Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Jésus: Lege ni, tâ tënë na fini

 CHAPITRE 51

A fâ mbeni zo na ngoi ti matanga ti dungo zo

A fâ mbeni zo na ngoi ti matanga ti dungo zo

MATTHIEU 14:1-12 MARC 6:14-29 LUC 9:7-9

  • HÉRODE AMÛ YANGA TI TENE A DË GO TI JEAN BAPTISTE

Na ngoi so abazengele angbâ ti ala ti fa tënë na Galilée, zo so lani aleke lege na Jésus ayeke na mara ti liberté ti ala ni so ape. A sara nduru na ngu use awe la Jean Baptiste angbâ na da ti kanga.

Jean Baptiste atene lani vîi na Hérode Antipas so ayeke na lege ni ape ti tene lo mû Hérodiade ti ga wali ti lo. Hérodiade ayeke wali ti Philippe, na Philippe ni ayeke ita ti lo Hérode ni. Hérode asara divorce na kozo wali ti lo ti mû Hérodiade. Na gbe ti Ndia ti Moïse, so Hérode atene ni yeda na ni, mariage so ayeke na lege ni ape nga ayeke gingo mbeni wali nde la. Peut-être gi tënë ti yanga ti Hérodiade ngbii, Hérode ague abi Jean na da ti kanga ndali ni.

Hérode ahinga ye so lo peut ti sara na Jean ape ndali ti so azo ayeke bâ “Jean tongana mbeni prophète.” (Matthieu 14:5). Me so a yeke kpale ndali ti Hérodiade ape. Lo yeke “bata lani Jean na bê,” na même lo yeke gi lani gingo ti fâ lo (Marc 6:19). Na nda ni, lo wara lege ti sara ni.

Kete kozoni na matanga ti Pâque ti ngu 33, Hérode asara matanga ti lango ti dungo lo. Lo tisa akota zo ti yangbo ti lo, amokonzi ti turugu nga na akota zo ti kodro ti Galilée. Na ngoi ti matanga ni, Salomé, molenge-wali so Hérodiade adü na Philippe, asigi na lo komanse ti dodo na lê ti agene so aga. Tere ti azo kue anzere ti bâ lo na dongo dodo ni so.

Teti so molenge ti wali ti lo azia ngia na bê ti lo mingi, Hérode angbâ atene na lo: “Mo hunda na mbi ye so mo ye, mbi yeke mû ni na mo.” Lo deba même yanga ti lo, lo tene: “Ye kue so mo hunda na mbi, mbi yeke mû na mo, même juska ndambo ti royaume ti mbi.” Kozo si lo kiri tënë, Salomé ague na lo tene na mama ti lo, lo tene: “Mo ye mbi hunda nyen?”—Marc 6:22-24.

Tâ ye so Hérodiade ayeke ku depuis kungo so la! Na lê ni lê ni lo tene: “Hunda li ti Jean zo ti batizengo azo.” Droit, Salomé ague na lo tene na Hérode atene: “Mbi ye mo mû na mbi fafadeso li ti Jean Baptiste na yâ ti mbeni plat.”—Marc 6:24, 25.

Tënë ni so asara Hérode nzoni ape, me agene ti lo kue amä fade dengo bä ti yanga so lo sara na Salomé awe. Lo ye ti ke tënë ni ape, même si a hunda na lo ti fâ mbeni zo so asara nga ye oko ape. Tongaso, Hérode atokua mbeni garde ti tene lo gue lo ga na li ti Jean. Kete na pekoni, garde ni aga na li ti Jean na yâ ti mbeni plat. Lo mû na Salomé, na Salomé ague na ni na mama ti lo.

Tongana adisciple ti Jean amä tënë ni, ala ga amû kuâ ni na ala gue alu ni. Na pekoni, ala gue asara tënë ni na Jésus.

Mbeni ngoi na pekoni, mbeto agbu Hérode ngbanga ti so lo mä so Jésus ayeke sava azo na lo yeke tomba asioni yingo na yâ ti ambeni zo. Lo yeke hunda tere ti lo wala zo ni so, so ti tene Jésus, ayeke Jean Baptiste la “a zingo . . . na kuâ awe” so? (Luc 9:7). Tongaso, Hérode Antipas ayeke gi lani lege ti bâ Jésus, pëpe ti mä afango ye ti lo, me lo yeke gi lani ti bâ wala biani a yeke Jean Baptiste la wala a yeke lo la ape.

TI HINGA AMBENI TËNË