Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Jésus: Lege ni, tâ tënë na fini

 CHAPITRE 34

Jésus asoro abazengele bale-oko na use

Jésus asoro abazengele bale-oko na use

MARC 3:13-19 LUC 6:12-16

  • ABAZENGELE BALE-OKO NA USE

A sara fadeso ngu oko na ndambo tongaso awe la si Jean Baptiste afa Jésus na azo tongana Kete taba ti Nzapa. Tongana Jésus akomanse lani kua ti fango tënë, ambeni koli ayeda na bê ti ala kue ti ga adisciple ti lo. A yeke azo tongana André, Simon Pierre, Jean, peut-être Jacques (ita ti Jean), Philippe nga na Barthélemy (so a iri nga lo Nathanaël). Tongana ngoi ayeke hon, ambeni zo nga nde amû peko ti Jésus.—Jean 1:45-47.

Fadeso, Jésus aye ti soro abazengele ti lo. A yeke azo so ayeke duti ande nduru na lo mingi, nga so ayeke wara ande mbeni fango ye so ayeke nde mingi. Me kozo ti tene lo soro ala, Jésus ague na ndo ti mbeni hoto, peut-être so ayo mingi ape na Kota ngu ti Galilée, nduru na Capernaüm. Kâ, lo sambela na bï ni kue, ti hunda ndara ti Nzapa nga na tufa ti lo. Na ndade ni, lo iri adisciple ti lo na lo soro bale-oko na use na popo ti ala ti ga abazengele ti lo.

Jésus asoro ala omene so a fa fade iri ti ala na nduzu ge so, nga lo soro Matthieu, koli so lo iri lani lo na place ti rongo nginza ti impôt. Tanga ti ala oku so lo soro ala ayeke: Judas (so a iri nga lo Thaddée nga so ayeke “molenge ti Jacques”), Simon so ayeke zo ti Canaan, Thomas, Jacques molenge ti Alphée nga na Judas Iscariote.—Matthieu 10:2-4; Luc 6:16.

Fadeso, ala bale-oko na use so ayeke gue na ando kue so Jésus ague dä, na Jésus ahinga ala kue nzoni mingi. Mingi na popo ti ala ayeke afami ti lo. Jacques na ita ti lo Jean ayeke atâ fami ti Jésus. Nga tongana ti so ambeni zo apensé, si tongana Alphée ayeke ita ti Joseph, babâ so abata lani Jésus, tongaso Jacques, so ayeke molenge ti Alphée, ayeke nga mbeni fami ti Jésus.

Me Jésus abata iri ti abazengele ti lo so kue. Ka mo, mo lingbi bata iri ti ala na li? Mbeni ye so apeut ti aidé mo, a yeke ti hinga so aSimon ayeke use, aJacques ayeke use nga aJudas ayeke use. Simon (wala Pierre) ayeke ita ti André, nga Jacques (molenge ti Zébédée) ayeke ita ti Jean. Bâ ye so apeut ti aidé mo ti bata iri ti abazengele miombe la. Atanga ni osio ayeke Matthieu, so ayeke zo ti rongo nginza ti impôt, Thomas zo so mbeni lâ lo yeke dë kite ande na ndo ti Jésus, Nathanaël, lo so Jésus awara lani lo na gbe ti mbeni keke, nga Philippe so ayeke kamarade ti Nathanaël.

Bale-oko na oko na popo ti abazengele ni alondo na Galilée, kodro so Jésus akono dä. Nathanaël ayeke zo ti Cana. Philippe, Pierre na André ayeke azo ti Bethsaïda. Jésus awara lani Pierre na André na ngoi so ala sara kodro na Capernaüm, ndo so amanke Matthieu alango dä. Jacques na Jean kue adoit ti lango na kodro ni so wala nduru na Capernaüm ni, na ala yeke sara kua ti gingo susu na ndo ni so. Judas Iscariote, so na pekoni a yeke kä ande Jésus, adoit ti duti oko bazengele so ayeke zo ti Judée.