Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Jésus: Lege ni, tâ tënë na fini

 CHAPITRE 115

Ndangba sarango Pâque ti Jésus aga nduru

Ndangba sarango Pâque ti Jésus aga nduru

MATTHIEU 26:1-5, 14-19 MARC 14:1, 2, 10-16 LUC 22:1-13

  • A MÛ NGINZA NA JUDAS ISCARIOTE TI TENE LO KÄ JÉSUS

  • ABAZENGELE USE AGUE TI LEKE AYE NDALI TI PÂQUE

Jésus ahunzi ti fa ye na abazengele ti lo osio na ndo ti Hoto ti akeke ti olive. Lo kiri tënë na hunda ti ala na ndo ti ngoi ti singo ti lo nga na ngoi so aye ti ngoi so ayeke gue ti hunzi.

Jésus asara tâ kua mingi na lango 11 ti Nisan ni! A yeke peut-être na ngoi so ala yeke kiri na Béthanie ti lango kâ si Jésus atene na abazengele ti lo, lo tene: “Ala hinga so a ngbâ lango use ti tene a sara matanga ti Pâque. A yeke zia Molenge ti zo na maboko ti azo ti tene ala fâ lo na ndo ti keke.”—Matthieu 26:2.

Na bango ni, na mercredi ni, Jésus aduti gi na tere ti abazengele ti lo awe. Na mardi, lo suku na amokonzi-nzapa nga lo sigi na nda ti ala na gigi. Ni la, ala yeke gi lege ti fâ lo. Tongaso, Jésus aye pëpe ti sigi na lê ti azo na lango 12 ni, tongaso si ye oko akanga lege na lo ape ti sara matanga ti Pâque, lo na abazengele ti lo. Pâque ayeke tï ande na lango 14 ti Nisan, na peko ti lindango ti lâ.

Me, kozo na Pâque ni, aprêtre-mokonzi nga na a-ancien ni aduti kpô ape. Ala bungbi tere ti ala na yangbo ti kota prêtre, Caïphe, ngbanga ti so Jésus asigi na nda ti ala, a sara si bê ti ala ason. Fadeso, ala yeke mä tere “ti sara ye na mayele ti gbu Jésus ti fâ lo.” Ala yeke sara ni tongana nyen nga lawa? Ala tene: “E sara ni pëpe na ngoi ti matanga ni, si wusuwusu alondo na popo ti azo ni ape.” (Matthieu 26:4, 5). Ala yeke na mbeto, ngbanga ti so azo mingi aye tënë ti Jésus.

Mo ye ti bâ, mbeni zo aga ti bâ amokonzi-nzapa ni. Ala ku tere ti ala na zo ni so ape. A yeke tâ gi mbeni oko ti abazengele ti Jésus ni, so iri ti lo ayeke Judas Iscariote! Satan la apusu lo ti gue ti kä Jésus. Judas ni ahunda ala, lo tene: “Nyen la ala yeke mû na mbi tongana mbi kä lo na ala?” (Matthieu 26:15). Teti so tënë ni anzere na ala, “ala yeda ti mû na lo alê ti nginza ti argent.” (Luc 22:5). Wungo ni ayeke oke? Ala mä tere ti mû na lo nginza ti argent 30. Ngere ti mbeni ngbâa ândö ayeke sicle 30 (Exode 21:32). Amokonzi-nzapa so amû Jésus tongana mbumbuse zo, ala bâ lo tongana ye oko na lê ti ala ape. Judas angbâ ti “gi mbeni nzoni ngoi ti kä Jésus na ala na ngoi so gbâ ti azo ayeke dä ape.”—Luc 22:6.

Lango 13 ti Nisan akomanse, na mercredi, na ngoi ti lindango ti lâ. Na a yeke omene lango nga ndangba bï ti Jésus na Béthanie la. Na ndade ni, a yeke leke tanga ti aye ndali ti matanga ti Pâque. A doit ti wara mbeni molenge ti taba ti tene a fâ ni nga a zö ni, na ngbongboro ni kue, na ngoi so lango 14 ti Nisan ayeke komanse. Ala yeke te kobe ni na ndo wa? Nga, zo wa la ayeke leke aye ni? Jésus ade afa anzene nzene ye ni ape. Ni la, Judas apeut nga ti fa ni na aprêtre-mokonzi ni ape.

Peut-être na jeudi na peko ti midi, Jésus atokua Pierre na Jean ti gue na Jérusalem, lo tene: “Ala gue ala leke kobe ti Pâque ti tene e te.” Ala ngbâ ahunda lo, ala tene: “Mo ye e leke aye ni na ndo wa?” Jésus angbâ afa na ala aye ni, lo tene: “Tongana ala lï na yâ ti gbata ni, mbeni koli so ayô ta ti sese na ngu na yâ ni ayeke tingbi ande na ala. Ala mû peko ti lo juska na yâ ti da so lo yeke lï dä. Ala tene na wa ti da ni, atene: ‘Maître atene: “Ndo ti agene so mbi na adisciple ti mbi e lingbi ti te kobe ti Pâque dä ayeke na ndo wa?”’ Koli ni ayeke fa na ala mbeni kota yâ ti da so ayeke na nduzu, so aye ayeke na yâ ni. Ala leke aye ni kâ.”—Luc 22:8-12.

Koli ni so adoit ti duti mbeni disciple ti Jésus. Peut-être lo yeke ku tere ti lo ti tene Jésus ahunda lo ti sara matanga ni na da ti lo. Na ngoi so abazengele use so asi kâ na Jérusalem ni, ala wara aye ni kue gi tongana ti so Jésus atene fade. Ala leke si molenge ti taba ni nga atanga ti aye ni kue so ala yeke na bezoin ni ndali ti Pâque ni ayeke dä awe, na a yeke lingbi azo 13, so ti tene Jésus na abazengele ti lo 12.