Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Jésus: Lege ni, tâ tënë na fini

 CHAPITRE 139

Jésus aga na paradis nga lo hunzi kua so a mû na lo

Jésus aga na paradis nga lo hunzi kua so a mû na lo

1 ACORINTHIEN 15:24-28

  • YE SO AYEKE SI ANDE NA ATABA NGA NA ANGASA

  • AZO MINGI AYEKE DUTI ANDE NA FINI NA YÂ TI PARADIS NA NDO TI SESE

  • JÉSUS AFA SO LO YEKE LEGE NI, TÂ TËNË NA FINI

Kete na peko ti batême ti Jésus, lo tingbi na mbeni wato so aye gi ti sara si lo tï même kozo ti tene lo komanse kua ti lo ti fango tënë. Wato ni so ayeke Zabolo, lo tara Jésus fani mingi. Na pekoni, Jésus atene mbeni tënë na ndo ti lo, lo tene: “Mokonzi ti dunia so ayeke ga, me lo peut ti sara ye oko na mbi ape.”—Jean 14:30.

Bazengele Jean abâ, na yâ ti mbeni vision, ye so ayeke ku “kota sioni nyama so akpa ngbo so, ngbo ti giriri, lo so a iri lo Zabolo na Satan”. Jean abâ so a bi kota wato ti azo so na sese ge, na “lo yeke na kota ngonzo, ndali ti so lo hinga so lo yeke na ngoi mingi ape.” (Apocalypse 12:9, 12). A-Chrétien ahinga so ala yeke na yâ ti ngoi so ayeke mingi ape so. Ala hinga so na yâ ti kete ngoi, a yeke bi “sioni nyama so akpa ngbo so, ngbo ti giriri,” na yâ ti mbeni kota dû so alï mingi na lo yeke na ngangu ande ti sara ye oko ape, teti ngu 1 000 na ngoi so Jésus ayeke komande na yâ ti Royaume ti lo.—Apocalypse 20:1, 2.

Na yâ ti ngoi ni so, nyen la ayeke si ande na sese, ndo so e yeke sara kodro dä so? Azo wa la ayeke duti ande dä? Nga, sese ni ayeke duti ande tongana nyen? Jésus lo wani lo mû kiringo tënë ni. Na yâ ti toli ti lo na ndo ti ataba nga na angasa, lo fa ye so ayeke ku azo ti mbilimbili, so a haka ala na ataba na so ala sara kua maboko na maboko na aita ti lo nga so ala sara nzoni na aita ti lo ni. Jésus afa nga ye so ayeke ku azo so asara ti ala ye nde, so a haka ala na angasa. Lo tene: “Ala so ayeke wara ande kuâ ti lakue lakue, me azo ti mbilimbili ayeke wara fini ti lakue lakue.”—Matthieu 25:46.

Ye so a-aidé e ti mä yâ ti tënë so Jésus atene lani na zo ti nzi so a kanga lo na tere ti lo so. Jésus amû na lo pëpe oko beku so lo mû lani na abazengele ti lo so angbâ be-ta-zo, so lo tene ala yeke duti ande na yâ ti Royaume ti yayu. Me na zo ti sioni so achangé bê ti lo, Jésus atene: “Ti tâ tënë ni, mbi  tene na mo laso: Mo yeke duti ande na mbi na Paradis.” (Luc 23:43). Koli so ayeke na beku ti duti ande na yâ ti Paradis, so ayeke mbeni pendere ndo so akpa mbeni parc. Ni la, azo so laso sarango ye ti ala afa so ala yeke tongana ataba, na so ala yeke “wara fini ti lakue lakue”, ala nga kue ayeke duti ande na yâ ti Paradis ni.

