Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Jésus: Lege ni, tâ tënë na fini

 CHAPITRE 1

Atokua use so alondo na Nzapa

Atokua use so alondo na Nzapa

LUC 1:5-33

  • ANGE GABRIEL AFA KOZONI TËNË TI DUNGO JEAN BAPTISTE

  • LO FA KOZONI NA MARIE TËNË TI DUNGO JÉSUS

E peut ti haka Bible kue tongana mbeni tokua so alondo na Nzapa. A yeke Babâ ti e so ayeke na yayu la atokua ni ti fa lege na e. Me, zia e bâ ambeni kota tokua use so a fa ni, na so a sara angu 2 000 na ndo ni awe. Zo so aga na atokua ni ayeke ange Gabriel so “ayeke luti na gbele Nzapa.” (Luc 1:19). Lo ga na akota tokua so na ngoi wa nga tongana nyen?

Ye ni so asi na ngu 3 kozo ti Christ. Gabriel atene kozo tokua ni so na ndo wa? A yeke na yâ ti akete Hoto ti Judée, so peut-être ayo mingi ape na Jérusalem. Mbeni prêtre ti Jéhovah so iri ti lo ayeke Zacharie alango lani na ndo ni so. Lo na wali ti lo Élisabeth aga mbakoro awe, na ala yeke na molenge ape. A yeke fadeso tour ti Zacharie ti gue ti sara kua na temple ti Nzapa na Jérusalem. Na ngoi so Zacharie ayeke na yâ ti temple, ange Gabriel asi gi gbagburu tongaso na tere ti gbalaka so ayeke zö dukane dä.

Mbeto agbu Zacharie. Me ange ni adë bê ti lo atene: “Sara mbeto ape, Zacharie, ngbanga ti so sambela ti vorongo tere so mo tene na Nzapa so, lo mä ni awe. Wali ti mo Élisabeth ayeke dü ande na mo mbeni molenge ti koli, na a lingbi mo zia iri ti lo Jean.” Gabriel atene nga na lo so Jean “ayeke ga ande kota na lê ti Jéhovah” na lo yeke “mû na Jéhovah azo so a leke ala awe.”—Luc 1:13-17.

Na lê ti Zacharie, tënë ni akpa ye so ayeke si ape. Ngbanga ti nyen? Ngbanga ti so lo na wali ti lo, Élisabeth, kue aga mbakoro awe. Me Gabriel atene na lo atene: “Yanga ti mo ayeke kanga, na mo lingbi ande ti sara tënë pëpe juska na lango so aye so ayeke si, ndali ti so mo dë kite na atënë ti mbi.”—Luc 1:20.

Na oko ngoi ni so, azo so ayeke na gigi ti temple ni akomanse ti hunda tere ti ala, ngbanga ti so Zacharie aninga kâ mingi. Na nda ni, Zacharie asigi, me lo peut ti sara tënë ape, lo yeke sara gi asigne. A yeke polele so lo bâ mbeni ye ti ndima na yâ ti temple ni kâ.

Na peko ti so Zacharie ahunzi kua ti lo na temple ni awe, lo kiri na yanga-da ti lo. Me gi hio na pekoni, Élisabeth amû ngo. Teti nze oku tongaso, Élisabeth angbâ gi na yanga-da, yongoro na azo kue, na lo yeke ku lango ti dungo ni.

Na pekoni, Gabriel akiri aga ti fani use ni. Me ti so ni so, lo si na zo wa? Lo si na mbeni wali so iri ti lo ayeke Marie. Marie ade ti mû koli ape na lo yeke lango na Nazareth, mbeni gbata ti Galilée so ayeke na nord ti Jérusalem. Tënë ti nyen la ange ni atene na Marie? Lo tene na lo: “Mo nzere na lê ti Nzapa.” Na lo kiri lo tene: “Mo yeke mû ande ngo, na mo yeke dü molenge ti koli. A lingbi mo zia iri ti lo Jésus. Lo yeke ga ande kota, na a yeke iri lo Molenge ti Lo so ayeke na nduzu na ndo ti aye kue. . . . Lo yeke komande na ndo ti ahale ti Jacob lakue lakue. Nga, Royaume ti lo ayeke hunzi lâ oko ape.”—Luc 1:30-33.

So kota pasa la si ange Gabriel ayeke na ni ti ga na mara ti atokua use so. Na mandango ambeni ye na ndo ti Jean nga na Jésus, e yeke hinga ande ngbanga ti nyen la atokua use so, so alondo na yayu, ayeke kota mingi.