na mbage ti ouest ti ngu ni, na kodro ti Capernaüm. Azo so lo mû lani kobe na ala so aga, na ala hunda lo, ala tene: “Mo si ge lawa?” Jésus asuku na ala na lo tene so ala yeke gi peko ti lo gi ti tene lo kiri lo mû kobe na ala encore. Lo tene na ala ti “sara kua pëpe ndali ti kobe so ayeke buba, me ndali ti kobe so ayeke ngbâ si ayeke mû fini ti lakue lakue.” Tongaso, ala hunda lo atene: “Ti sara kusala ti Nzapa, a lingbi e sara nyen?”—Jean 6:25-28.

Peut-être ala yeke pensé lani na akusala so Ndia ahunda, me Jésus ayeke sara lani tënë ti kusala so ahon atanga ni kue. Lo tene: “Kusala ti Nzapa ayeke so: Ala mä na bê na lo so Nzapa atokua lo.” Me atâa aye kue so Jésus asara, azo ni ayeke lani na mara ti mabe ni so ape. Ala hunda na lo ti tene lo sara mbeni miracle, tongaso si ala mä na bê na lo. Ala hunda lo atene: “Nyen la mo yeke sara? Akotara ti e ate lani manne na benyama, gï tongana ti so a sû na Mbeti ti Nzapa, a tene: ‘Lo mû na ala mapa so alondo na yayu ti tene ala te ni.’”—Jean 6:29-31; Psaume 78:24.

Tongana ala hunda na lo ti tene lo sara mbeni miracle, Jésus agboto lê ti ala na ndo ti Zo so ayeke mbilimbili na gunda ti amiracle so kue. Lo tene: “Mbi tene na ala: Moïse amû lani na ala pëpe mapa so alondo na yayu, me Babâ ti mbi amû na ala tâ mapa so alondo na yayu. Mapa ti Nzapa ayeke lo so alondo na yayu si aga na lo mû fini na dunia so.” Me teti so ala mä yâ ti tënë ni so ape, ala hunda lo atene: “Seigneur, mo mû na e mapa so lakue.” (Jean 6:32-34). “Mapa” wa la Jésus angbâ ti sara tënë ni so?

Jésus afa ndani, lo tene: “Mbi la mbi yeke mapa so amû fini na zo. Zo so aga na mbi, nzara ti kobe ayeke sara lo ape, nga zo so amä na bê na mbi, nzara ti ngu ayeke sara lo lâ oko ape. Me mbi tene na ala: Ala bâ mbi awe, atâa so kue ala mä na bê ape. . . . Mbi londo na yayu mbi ga ti sara ye so bê ti mbi aye ape, me ti sara ye so bê ti lo so atokua mbi aye. Ye so bê ti lo so atokua mbi aye ayeke so: Na popo ti ala kue so lo mû ala na mbi a lingbi mbi girisa zo oko ape, me a lingbi mbi zingo ala na kuâ na lâ ti nda ni. Ye so bê ti Babâ ti mbi aye ayeke so: A lingbi zo kue so abâ Molenge ni na amä na bê na lo awara fini ti lakue lakue.”—Jean 6:35-40.

Tënë ni so ason bê ti aJuif na ala komanse ti kasa lo. Ngbanga ti nyen la lo tene so ni la ni yeke “mapa so alondo na yayu si aga”? (Jean 6:41). Ti ala, a dü Jésus dungo, na babâ na mama ti lo ayeke azo ti Nazareth, mbeni gbata na Galilée. Ni la, azo ni ahunda ndo atene: “So ayeke Jésus, molenge ti Joseph, lo so e hinga babâ na mama ti lo so la ape?”—Jean 6:42.

Jésus akiri tënë na ala, lo tene: “Ala zia ti diko tënë na gbe ti go ti ala na popo ti ala. Zo oko alingbi ti ga na mbi pëpe, gï tongana Babâ so atokua mbi si agboto lo aga na lo na mbage ti mbi, na mbi yeke zingo lo ande na kuâ na lâ ti nda ni. A sû tënë so na yâ ti ambeti ti aProphète, a tene: ‘Jéhovah la ayeke fa ye ande na ala kue.’ Zo kue so amä aye so Babâ ni afa na lo manda ni, lo yeke ga na mbage ti mbi. So ti tene zo oko abâ Babâ ni ape, me gi lo so alondo na Nzapa aga. Lo la lo bâ Babâ ni. Ti tâ tënë ni, mbi tene na ala: Zo so amä na bê ayeke na fini ti lakue lakue.”—Jean 6:43-47; Ésaïe 54:13.

Lani, na yâ ti lisoro ti lo na Nicodème, Jésus asara tënë ti fini ti lakue lakue, na lo fa so ti tene zo awara ni, a lingbi zo ni aduti na mabe na Molenge ti zo, lo tene: “Zo kue so amä na bê na [oko Molenge so Nzapa wani si asara lo], a lingbi ti futi lo pëpe, me lo wara fini ti lakue lakue.” (Jean 3:15, 16). Me ti ge, Jésus asara tënë ni na gbâ ti azo, na fango na ala so a yeke na lege ti lo si ala yeke wara fini ti lakue lakue, na so même manne wala mapa so a yeke wara ka ni mingi na Galilée apeut ti mû ni na ala ape. Me, a yeke wara fini ti lakue lakue ni tongana nyen? Jésus akiri afa ni, lo tene: “Mbi yeke mapa so amû fini na zo.”—Jean 6:48.

Lisoro so Jésus asara na ndo ti mapa so alondo na yayu angbâ ti gue, na a kiri a ga ngangu tongana lo yeke fa ye na yâ ti mbeni synagogue na Capernaüm.