Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Jésus: Lege ni, tâ tënë na fini

 CHAPITRE 50

A leke ala ti gue ti fa tënë atâa akpale wa la ala tingbi na ni

A leke ala ti gue ti fa tënë atâa akpale wa la ala tingbi na ni

MATTHIEU 10:16–11:1 MARC 6:12, 13 LUC 9:6

  • JÉSUS ALEKE ABAZENGELE TI LO NA LO TOKUA ALA TI GUE TI FA TËNË

Jésus amû ambeni nzoni wango na adisciple ti fa na ala tongana nyen ti fa tënë na ngoi so ala yeke gue use use. Me, lo gbâ gi ge ape. Lo gboto nga mê ti ala na ndo ti awato ti ala, lo tene: “Mbi yeke tokua ala, na ala yeke duti tongana ataba na popo ti ambo ti ngonda . . . Ala sara hange, ngbanga ti so azo ayeke gue na ala na gbele ngbanga, na azo ni ayeke pika ala na zaza na yâ ti asynagogue ti ala. A yeke gue na ala na gbele agouverneur nga na agbia ndali ti mbi.”—Matthieu 10:16-18.

Biani, adisciple ti Jésus apeut ti tingbi na angangu tara. Me Jésus adë bê ti ala na tënë so: “Tongana a gue na ala na gbele ngbanga, ala gi bê ti ala pëpe na ndo ti tënë so ala yeke tene. Nga ala gi bê ti ala pëpe na ndo ti lege ti tenengo ni, ndali ti so na l’heure ni so, a yeke fa na ala ye so ala doit ti tene, ngbanga ti so a yeke gi ala pëpe si ayeke sara tënë, me a yeke yingo ti Babâ ti ala si ayeke sara tënë na lege ti ala.” Jésus angbâ encore atene: “Ita ayeke kä ita ti lo si a fâ lo, na babâ ayeke sara nga tongaso na molenge ti lo. Amolenge ayeke londo ti ke ababâ na amama ti ala na ti sara si a fâ ala. Azo kue ayeke ke ala ndali ti iri ti mbi. Me zo so agbu ngangu juska na nda ni, a yeke sö lo ande.”—Matthieu 10:19-22.

Ndali ti so fango tënë ayeke mbeni ye so adoit ti sara ni hio, Jésus agboto mê ti adisciple ti lo so a lingbi ala sara ye na ndara, tongaso si ala ngbâ lakue ti fa tënë. Lo tene: “Tongana a sara ye ti ngangu na ala na yâ ti mbeni gbata, ala kpe ala gue na mbeni nde. Ti tâ tënë ni, mbi tene na ala, ala yeke hunzi tambela ti ala na yâ ti agbata ti Israël kue pëpe kozoni si Molenge ti zo aga.”—Matthieu 10:23.

So pendere wango nga na tënë ti dengo bê la Jésus amû na abazengele 12 so! Peut-être mo kue mo bâ tongana nyen la atënë ni so andu nga azo so ayeke fa ande tënë na peko ti so Jésus akui nga lo zingo na kuâ. Ngbanga ti so Jésus atene na adisciple ti lo so fade “azo kue ayeke ke ala”. So aye ti fa so a yeke gi pëpe azo so Jésus atokua abazengele ti lo na mbage ti ala ti gue ti fa tënë la ayeke ke abazengele ni. Na mbage, Bible atene nga ape so a gue na abazengele ni so na devant ti agouverneur na agbia na ngoi so ala yeke fa lani tënë na yâ ti Galilée, wala so même afami ti ala akä ala si a fâ ala na ngoi ni so.

A yeke polele so Jésus angbâ ti tene na abazengele ti lo tënë ti aye so ayeke si ande. Na tapande, lo tene so adisciple ti lo ayeke hunzi ande kua ti fango tënë kue pëpe “kozoni si Molenge ti zo aga.” A fa so, adisciple ni ayeke hunzi ande pëpe kua ti fango tënë ti Royaume ti Nzapa na azo kozoni si Gbia Jésus Christ aga na yâ ti gloire ti lo, tongana juge so Nzapa asoro lo.

Tongana abazengele ni ayeke fa tënë, a lingbi ala hinga so, ala yeke tingbi nga ande na akangango lege. A yeke ndali ni la si Jésus atene: “Disciple ahon maître ti lo ape, nga ngbâa ahon wa ti lo ape.” Tënë ti Jésus ayeke polele. Lo tingbi lani na akangango lege, nga azo asara ye ti ngangu na lo ndali ti so lo fa tënë ti Royaume ti Nzapa. A yeke oko ye so ayeke sara ni ande na adisciple ti lo la. Me, Jésus amû wango so, lo tene: “Ala sara pëpe mbeto ti azo so ayeke fâ tere ti zo me ala lingbi ti fâ âme pëpe. Me ala sara mbeto ti lo so alingbi ti futi âme nga na tere ti zo kue na yâ ti Géhenne.”—Matthieu 10:24, 28.

Jésus azia mbeni tapande na ndo ti tënë so. Lo gbu ngangu lani juska na kuâ ahon ti tene lo duti be-ta-zo ape na Jéhovah, Zo so ayeke na ngangu kue. A yeke Nzapa so ngangu ti lo ahon angangu kue la si apeut ti futi “âme” (so ti tene beku so mbeni zo ni ayeke na ni ti wara fini) wala lo la lo peut ti zingo zo ni ti wara fini ti lakue lakue. Tënë so adoit ti dë bê ti abazengele ni lani mingi!

Ti fa so Nzapa ti ndoye ayeke pensé na bezoin ti azo ti lo, Jésus amû mbeni tapande. Lo tene: “A yeke kä anzêrë use na senge lê ti pata oko ape? Me mbeni oko ti anzêrë so ayeke tï na sese pëpe sân ti tene Babâ ti ala ahinga ni. . . . Tongaso, ala sara mbeto ape; ngere ti ala ahon ngere ti gbâ ti anzêrë.”—Matthieu 10:29, 31.

Tënë so adisciple ti Jésus ayeke fa ande ayeke sara si yâ ti asewa akangbi, ambeni apeut ti yeda nga ambeni apeut ti ke. Jésus afa ndani, lo tene: “Ala pensé pëpe so mbi ga ti zia siriri na ndo ti sese.” Ni la, a hunda ti tene zo aduti na bê si lo yeda na tâ tënë. Jésus atene: “Zo so aye babâ wala mama ti lo mingi ahon mbi, lo lingbi ti duti disciple ti mbi ape. Nga zo so aye molenge ti lo ti koli wala ti wali mingi ahon mbi, lo lingbi ti duti disciple ti mbi ape.”—Matthieu 10:34, 37.

Me, ambeni zo apeut ti yamba ande adisciple ni nzoni. Jésus atene: “Zo so amû gi kopo oko ti ngu ti dê na oko ti akete zo so, ti tene lo nyon, ngbanga ti so lo yeke mbeni disciple, ti tâ tënë ni, lo yeke girisa futa ti lo ape.”—Matthieu 10:42.

Na peko ti so Jésus amû na ala anzoni wango, agbotongo mê nga na atënë ti dengo bê, abazengele ni ague “na yâ ti akete kodro oko oko ti sese ni, ala yeke fa nzoni tënë nga ala yeke sava kobela ti azo na ndo kue.”—Luc 9:6.