Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Jésus: Lege ni, tâ tënë na fini

 CHAPITRE 52

Lo mû kobe na gbâ ti azo na lege ti kete mapa na susu

Lo mû kobe na gbâ ti azo na lege ti kete mapa na susu

MATTHIEU 14:13-21 MARC 6:30-44 LUC 9:10-17 JEAN 6:1-13

  • JÉSUS AMÛ KOBE NA AKOLI 5 000

Tere ti abazengele ni anzere lani mingi tongana ala gue ala fa tënë na yâ ti Galilée kue. Ala fa na Jésus peko ti “aye kue so ala sara nga aye kue so ala fa na azo.” Me, ala fatigué lani na pekoni, na ala wara nga ngoi ti te ye ape ndali ti so azo ayeke ga na ayeke gue na peko ti tere. Tongaso, Jésus atene na ala atene: “Ala ga ala duti na mbeni ndo so zo ayeke dä ape na ala wu tere ti ala kete.”—Marc 6:30, 31.

Jésus na abazengele ni amû mbeni ngö, peut-être nduru na Capernaüm, na ala gue na mbeni place so ayeke nduru na est ti Ngu ti Jourdain, na mbage ti Bethsaïda. Me, gbâ ti azo abâ ala na hongo ni nga ambeni amä tënë ni. Ala mû loro na yanga ti ngu ni juska na ndo ni kâ, na ala si kozo na ngö ni.

Tongana Jésus adescend na yâ ti ngö ni, lo bâ azo ni, na mawa asara lo ndali ti so azo ni ayeke tongana ataba so ayeke na berger ape. Tongaso, lo komanse “ti fa aye mingi na ala” na ndo ti Royaume (Marc 6:34). Lo sava nga “ala so ayeke na bezoin ti tene a sava ala.” (Luc 9:11). Tongana l’heure ahon, adisciple ti lo atene na lo atene: “Ndo ni ge ayeke yâ ti benyama na l’heure ahon mingi awe. Tene na azo ni ti gue, tongaso si ala gue na yâ ti akete kodro, ala vo ye ala te.”—Matthieu 14:15.

Jésus akiri tënë na adisciple ni, lo tene: “Azo ni ayeke na bezoin ti gue ape; ala la amû ye ti tengo ni na azo ni.” (Matthieu 14:16). Atâa so Jésus ahinga so lo yeke gue ti sara mbeni ye fafadeso, lo tara Philippe lo tene: “E yeke vo ande mapa na ndo wa ti mû na azo so ti tene ala te?” Lo hunda Philippe tongaso ndali ti so Philippe ayeke zo ti Bethsaïda so ayo na ndo ni so ape. Me, ti vo mapa la ayeke leke kpale ni ape. Gi wungo ti akoli ayeke 5 000 tongaso awe, na tongana a zia wungo ti awali na amolenge na ndo ni, wungo ti azo ni kue apeut ti ga fani use. Ndali ni la Philippe atene: “Même mapa ti denier ngbangbo use ayeke lingbi ala ape, ti tene zo oko oko awara kete ti te.”—Jean 6:5-7.

Peut-être ti fa na Jésus so a yeke ngangu ti tene a wara kobe ndali ti azo ni so kue, André atene: “Bâ, mbeni kete molenge-koli ayeke ge, lo yeke na mapa oku ti orge nga na kete susu use. Me so ayeke sara nyen na gbâ ti azo so?”—Jean 6:9.

A yeke lani na nze ti mars wala avril la, kete kozoni na lango ti Matanga ti Pâque ti ngu 32 ti ngoi ti e, na apere ayeke lani na ndo ti hoto ni. Jésus atene na adisciple ti lo ti tene na azo ni ti bungbi tere ti ala na groupe; ambeni abungbi 50 na ambeni abungbi 100. Lo ngbâ lo mû amapa oku na asusu use ni, na lo kiri singila na Nzapa. Na pekoni, lo fâ yâ ti amapa ni nga lo kangbi yâ ti asusu ni. Lo mû ni na adisciple ti lo ti tene ala kangbi ni na azo ni. Tâ gi tongana ye ti bango li, azo kue ate ye, na yâ ti ala asi!

Na pekoni, Jésus atene na adisciple ti lo, lo tene: “Ala ro tanga ti anduru ni so angbâ, tongaso si ye oko angbâ senge senge ape.” (Jean 6:12). Ala ro atanga ni so angbâ, na asi yâ ti asakpa 12!