Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Jésus: Lege ni, tâ tënë na fini

 CHAPITRE 2

A mû nengo na Jésus kozo si a dü lo

A mû nengo na Jésus kozo si a dü lo

LUC 1:34-56

  • MARIE AGUE ABÂ FAMI TI LO ÉLISABETH

Na peko ti so ange Gabriel atene na Marie so fade lo yeke dü ande mbeni molenge-koli, so a yeke zia ande iri ti lo Jésus, na so ayeke komande ande tongana Gbia teti lakue lakue, Marie ahunda lo atene: “Ye so ayeke si ande tongana nyen, so ade mbi bungbi na koli ape so?”—Luc 1:34.

Gabriel akiri tënë na lo atene: “Yingo vulu ayeke ga ande na ndo ti mo, na ngangu ti Lo so ayeke na nduzu na ndo ti aye kue ayeke bata mo tongana gbe ti dê. Ndani la si molenge so mo yeke dü lo ayeke duti ande nzoni-kue, na a yeke iri lo Molenge ti Nzapa.”—Luc 1:35.

Peut-être ti aidé Marie ti yeda na tokua ni so, Gabriel akiri atene: “Fami ti mo Élisabeth nga amû ngo ti molenge ti koli na lâ ti mbakoro ti lo, na lo yeke na yâ ti nze omene ni, lo so a iri lo wali-ngombo. Ye so afa so atënë kue ti yanga ti Nzapa ayeke ga gi tâ tënë.”—Luc 1:36, 37.

Marie ayeda na tënë ti Gabriel ni, tongana ti so kiringo tënë ti lo afa ni. Lo tene: “Bâ, mbi yeke ngbâa ti Jéhovah ti wali! Zia ye ni asi na mbi gi tongana ti so mo tene.”—Luc 1:38.

Na peko ti so Gabriel ahon awe, Marie aleke tere ti lo ti gue ti bâ Élisabeth so lo na koli ti lo Zacharie alango na ndo ti hoto ti Judée so ayeke nduru na Jérusalem. Ti londo na da ti lo na Nazareth ti gue na ndo ni so, a lingbi Marie asara lango ota wala osio na lege.

Na ngoi so Marie asi na da ti Zacharie, lo lï lo bara Élisabeth. Gi na ngoi ni so, Élisabeth asi na yingo vulu ti Nzapa, na lo tene na Marie: “Mo la mo yeke wali so tufa ti Nzapa ayeke na ndo ti lo mingi, nga tufa ti lo ayeke na ndo ti molenge so ayeke na yâ ti mo! So pasa si mbi yeke na ni ti tene mama ti Seigneur ti mbi aga na ndo ti mbi! Na ngoi so mbi mä bara ti mo ni, foroto so ayeke na yâ ti mbi ahuru na ngia.”—Luc 1:42-44.

Na pekoni, ti fa ngia ti bê ti lo, Marie akiri tënë atene: “Âme ti mbi agonda Jéhovah, na mbi lingbi pëpe ti kanga ngia so ayeke na bê ti mbi ndali ti Nzapa, Sauveur ti mbi, ndali ti so lo bi lê ti lo na ndo ti mbi senge ngbâa ti lo. Ti to nda ni laso, azo ti angoi nde nde kue ayeke tene ande so mbi yeke na ngia, ngbanga ti so Lo so ayeke ngangu mingi . . . asara akota ye ndali ti mbi.” Atâa so a yeke kota pasa la Marie awara, lo mû gonda ni kue na Nzapa, lo tene: “Iri ti lo ayeke nzoni-kue . . . Nga, na yâ ti angoi kue so ayeke ga, lo yeke sara nzoni bê na azo so akpe mbeto ti lo.”—Luc 1:46-50.

Na yâ ti atënë ti prophétie so lo tene, Marie angbâ ti mû gonda na Nzapa, lo tene: “Lo sara aye so na ngangu maboko ti lo. Ala so ayeke na bibe ti baba, lo kangbi yâ ti ala kirikiri. Lo kinda azo ti ngangu na ndo ti atrône, na lo yä azo ti mawa na nduzu. Lo mû gbâ ti anzoni ye na azo so nzara asara ala, na lo tomba azo ti mosoro si ala hon maboko senge. Lo ga lo mû maboko na wakua ti lo Israël, ti fa so lo dabe ti lo na zendo so lo mû. Lo mû zendo ti sara nzoni bê na Abraham nga na ahale ti lo lakue lakue, tongana ti so lo sara tënë ni na akotara ti e.”—Luc 1:51-55.

Marie angbâ na tere ti Élisabeth teti anze ota tongaso, ti mû maboko na lo ngbanga ti so a ngbâ na Élisabeth ngoi mingi ape ti tene lo dü. A nzere mingi ti bâ mara ti awali use be-ta-zo tongaso na dutingo place oko na yâ ti mara ti angoi tongaso ti gigi ti ala; ala so Nzapa amû maboko na ala si ala mû ngo so.

Bâ tongana nyen la a mû nengo na Jésus même kozoni si a dü lo. Élisabeth airi lo lani “Seigneur ti mbi”, nga molenge so ayeke na yâ ti lo “ahuru” na ngia na ngoi ti singo ti Marie. Me, tongana ti so e yeke bâ ande, ambeni zo ayeke sara ande ye nde na mbage ti Marie nga na mbage ti molenge ti lo so lo yeke dü ande.

TI HINGA AMBENI TËNË

Marie—‘Mbi yeke ngbâa ti Jéhovah!’

Kiringo tënë ti Marie na ange Gabriel afa nyen na ndo ti mabe ti lo? Ambeni nzoni sarango ye wa la lo fa ni nga?