Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Jésus: Lege ni, tâ tënë na fini

 CHAPITRE 29

Eskê zo apeut ti sara nzoni ye na mba ti lo na lâ ti Sabbat?

Eskê zo apeut ti sara nzoni ye na mba ti lo na lâ ti Sabbat?

JEAN 5:1-16

  • JÉSUS AFA TËNË NA JUDÉE

  • LO SAVA MBENI KOLI NA TERE TI MBENI NGU

Jésus asara gbâ ti aye na ngoi ti kota kua ti fango tënë so lo sara na Galilée. Me so Jésus atene, ni “doit nga ti fa nzoni tënë ti Royaume ti Nzapa na ambeni gbata nde,” lo ye ti fa so kua ti lo ayeke ngbâ gi ge na Galilée ape. Tongaso, lo gue na lo “ngbâ ti fa tënë na yâ ti asynagogue ti Judée.” (Luc 4:43, 44). Ye so ayeke na lege ni ngbanga ti so e yeke na nze ti mars wala avril la, na a ga nduru ti sara mbeni matanga na Jérusalem awe.

Atâa so aÉvangile asara tënë mingi na ndo ti kua so Jésus asara na Galilée, e peut nga ti wara na yâ ni kete tënë na ndo ti kua so lo sara na Judée. Atâa so na Judée ni azo asara sanka ti tënë ti lo, ye so akanga lege na Jésus ape ti fa tënë mingi nga ti sara amiracle na ando kue so lo gue dä.

Hio na pekoni, Jésus ague na Jérusalem, kota gbata ti Judée, ti sara matanga ti Pâque ti ngu 31 ti ngoi ti e. Na Yanga ti Gbagba ti ataba, so ayeke mbeni ndo so azo ayeke dä mingi, a yeke wara mbeni ngu so lê ni akono, so a iri ni Bethzatha. Gbâ ti azo ti kobela, azo so lê ti ala abuba nga na azo so gere ti ala abuba, aga na place ni so. Ngbanga ti nyen? Ngbanga ti so azo mingi abâ atene zo apeut ti wara sava ti tere tongana zo ni alï na yâ ti ngu ni na ngoi so lê ti ngu ni ayengi.

A si na lâ ti Sabbat, Jésus abâ mbeni koli na tere ti ngu ni, so kobela awoko lo teti ngu 38. Jésus ahunda lo atene: “Mo ye si tere ti mo aga nzoni?” Koli ni atene: “Kota zo, na ngoi so ngu ni ayeke yengi, mbeni zo ti zia mbi na yâ ni ayeke dä ape. Me na ngoi so mbi yeke gue ti lï na yâ ti ngu ni, andâ mbeni zo alï kozo ti mbi awe.”—Jean 5:6, 7.

Jésus atene mbeni tënë so adoit ti sara si li ti koli ni, wala même ti mbeni zo so amä ni, apeut ti kpe. Lo tene: “Londo, mû ye so mo lango na ndo ni so, mo tambela.” (Jean 5:8). Na a yeke tâ gi ye so lo sara la. Droit, lo wara sava, lo mû ye so lo lango na ndo ni na lo komanse ti tambela.

Ahon ti tene ye ni so anzere na ala, aJuif abâ koli ni na ala suku na lo, ala tene: “So lango ti sabbat la, ndia amû lege na mo ti yô ye ti lango ti mo so ape.” Na koli ni akiri tënë na ala, lo tene: “Koli so asara si tere ti mbi aga nzoni so la atene na mbi, atene: ‘Mû ye so mo lango na ndo ni so, mo tambela.’” (Jean 5:10, 11). A-Juif ni so ayeke diko lani tënë ngbanga ti so mbeni zo asava zo na lâ ti Sabbat!

Ala ye ti hinga zo ni so, ni la ala hunda lo atene: “Zo ni so atene na mo atene: ‘Mû ye ti lango ti mo, mo tambelaʼ so ayeke zo wa?” Ala hunda koli ni tongaso ngbanga ti nyen? Ngbanga ti so “Jésus ahon awe” na milieu ti gbâ ti azo so ayeke na ndo ni so, na koli ni so ahinga nga iri ti Jésus ni ape (Jean 5:12, 13). Me na pekoni, na mbeni ngoi nde, koli ni ayeke kiri ti wara tere na Jésus. Ala wara tere na yâ ti temple, na ge la fadeso si lo ga ti hinga iri ti zo so asava lani lo na tere ti ngu so.

Koli ni ague na lo wara aJuif so ahunda lani lo ti hinga tongana nyen la lo wara sava ti tere so. Lo tene na ala so a yeke Jésus la asava lo. Tongana ala hinga ni tongaso awe, aJuif ni ague na mbage ti Jésus. Mo pensé so ala ye ti gue ti hinga wala na lege ti ngangu wa la Jésus ayeke sara na amiracle ni so? Kete ape. Nde na so, ala gue ti gi ti wara gi mbeni faute na yâ ti nzoni ye so Jésus asara na lâ ti Sabbat, na ala komanse même ti sara ye ti ngangu na lo!