A gue oko na ye so bazengele Jean afa na ndo ti achangement so ayeke duti ande na ndo ti sese. Lo tene: “Tente ti Nzapa ayeke na azo, Nzapa ayeke sara ande kodro na ala, na ala yeke duti azo ti lo. Nzapa wani ayeke duti ande na ala. Fade lo yeke mbô ngu ti lê kue na lê ti ala, kuâ ayeke duti ande dä mbeni pëpe; mua, wala toto, wala pasi ayeke duti dä mbeni pëpe. Angbene ye ni ahon ti ala awe.”—Apocalypse 21:3, 4.

Ti tene zo ti nzi so aduti ande na yâ ti Paradis ni, a yeke zingo ande lo na kuâ. Me, a yeke gi lo oko la si a yeke zingo ande lo ape, Jésus afa ni polele, lo tene: “Zia bê ti ala adö ape ndali ti tënë so, ndali ti so l’heure ni ayeke ga so ala kue so ayeke na yâ ti adû ti kuâ ayeke mä ande go ti lo, na ala yeke sigi. Ala so asara aye ti nzoni, londongo ti ala na kuâ ni ague na ala ti wara fini, na ala so angbâ ti sara aye ti sioni, londongo ti ala na kuâ ni ague na ala ti wara ngbanga.”—Jean 5:28, 29.

Me ka ti abazengele so angbâ be-ta-zo, nga na ambeni zo so wungo ti ala ayeke mingi ape so ayeke komande ande legeoko na Jésus so, ti ala ayeke duti ande tongana nyen? Bible atene: “Ala yeke duti ande aprêtre ti Nzapa na ti Christ na fade ala yeke komande tongana agbia legeoko na Christ na yâ ti ngu 1 000 ni.” (Apocalypse 20:6). Na popo ti azo ni so ayeke komande legeoko na Jésus, a yeke wara akoli nga na awali, so ala yeke ândo ge na ndo ti sese. Ni la, ala yeke bâ ande biani mawa ti azo so ayeke na ndo ti sese ge, nga ala yeke zia tere ti ala na place ti azo.—Apocalypse 5:10.

Jésus ayeke sara ande kua na sandaga ti lo so na ndo ti azo so ayeke na ndo ti sese ge, nga lo yeke zi ande siokpari so ayeke na tere ti ala. Jésus na amba ti lo so ayeke komande ayeke sara ande si azo ayeke na siokpari na tere ti ala ape. Biani, azo ayeke duti ande na fini so Nzapa aleke ni lani na tongo nda ni ndali ti ala, na ngoi so lo tene na Adam na Ève ti dü, na ti mû ndo ti sese kue. Même kuâ, so aga na lege ti siokpari ti Adam, ayeke duti ande dä encore ape!

Jésus ayeke hunzi ti sara ande ye kue so Jéhovah ahunda na lo ti sara. Na hunzingo ti Komandema ti Ngu Saki oko ti Jésus, lo yeke kiri ande na Royaume ni nga na azo kue so siokpari ayeke na tere ti ala encore ape na Babâ ti lo, na azo ni so ayeke ga tongana mbeni sewa oko. Ye so Jésus ayeke sara ande so afa biani so lo hinga ti sara tere ti lo kete, na bazengele Paul asara tënë na ndo ni, lo tene: “Tongana aye kue aga ande na gbe ti lo awe, fade Molenge ni nga ayeke duti ande na gbe ti Lo so azia aye kue na gbe ti lo Molenge ni, si Nzapa aga aye kue teti zo oko oko kue.”—1 aCorinthien 15:28.

A yeke polele so, Jésus asara kota kua mingi na yâ ti aye so Nzapa aleke ti sara. Nga, na ngoi so aye ni so angbâ ti ga gi tâ tënë, lo yeke ga ande ye so lo wani lo sara tënë ni lani na ndo ti lo, lo tene: “Mbi yeke lege ni, tâ tënë na fini.”—Jean 14:6.

TI HINGA AMBENI TËNË

Ye so Nzapa aye ti sara teti sese ayeke nyen?

Bible afa ndani so Nzapa aleke sese, nga lawa si pasi ayeke hunzi. A fa nga sese ni ayeke ga ande nyen nga azo wa la ayeke duti ande na ndo ni.