Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Jésus: Lege ni, tâ tënë na fini

 CHAPITRE 64

A yeke nzoni e pardonné amba ti e

A yeke nzoni e pardonné amba ti e

MATTHIEU 18:21-35

  • A LINGBI E PARDONNÉ ZO JUSKA FANI MBASAMBALA AWE?

  • TOLI TI NGBÂA SO ASARA NZONI BÊ NA MBENI MBA TI LO APE

Bazengele Pierre amä Jésus so amû wango ti fa tongana nyen ti wara mbeni ita ti tene mo na lo use aleke tënë so alondo na popo ti ala. Me na bango ni, Pierre aye ti hinga fani oke la lo lingbi ti gi ti leke tënë tongaso.

Ni la Pierre ahunda Jésus: “Seigneur, tongana ita ti mbi asara siokpari na tere ti mbi, a lingbi mbi pardonné lo juska fani oke? Juska fani mbasambala?” Ambeni kota zo ti nzapa afa so zo alingbi ti pardonné mba ti lo juska fani ota. Ni la peut-être Pierre apensé ti lo so ni yeke duti nzoni zo mingi tongana ni pardonné ita ti ni “juska fani mbasambala.”—Matthieu 18:21.

Me, tënë ti dikongo wungo ti afaute la ayeke na gbe ti fango ye ti Jésus so ape. Ni la lo leke bango ndo ti Pierre, lo tene: “Mbi tene na mo, mo pardonné lo gï juska fani mbasambala pëpe, me juska fani 77.” (Matthieu 18:22). Jésus aye ti tene so, a yeke nzoni lo pardonné zo lakue. Pierre adoit ti diko pëpe fani oke la lo doit ti pardonné ita ti lo.

Tongaso, Jésus amû mbeni tapande ti fa na Pierre nga na amba ti lo so ala doit ti pardonné zo. A yeke tapande ti mbeni ngbâa so asara ye tongana ti maître ti lo ape. Gbia ni aye ti hunda na angbâa ti lo bon ti lo so ayeke na li ti ala. A ga na lo mbeni ngbâa ni oko, so asara kota bon ti talent 10 000 [wala denier 60 000 000]. Lo yeke na ngangu ti payé bon ni so ape. Tongaso, gbia ni amû yanga ti tene a kä ngbâa ni so, wali ti lo nga na amolenge ti lo, ti payé na bon ti lo ni. Na mango tënë ni so, ngbâa ni atï na sese na gere ti maître ti lo, lo dema tere ti lo, lo tene: “Kanga bê ti mo, mbi yeke kiri na mo nginza ti mo kue.”—Matthieu 18:26.

Mawa asara gbia ni na lo sara nzoni bê na ngbâa ni, lo zi kota bon so ayeke na li ti lo so. Na peko ti ye so gbia ni asara so, ngbâa ni ague awara mbeni mba ti lo ngbâa so asara bon ti lo ti denier 100. Lo gbu mba ti lo ngbâa ni, lo pete yâ ti go ti lo na lo tene na lo: “Mo kiri na mbi nginza ti mbi kue so ayeke na li ti mo.” Tongaso, mba ti lo ngbâa ni atï na sese na gere ti lo, lo voro yanga na lo, lo tene: “Kanga bê ti mo, mbi yeke kiri na mo nginza ti mo.” (Matthieu 18:28, 29). Me ngbâa so gbia ni apardonné lo so, lo sara ye tongana ti maître ti lo ape. Lo bi mba ti lo ngbâa, so bon ti lo akono nga mingi ape na li ti lo so, na da ti kanga juska ti tene lo payé bon ti lo ni awe si.

Jésus atene so amba ti lo ngbâa ni, so abâ sarango ye ti lo na bango mawa ti zo ape so, ague asara tënë ni na maître ni. Ngonzo asara maître ni, lo iri ngbâa ni ti ga, na lo tene na lo: “Mo sioni ngbâa so, na ngoi so mo voro yanga fade na mbi, mbi zi bon ti mbi kue na li ti mo.” Gbia ni abi ngbâa ni so, so abâ mawa ti mba ti lo ape so, na da ti kanga juska ti tene lo payé bon ti lo awe si. Jésus ahunzi tënë ti lo tongaso: “Babâ ti mbi so ayeke na yayu ayeke sara na ala tongaso nga tongana ala oko oko kue apardonné aita ti ala na bê ti ala kue pëpe.”—Matthieu 18:32-35.

So pendere fango ye na ndo ti tënë ti pardon! Nzapa apardonné gbâ ti asiokpari ti e. Me, siokpari so mbeni ita ti e Chrétien asara na tere ti e ayeke gi kete tongana a haka ni na ti so e sara na tere ti Nzapa. Na ndo ni, Jéhovah apardonné e gi lege oko ape, me lo sara ni lege gbani gbani. Eskê e kue e peut ti pardonné nga aita ti e lege mingi tongaso, même si e la e yeke na raison? Tongana ti so Jésus afa ni na yâ ti fango ye ti lo na ndo ti hoto, Nzapa ayeke ‘pardonné ande asioni ye so e sara tongana ti so e pardonné asioni ye so azo asara na e.’—Matthieu 6:12.