Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Jésus: Lege ni, tâ tënë na fini

 CHAPITRE 40

Mbeni tapande na ndo ti tënë ti pardon

Mbeni tapande na ndo ti tënë ti pardon

LUC 7:36-50

  • MBENI WALI SO AYEKE WASIOKPARI ATUKU MAFUTA NA GERE TI JÉSUS

  • A HAKA PARDON NA ZINGO BON NA LI TI MBENI ZO

Ndali ti so bê ti ala ayeke nde nde, azo ayeke sara ye lani nde nde na gbele aye so Jésus atene na lo sara. A bâ ni polele na ngoi so Jésus ague na yâ ti mbeni da na Galilée. Mbeni Farizien so iri ti lo ayeke Simon atisa Jésus ti ga ti te ye na da ti lo. Peut-être lo ye lani ti bâ mbilimbili zo so ayeke sara amiracle so. Me, teti so Jésus abâ tisango ndo ni so tongana mbeni lege so azi na lo ti fa tënë, lo yeda, tongana ti so lo yeda lani na tisango ndo ti gue ti te ye legeoko na azo ti rongo nginza ti impôt nga na awasiokpari.

Me, a yamba Jésus tongana ti so a yeke yamba lani na agene ape. Poussière ayeke mingi na ando ti lege na Palestine. Ni la, na peko ti tambela, gere ti zo ayeke chauffé nga ayeke mû saleté. Tongaso, mingi na ngoi ni kâ, tongana gene aga, a yeke sukula ka gere ti lo na dede ngu. Me a sara ni na Jésus ape. Même azo ni asu ngbangba ti lo ape, tongana ti so a yeke sara ka ni ti yamba na agene. Mbeni ye ni ayeke tukungo mafuta na li ti gene ni, ti fa nzoni bê so ala yeke na ni na mbage ti lo. So kue a sara nga ni na Jésus ape. A yamba tâ lo nzoni la?

Fadeso, a komanse ti ga na kobe na agene so ayeke na tere ti table ti tengo ye ni. Tongana azo ayeke te ye, mbeni wali, so a tisa nga lo ape, alï na yâ ti da ni. Lo yeke mbeni zo “so azo ahinga lo na yâ ti gbata ni tongana wasiokpari”. (Luc 7:37). Ti tâ tënë ni, e kue e yeke awasiokpari. Me ti wali ni so, âmanke lo yeke sara ka ye ti kirikiri mingi, peut-être lo yeke lani mbeni wali-ndumba. Âmanke lo mä ambeni fango ye ti Jésus awe, na tapande, tisango ndo so lo mû na azo so kungba ane ala ti ga na mbage ti lo, si ala wara dengo bê (Matthieu 11:28, 29). Peut-être a yeke atënë so Jésus atene nga na aye so lo sara la apusu wali so ti gi ti ga na mbage ti Jésus.

Lo ga na tere ti table ni na mbage ti peko ti Jésus na lo kuku na tere ti gere ti lo, lo komanse ti toto. Angu ti lê ti lo atï na ndo ti gere ti Jésus na lo essuyé ni na kuä ti li ti lo. Lo embrassé gere ti Jésus na lo tuku mafuta so lo ga na ni na ndo ni. Bê ti Simon ason tongana lo bâ ye ni so. Lo yeke tene na yâ ti bê ti lo, lo tene: “Tongana koli so ayeke prophète, ka lo yeke hinga zo so ayeke ndu lo so, lo yeke hinga so wali so ayeke wasiokpari.”—Luc 7:39.

Me teti so Jésus ahinga ye so lo yeke pensé so, lo tene na Simon ni, lo tene: “Simon, mbi yeke na mbeni tënë ti tene na mo.” Na Simon angbâ atene: “Maître, tene tënë ni!” Jésus angbâ atene: “Bon ti mbeni zo ayeke na li ti akoli use. Bon ti oko ayeke denier 500, me ti mbeni ayeke denier 50. Tongana ala yeke na ye ti futa na ni ape, na nzoni bê, lo zi bon ni na li ti ala use kue. Tongaso, na popo ti ala use so, zo wa la ayeke ye wa ti bon ni mingi?” Peut-être, Simon atene nga gi tongaso atene: “Mbi pensé a yeke lo so bon ti lo ni ayeke mingi si wa ti bon ni azi ni so.”—Luc 7:40-43.

Jésus ayeda. Na pekoni, Jésus abâ ndo na mbage ti wali ni na lo tene na Simon, lo tene: “Mo bâ wali so? Mbi lï na da ti mo, me mo mû na mbi ngu ti sukula na gere ti mbi ape. Me wali so amouillé gere ti mbi na ngu ti lê ti lo, na lo essuyé ni na kuä ti li ti lo. Mo su ngbangba ti mbi ape. Me wali so, ngbene ye so mbi lï na da so, lo zia pëpe ti embrassé gere ti mbi. Mo tuku mafuta na li ti mbi ape, me wali so atuku mafuta so afun pendere na gere ti mbi.” Jésus abâ so wali ni asara ye so afa biani so lo ye ti changé asioni sarango ye ti lo. Ni la, Jésus atene na nda ni lo tene: “Mbi tene na mo, atâa so siokpari ti lo ayeke mingi, a pardonné ni kue awe ngbanga ti so lo ye zo mingi. Me zo so a pardonné siokpari ti lo kue ape, me gi kete, lo ye zo mingi ape.”—Luc 7:44-47.

Jésus ayeke kanga lê na ndo ti sarango ye ti kirikiri la ape. Nde na so, lo yeke fa nzoni bê na mbage ti azo so, na mbeni ngoi, asara akota siokpari, me so na pekoni ala fa so ala ye ti changé na ti ga ti wara dengo bê na mbage ti Christ. Wali ni adoit ti wara dengo bê lani na ngoi so Jésus atene na lo, a tene: “A pardonné siokpari ti mo awe . . . Mabe ti mo asö mo awe. Mo gue na siriri.”—Luc 7:48, 50.