Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Jésus: Lege ni, tâ tënë na fini

 CHAPITRE 44

Jésus akaï kota pupu

Jésus akaï kota pupu

MATTHIEU 8:18, 23-27 MARC 4:35–41 LUC 8:22-25

  • JÉSUS AKAÏ KOTA PUPU NA LÊ TI KOTA NGU TI GALILÉE

Na yâ ti lango ni, Jésus asara gbâ ti aye mingi na lo fatigué. Tongana ndo ayeke gue ti vuko, lo tene na adisciple ti lo, lo tene: “E fâ ngu e gue na mbage ni kâ,” ti gue na Capernaüm.—Marc 4:35.

Na mbage ti est ti yanga ti Kota ngu ti Galilée, a yeke wara kodro ti Gérasa. A hinga nga kodro ni so na iri ti Décapole. Azo ayeke sara ye tongana ti aGrec na yâ ti gbata ni so, nga mingi ti aJuif ayeke lango na yâ ti gbata ni so.

So Jésus ahon so, azo ahinga. Ambeni ngö ayeke fâ nga lê ti ngu na oko ngoi ni so (Marc 4:36). Me lê ti ngu ni ayo nga mingi ape. Kota ngu ti Galilée ayeke mbeni ngu so ingo ayeke dä ape, na a yo kilomètre 21 tongaso nga a kono kilomètre 12, me ngu ni alï kamême.

Atâa so Jésus ayeke nzoni-kue, lo kue lo fatigué na peko ti so lo fa lani tënë mingi. Ni la na peko ti so ngö ni akomanse ti hon, lo lango na mbage ti ngbonda ti ngö ni lo zia li ti lo na ndo ti mbeni coussin, na lango ahon na lo.

Mingi ti abazengele lani ahinga ti kpe na ngö nzoni, me fango lê ti ngu ti so ni so ayeke duti ande kete ye ape. Ahoto la angoro ala nga lê ti Kota ngu ti Galilée ayeke chauffé ka mingi. Na ambeni ngoi ka, pupu ti dê so alondo na yâ ti hoto ni ayeke tingbi na chauffengo pupu so ayeke na lê ti ngu ni ti ga mbeni kota sioni pupu. A yeke ye so asi la. Mo ye ti bâ, amapo ti ngu ni akomanse ti pika tere ti ngö ni. Ngu akomanse “ti lï na yâ ti ngö ni na ala yeke na yâ ti kpale.” (Luc 8:23). Me so kue, Jésus angbâ gi ti lango!

Teti so ala hinga ti kpe na ngö kozo, abazengele ni atara ti sara ye so ala peut ti sara ti tene ngö ni atuku ape. Me ti so ni so, ye ni ahon ngangu ti ala. Mbeto ti kuâ agbu ala, na ala gue ala zingo Jésus, ala tene: “Seigneur, sö e! E yeke kui!” (Matthieu 8:25). Ti adisciple ni, mbeto asara ala mingi ndali ti so ala tene ti ala atene ngö ni atuku awe!

Tongana lo zingo, Jésus atene na abazengele ni, lo tene: “Ala, azo ti kete mabe, ala sara mbeto tongaso ngbanga ti nyen?” (Matthieu 8:26). Na pekoni, Jésus asuku na pupu ti Kota ngu ni, lo tene: “Kaï! Duti kpô!” (Marc 4:39). Kota pupu ni akaï na lê ti ngu ni adë. (Na ngoi so Marc na Luc ayeke sû peko ti mbaï so, ala luti mingi na ndo ti ngoi so Jésus akaï kota pupu so, na a yeke na pekoni awe la si ala sara tënë ti mabe so amanke adisciple ni.)

Tara ti bâ lê ti adisciple ni. Ala londo ti bâ tongana nyen la mbeni kota pupu, so asara fade na lê ti kota ngu ni, akaï gi tongaso. Mbeni kota mbeto agbu ala. Ala tene na popo ti ala, ala tene: “So zo wa la tongaso, so même pupu na kota ngu kue amä yanga ti lo so?” Na pekoni, ala wara lege ti si na mbage ti Kota ngu ni sân ti tene mbeni ye ti sioni awara ala (Marc 4:41–5:1). Peut-être ambeni ngö so ayeke fade na lê ti ngu ni awara lege ti kiri na mbage ti ouest ti yanga ti ngu ni.

A nzere na e ti bâ so Molenge ti Nzapa ayeke na ngangu na ndo ti aye so angoro e. Tongana Royaume ti lo akomanse ti komande ande na ndo ti sese ge, azo kue ayeke duti ande na siriri, na aye tongana yengingo ti sese, angu so asuku si amû ndo nga na apupu so ayeke buba aye ayeke duti ande dä encore ape.

TI HINGA AMBENI TËNË

Royaume ti Nzapa ayeke nyen?

Zo wa la ayeke Gbia ti Royaume ti Nzapa ni? Royaume ni ayeke sara ande nyen?