Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Jésus: Lege ni, tâ tënë na fini

 CHAPITRE 63

Jésus akiri amû ambeni wango na adisciple ti lo

Jésus akiri amû ambeni wango na adisciple ti lo

MATTHIEU 18:6-20 MARC 9:38-50 LUC 9:49, 50

  • WANGO NA NDO TI SARANGO SI MBENI ZO ATÏ

  • TONGANA MBENI ITA ASARA SIOKPARI

Jésus alondo ti fa sarango ye so a lingbi adisciple ti lo aduti na ni. A lingbi ala bâ tere ti ala wani tongana amolenge, so ayeke sara ka tere ti ala kete na so ayeke na bibe ti kota ndo ape. Tongana adisciple ni ‘ayamba mara ti akete molenge tongaso ndali ti iri ti ni, ala yamba ni nga la.’—Matthieu 18:5.

Ade ti ninga ape, abazengele ni apapa ti hinga zo wa la na popo ti ala ayeke kota mingi, ni la peut-être na mango tënë ti Jésus, ala bâ so lo yeke gboto mê ti ala la. Mo ye ti bâ, bazengele Jean asara tënë ti mbeni ye nde so alondo ti si, lo tene: “E bâ mbeni zo so ayeke tomba asioni yingo na iri ti mo, na e tara ti kanga lege na lo ngbanga ti so lo yeke mû peko ti e ape.”—Luc 9:49.

Eskê Jean abâ ti lo atene gi abazengele la ayeke na droit ti sava azo nga ti tomba asioni yingo? Tongana a yeke tongaso, ka a sara tongana nyen si koli Juif so awara lege ti tomba asioni yingo so? Jean apensé ti lo so koli so adoit ti sara miracle ape ndali ti so lo mû peko ti Jésus na abazengele ti lo ape.

Li ti Jean akpe tongana lo mä Jésus atene: “Ala tara ti kanga lege na lo ape, ndali ti so mbeni zo so ayeke sara miracle na iri ti mbi na so hio na pekoni lo tene sioni tënë ti mbi ayeke dä ape. Zo so ake e ape, andâ zo ti e la. Nga zo so amû na ala mbeni kopo ti ngu ti tene ala nyon ngbanga ti so ala yeke azo ti Christ, ti tâ tënë ni, mbi tene na ala, biani lo yeke wara ande futa ni.”—Marc 9:39-41.

Na ngoi ni so, koli so ayeke lani pëpe na bezoin ti tambela na tere ti Jésus ti fa so lo yeke na mbage ti Jésus. Congrégation ti aChrétien ade ti bâ gigi lani ape, ni la, so koli ni so ayeke tambela legeoko na Jésus ape so, aye pëpe ti tene so lo ke Jésus wala lo yeke maï tënë ti vorongo Nzapa ti wataka la. A yeke polele so lo mä na bê na iri ti Jésus nga tënë so Jésus atene afa biani so koli so ayeke wara ande futa ni.

Na mbage, tongana tënë ti yanga ti abazengele ni nga na sarango ye ti ala asara si koli so atï a yeke duti kete tënë la ape. Ni la Jésus atene: “Me zo so asara si mbeni oko ti akete zo so amä na bê na mbi atï, a yeke nzoni a kanga mbeni kota tênë ti nekango na ye na go ti lo, mara ni so akororo ayeke gboto ni si a yeke tourné, na a bi lo tâ na yâ ti ngu-ingo.” (Marc 9:42). Jésus afa na ala so tongana mbeni ye so ayeke kota ye mingi tongana maboko ti ala, gere ti ala wala lê ti ala, asara si ala tï, a lingbi ala fâ même ni abi. A yeke nzoni mingi ti tene ala lï na yâ ti Royaume ti Nzapa sân aye ni so ahon ti tene aye so angbâ na tere ti ala na ala gue na yâ ti Géhenne (Popo-Hoto ti Hinnom). Peut-être abazengele ni abâ lani popo-hoto ni so a yeke gbi lani asaleté dä, si a yo lani na Jérusalem ape so. Tongaso ala hinga so tënë ni so aye ti sara tënë ti futingo ti lakue lakue la.

Jésus agboto mê ti ala nga lo tene: “Ala sara hange si ala bâ mbeni oko ti akete zo so tongana mbumbuse zo pëpe, ndali ti so mbi tene na ala: Kâ na yayu, a-ange ti ala ayeke bâ lakue lê ti Babâ ti mbi so ayeke na yayu.” Biani, Nzapa abâ “akete zo” so na nene ni mingi. Jésus asara tënë ti mbeni koli so ayeke na ataba 100 me so oko agirisa. Lo dö atanga ni 99 lo zia na lo gue ti gi lo so agirisa so, na tongana lo wara taba oko so, tere ti lo anzere mingi ndali ti taba ni so ahon nzerengo tere so lo yeke na ni ndali ti ataba 99 so agirisa ape so. Tongaso Jésus atene: “Legeoko nga, a nzere pëpe na Babâ ti mbi so ayeke na yayu tongana mbeni oko ti akete zo so agirisa.”—Matthieu 18:10, 14.

Âmanke Jésus ayeke pensé na abazengele ti lo so ayeke papa fade ti hinga zo wa la na popo ti ala ayeke kota, ni la si lo mû na ala wango so: “Ala duti na ingo na yâ ti fini ti ala nga ala duti lakue na siriri na popo ti ala.” (Marc 9:50). Ingo ayeke sara si kobe anzere na yanga ti zo. Tongana mbeni zo azia ingo na yâ ti tënë ti lo, a yeke sara si azo ayeda na tënë ni hio nga a yeke ga na siriri, me papa ayeke ga ti lo gi na kangbi.—aColossien 4:6.

Ngoi na ngoi, ambeni ngangu tënë ayeke londo na popo ti azo, me Jésus afa tongana nyen ti leke ni. Lo tene: “Tongana ita ti mo asara mbeni siokpari na tere ti mo, gue mo fa na lo siokpari so lo sara. Zia a duti gi na popo ti ala use. Tongana lo mä mo, mo kiri na lo na nzoni lege awe.” Ka tongana lo mä mo ape? Jésus atene: “Mû zo oko wala use na tere ti mo, tongaso si na lege ti tënë ti yanga ti atémoin use wala ota, gere ti tënë kue aluti nzoni.” Me tongana so kue gbä lo mä mo ape, sara tënë ni na “congrégation” so ti tene na a-ancien so ala la alingbi ti fâ yâ ti ngbanga ni. Me tongana lo mä même ala ape? Zia “a bâ lo tongana zo ti amara nde nga tongana zo ti rongo nginza ti impôt,” azo so aJuif ayeke sara ka songo na ala ape.—Matthieu 18:15-17.

A-ancien ti acongrégation ayeke sara gi ye alingbi na tënë ti Nzapa. Tongana ala bâ so zo tongaso tënë ayeke na li ti lo na so a lingbi a fâ ngbanga na ndo ti lo, andâ ‘a yeke ye so a kanga ti lo ni na yayu awe.’ Me tongana ala bâ so tënë ayeke na li ti zo ni ape, a yeke duti ande nga “ye so a zi ni na yayu awe.” Biani awango so ayeke mû ande maboko mingi na congrégation ti aChrétien so ayeke bâ gigi. Na ngoi ti fango angbanga tongaso, Jésus atene: “Na ndo so azo use wala ota abungbi dä na iri ti mbi, mbi yeke na popo ti ala.”—Matthieu 18:18-20.