Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Jésus: Lege ni, tâ tënë na fini

 CHAPITRE 46

Lo wara sava gi na ndungo bongo ti Jésus

Lo wara sava gi na ndungo bongo ti Jésus

MATTHIEU 9:18-22 MARC 5:21-34 LUC 8:40-48

  • MBENI WALI AWARA SAVA NA NGOI SO LO NDU BONGO TI JÉSUS

Jésus alondo fadeso na Décapole, lo kiri na nord-ouest ti yanga ti Kota ngu ti Galilée. Sango ti kiringo ti lo atï na mê ti aJuif so ayeke na ndo ni so. Peut-être, mingi ti azo amä so, ade ti ninga ape, Jésus asara si mbeni kota pupu akaï na lê ti kota ngu. Nga ambeni amä so lo tomba asioni yingo na yâ ti ambeni koli. Ndali ni la si “gbâ ti azo”, âmanke na Capernaüm, abungbi na tere ti kota ngu ni ti ku gango ti Jésus (Marc 5:21). Tongana Jésus asi na yanga ti ngu ni, azo ni ayeke ku lani kungo ti bâ ye so lo yeke sara ande.

Mbeni zo so nga na milieu ti ala ayeke ku lani Jésus kungo ayeke Jaïrus. Jaïrus ayeke mbeni mokonzi ti synagogue, peut-être ti so ayeke na Capernaüm. Lo ga lo tï na sese na devant ti Jésus na lo voro yanga na lo na peko ti tere, lo tene: “Tere ti kete molenge ti mbi ti wali ason ngangu mingi. Pardon, ga mo zia maboko ti mo na ndo ti lo ti tene tere ti lo akaï si lo ngbâ na fini.” (Marc 5:23). Nyen la Jésus ayeke sara ande ti kiri tënë na Jaïrus so ahunda na lo ti sava oko molenge ti lo so lo dü, so ayeke gi na ngu 12 tongaso na so lo ye lo mingi?—Luc 8:42.

Tongana ala yeke tambela ti gue na da ti Jaïrus, Jésus atingbi na mbeni ye so akiri asara lo mawa. Mingi ti azo so ayeke na tere ti Jésus na guengo ni ayeke na ngia mingi, ndali ti so ala pensé so peut-être ala yeke gue ti bâ ande Jésus na sarango mbeni miracle. Me, na popo ti ala mbeni wali ayeke dä so apensé na ndo ti ngangu kobela ti lo wani.

Teti angu 12 tongaso, wali Juif so abâ lani pasi mingi ndali ti mênë ayeke ga na tere ti lo mingi. Lo gue na adocteur nde nde, na nginza ahunzi kue na tere ti lo na vongo aye so ala hunda na lo ti vo. Me, kue gbä kobela ni akaï ape. Nde na so, kobela ti lo ni ‘angbâ gi ti gue guengo na li ni.’—Marc 5:26.

Peut-être mo kue mo bâ tongana nyen la kobela ni so awoko lo nga aga mbeni ye so ayeke sara lo kamene. Mingi ni, zo ayeke tene ka tënë ti kobela ni so na lê ti azo ape. Na ndo ni, na gbe ti Ndia ti Moïse, tongana mênë aga na mbeni wali, a yeke bâ wali ni tongana mbeni zo so aga sioni. Zo kue so andu lo wala andu bongo ti lo so mênë ni ayeke na tere ni, a lingbi zo ni so asukula ngu me nga lo yeke ga sioni juska na lakui.—Lévitique 15:25-27.

Wali ni so ‘amä sango ti Jésus’, ni la fadeso lo yeke gi peko ti lo. Ndali ti so lo ga sioni, lo linda na milieu ti azo sân ti tene azo ni ahinga, na lo yeke tene na bê ti lo, lo tene: “Tongana mbi ndu gi yanga ti bongo ti lo, mbi yeke sava.” Gi na ngoi so lo ndu yanga ti bongo ti Jésus, lo ngbâ lo hinga so mênë so ayeke yuru na tere ti lo akaï. Lo hinga so “ngangu kobela so ayeke na tere ti lo so akaï awe.”—Marc 5:27-29.

Jésus angbâ atene: “Zo wa la andu mbi so zo wa?” Mo pensé so bê ti wali ni so adoit ti duti lani tongana nyen tongana lo mä tënë ni so? Pierre atene mbeni tënë ti fa so Jésus adoit fade ti tene tënë tongaso ape. Lo tene: “Gbâ ti azo angoro mo na ala yeke pete mo mbage na mbage.” Ka ndali ti nyen la Jésus ahunda ndo tongaso? Jésus lo wani lo fa raison ni, lo tene: “Mbeni zo andu mbi; mbi hinga ni, ndali ti so mbeni ngangu asigi na yâ ti tere ti mbi.”—Luc 8:45, 46.

Tongana lo bâ so Jésus ahinga ye so lo londo ti sara so, wali ni atï na sese na devant ti Jésus, na tere ti lo ayeke dö na mbeto. Na lê ti azo kue, lo sara tënë ti kobela ti lo ni, na lo tene so ni londo ti wara sava gi fafadeso. Na nzoni bê, Jésus ade bê ti lo atene: “Molenge ti mbi, mabe ti mo asava mo awe. Mo gue na siriri, na zia mo duti na nzoni seni na peko ti ngangu kobela ti mo so.”—Marc 5:34.

A yeke polele so, Lo so Nzapa asoro lo ti komande dunia ayeke biani mbeni zo so ayeke bâ mawa ti azo nga so ayeke sara nzoni bê na azo. Lo yeke bâ gi mawa ti azo ape, me lo yeke nga na ngangu ti aidé ala!