Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Jésus: Lege ni, tâ tënë na fini

 CHAPITRE 7

Azo ti gingo nda ti aye na lege ti atongoro ague ti bâ Jésus

Azo ti gingo nda ti aye na lege ti atongoro ague ti bâ Jésus

MATTHIEU 2:1-12

  • MBENI “TONGORO” AGUE NA ALA NA JÉRUSALEM, NA PEKONI NA NDO SO JÉSUS AYEKE DÄ

Ambeni koli alondo na mbage ti est aga. A yeke azo ti gingo nda ti aye na lege ti atongoro. Ala tene so, tongana ala bâ place so atongoro aluti dä, a yeke mû lege na ala ti fa nda ti aye so ayeke si na yâ ti gigi ti azo (Ésaïe 47:13). Tongana ala ngbâ kâ na kodro ti ala na mbage ti est, ala bâ lani mbeni “tongoro”, na ala mû peko ni teti akilomètre mingi. “Tongoro” ni ague na ala pëpe na Bethléhem me lo gue na ala na Jérusalem.

Tongana ala si na Jérusalem, ala hunda ndo atene: “Gbia ti aJuif so a dü lo so ayeke na ndo wa? Na ngoi so e yeke na mbage ti est, e bâ tongoro ti lo. Ni la, e ga ti kuku na gbe ti lo.”—Matthieu 2:1, 2.

Na ngoi so Gbia Hérode ti Jérusalem amä tënë so, a nzere na lo oko ape. Tongaso, lo iri aprêtre-mokonzi nga na ambeni kota zo ti aJuif, ti hunda na ala ndo so a yeke dü Christ dä. Na sarango kua na Mbeti ti Nzapa, ala kiri tënë na lo atene: “Na Bethléhem.” (Matthieu 2:5; Michée 5:2, FD). Na ndo ti tënë so, Hérode airi azo ti gingo nda ti aye na lege ti atongoro na hondengo ni, na lo tene na ala, lo tene: “Ala gue, ala gi kete molenge ni nzoni. Tongana ala wara lo awe, ala kiri ala sara tënë ni na mbi, si mbi nga kue mbi gue mbi kuku na gbe ti lo.” (Matthieu 2:8). Ti tâ tënë ni, Hérode aye gi ti wara kete molenge ni ti fâ gi lo awe!

Na peko ti so azo ti gingo nda ti aye na lege ti atongoro ni ayeke hon, mbeni ye apassé. “Tongoro” so ala bâ lani kâ na ngoi so ala ngbâ na mbage ti est so, lo la lo yeke ge na devant ti ala so. A yeke senge tongoro la ape! A yeke ge gi ti fa lege na ala la. Akoli ni amû peko ti lo juska na ndo so lo gue lo luti tâ gi na ndo ti da so Joseph na Marie nga na molenge ti ala alango dä!

Na ngoi so ala lï na yâ ti da ni, ala wara Marie na molenge ti lo Jésus. Ala ngbâ akuku na gbe ti Jésus, na ala mû na lo acadeau tongana lor, vuru dukane nga na myrrhe. Na pekoni, tongana ala ye ti kiri ti gue na Hérode, na lege ti mbeni bango li, Nzapa atene na ala ti sara tongaso ape. Tongaso, ala changé amû mbeni lege nde ti kiri na kodro ti ala.

Ti mo, zo wa la atokua “tongoro” so ti fa lege na akoli so? Girisa ape so, “tongoro” ni ague na ala droit ape na Jésus na Bethléhem. Nde na so, lo gue na ala kozoni na Jérusalem, na ndo ti Gbia Hérode, zo so aye ti fâ lani Jésus. Me tongana Nzapa akanga lege fade ape na akoli ni so ti ga ti fa na Hérode place so Jésus ayeke dä, ka Hérode afâ lani Jésus. A yeke polele so a yeke Satan, wato ti Nzapa so aye gi ti fâ Jésus, la asara kua na “tongoro” so ti sara si ye so lo ye apassé.