Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Jésus: Lege ni, tâ tënë na fini

 CHAPITRE 11

Jean Baptiste aleke lege

Jean Baptiste aleke lege

MATTHIEU 3:1-12 MARC 1:1-8 LUC 3:1-18 JEAN 1:6-8, 15-28

  • JEAN AFA TËNË NGA LO BATIZE AZO

  • GBÂ TI AZO AWARA BATÊME, ME AMBENI APE

Ngu 17 ahon fadeso awe, na peko ti so Jésus ahunda lani tënë na awafango ye na temple, na ngoi so lo yeke lani gi na ngu 12. E yeke fadeso na popo ti nze ti mars na avril ti ngu 29 ti ngoi ti e. Gbâ ti azo ayeke sara tënë mingi na ndo ti Jean, so ayeke fami ti Jésus. Jean ayeke fa lani tënë na yâ ti akodro kue so ayeke na mbage ti est ti Ngu ti Jourdain.

Na bango Jean tongaso nga na fason ti sarango tënë ti lo, kite ayeke dä ape so lo yeke nde mingi. Lo yeke yü lani mbeni bongo so a sara ni na kuä ti tere ti chameau na lo kanga yâ ti lo na mbeni ceinture so a sara ni na poro ti tere ti nyama. Agbadora nga na mafuta ti otoro la ayeke kobe ti lo. Tënë ti nyen la lo yeke fa lani? Lo yeke tene: “Azo, ala changé bê ti ala, ngbanga ti so Royaume ti yayu aga nduru awe.”—Matthieu 3:2.

Atënë ti Jean apika lani bê ti azo so aga ti mä lo. Gbâ ti ala abâ so a lingbi ala changé bê ti ala, so ti tene ti changé bango ndo ti ala nga na lege ti ala, nga ti kiri ti sara encore pëpe asioni ye so ala yeke sara ândö. Azo so aga lani ti mä Jean ayeke azo ti “Jérusalem, ti akodro nde nde kue ti Judée nga na ti akodro kue so ayeke na tere ti Ngu ti Jourdain”. (Matthieu 3:5). Gbâ ti azo so amä lani Jean achangé bê ti ala. Ti batize ala, lo yôro ala kue na yâ ti Ngu ti Jourdain. Ngbanga ti nyen?

Jean abatize lani azo ti fa so azo ni achangé bê ti ala ndali ti asioni sarango ye ti ala so ague nde na Mbele ti Ndia so Nzapa amû lani na ala (Kusala 19:4). Me, a yeke ala kue la lo batize ape. Na ngoi so ambeni akota zo ti aJuif, so ayeke aFarizien nga na aSadducéen, aga na mbage ti lo, Jean airi ala lo tene ala yeke “amolenge ti asioni ngbo”. Lo kiri lo tene: “Ala sara aye so afa so ala changé bê ti ala. Zia ala tene na bê ti ala pëpe: ‘Babâ ti e ayeke Abraham,’ ndali ti so mbi tene na ala so Nzapa alingbi ti mû atênë so ti sara si aga amolenge ti Abraham. Dö ayeke na gere ti akeke awe. Tongaso keke oko oko kue so alë nzoni lengo pëpe, a yeke dë ni na sese na a bi ni na wâ.”—Matthieu 3:7-10.

Teti so azo ayeke mä lani Jean mingi, nga lo yeke fa angangu tënë na lo yeke batize azo mingi, ambeni zo atokua aprêtre na aLévite ti ga ti hunda lo atene: “Mo yeke zo wa?”

Jean atene na ala: “Mbi yeke ti mbi Christ ape.”

Ala ngbâ atene: “Ka mo yeke zo wa? Mo yeke Élie?”

Lo kiri tënë na ala, lo tene: “Mbi yeke Élie ape.”

Ala hunda lo atene: “Mo yeke Prophète so a tene lo yeke ga so?” Ala hunda tongaso ngbanga ti so ala ye ti hinga wala lo la lo yeke kota Prophète so Moïse asara lani tënë ti lo.—Deutéronome 18:15, 18.

Lo tene na ala, lo tene: “Ên-ën!”

Me so kue gbä, ala kiri ahunda lo atene: “Mo yeke ti mo zo wa? si e lingbi ti kiri tënë na azo so atokua e. Mo tene nyen na ndo ti mo wani?” Jean angbâ atene na ala atene: “Mbi yeke go ti mbeni zo so ayeke dekongo na yâ ti benyama, atene: ‘Ala sara si lege ti Jéhovah aduti droit,’ gi tongana ti so prophète Ésaïe atene lani.”—Jean 1:19-23.

Ala kiri ahunda lo atene: “So mo yeke Christ ape, wala Élie ape, wala Prophète ni ape so, ka ngbanga ti nyen si mo yeke batize azo?” Lo kiri tënë na ala, lo tene: “Mbi batize azo na yâ ti ngu. Me, mbeni zo ayeke na popo ti ala so ala hinga lo ape, lo so ayeke ga na peko ti mbi.”—Jean 1:25-27.

Biani, Jean ahinga lani so kua ti lo ayeke ti tene lo mû maboko na azo ti wara mbeni nzoni bango ndo so ayeke sara si ala yeke yeda ande na Messie ni, so ayeke ga ande Gbia. Na ndo ti Messie ni, Jean atene: “Lo so ayeke ga na peko ti mbi ayeke ngangu ahon mbi, mbi kpa pëpe ti zi poro na gere ti lo.” (Matthieu 3:11). Jean atene même atene: “Lo so ayeke ga na peko ti mbi ahon kozo na mbi, ngbanga ti so lo bâ gigi kozo ti mbi.”—Jean 1:15.

Ni la, tënë ti Jean so lo tene, “Azo, ala changé bê ti ala, ngbanga ti so Royaume ti yayu aga nduru awe”, atï lani na ngoi ni (Matthieu 3:2). Tënë ti lo ayeke lani tongana mbeni gbotongo mê, ti fa na azo so Jésus Christ, Gbia so Jéhovah atokua lo, aye ti komanse ti sara kua awe.