Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Jésus: Lege ni, tâ tënë na fini

 CHAPITRE 116

Jésus afa ye na ndo ti sarango tere kete na ngoi ti ndangba Pâque

Jésus afa ye na ndo ti sarango tere kete na ngoi ti ndangba Pâque

MATTHIEU 26:20 MARC 14:17 LUC 22:14-18 JEAN 13:1-17

  • JÉSUS ATE NDANGBA PÂQUE TI LO LO NA ABAZENGELE TI LO

  • LO SUKULA GERE TI ABAZENGELE TI LO TI FA MBENI YE NA ALA

Pierre na Jean ague na Jérusalem kâ awe ti leke Pâque, tongana ti so Jésus afa na ala. Na pekoni, Jésus na tanga ti abazengele bale-oko ni alondo ti gue na peko ti ala. Peko ti midi la, na lâ ayeke fadeso na mbage ti ouest, na ngoi so Jésus na adisciple ni angbâ ti descend na ndo ti Hoto ti akeke ti olive. A yeke ti ndangba ni ti tene Jésus abâ ndo ni so la juska na peko ti zingongo ti lo na kuâ.

Kete na pekoni, Jésus na adisciple ti lo alï na yâ ti gbata ni, na ala mû lege ti gue na da so ala yeke sara Pâque ni dä. Na ngoi so ala si na yâ ti da ni, ala monté fadeso ti gue na kota yâ ti da ni so ayeke na nduzu. Ala bâ so a leke aye kue ndali ti matanga ti ala ni awe. Jésus ayeke ku lani ngoi ni so kungo, teti so lo tene: “Mbi ye mingi ti te kobe ti Pâque so na ala kozoni si mbi bâ pasi.”—Luc 22:15.

Teti angu mingi awe, a yôro na yâ ti matanga ni mbeni ngobo so ayeke ti zia si akopo ti vin ahon na popo ti azo so ayeke sara Pâque. Fadeso, na peko ti so Jésus amû mbeni kopo ti vin ni, lo mû merci, na lo tene: “Ala mû ni, ala mû na mba na popo ti ala. Mbi tene na ala: Ti londo laso ti gue na ni, mbi yeke kiri ande ti nyon vin mbeni pëpe juska Royaume ti Nzapa aga.” (Luc 22:17, 18). A yeke polele so lo ga nduru ti kui awe.

A si na mbeni ngoi, mbeni ye so ayeke nde mingi asi. Jésus alondo, lo zi bongo ti lo ti ndo ni, na lo mû mbeni serviette. Na pekoni, lo mû mbeni kota dû ti sembe so ayeke nduru na tere ti lo. Mingi ni ka, wa ti da ayeke hunda na mbeni zo ti kua ti lo ti sukula gere ti agene ti lo (Luc 7:44). Me na ngoi ti so ni so, wa ti da ni ayeke dä ape, ni la Jésus amû li ni ti sara kua ni so. Mbeni bazengele ni apeut fade ti sara ni, me zo oko amû li ni ti sara ni ape. Wala peut-être ala yeke sara mandako na popo ti ala? Me atâa ayeke so wa, li ti ala akpe lani ti bâ so Jésus la aye ti sukula gere ti ala.

Tongana Jésus asi na Pierre, lo ke, lo tene: “Mo yeke sukula gere ti mbi ape.” Jésus angbâ atene na lo: “Tongana mbi sukula gere ti mo ape, mbeni ye abungbi mbi na mo ape.” Pierre ni angbâ atene na Jésus atene: “Seigneur, sukula gi gere ti mbi ape, me sukula nga maboko ti mbi na li ti mbi kue.” Me li ti lo adoit lani ti kpe kue na ngoi so Jésus atene na lo: “Zo so asukula ngu awe ayeke na bezoin ti sukula gi gere ti lo, ndali ti so tere ti lo kue ayeke nzoni. Ti ala, tere ti ala ayeke nzoni, me ala kue ape.”—Jean 13:8-10.

Jésus asukula gere ti ala 12 kue, même Judas Iscariote kue. Na peko ti so Jésus akiri ayü bongo ti lo ti ndo ni awe, lo kiri lo duti na tere ti table ni, na lo tene: “Ala hinga nda ti ye so mbi sara na ala so? Ala yeke iri mbi ‘Maître’ nga ‘Seigneur,’ na a yeke na lege ni, ndali ti so mbi yeke ni. Tongaso, tongana mbi so mbi yeke Seigneur nga Maître, mbi sukula gere ti ala, a yeke nzoni ala nga ala sukula gere ti mba na popo ti ala. Mbi zia tapande ni na ala, si gi tongana ti so mbi sara na ala, a yeke nzoni ala sara tongaso nga. Ti tâ tënë ni, mbi tene na ala: Ngbâa ayeke kota ahon wa ti lo ape, nga zo ti tokua ayeke kota ahon zo so atokua lo pëpe. Tongana ala hinga aye so, ala yeke duti na ngia tongana ala sara ye alingbi na ni.”—Jean 13:12-17.

So pendere tapande ti sarango tere kete! A yeke nzoni adisciple ti Jésus agi kota ndo ape, ala pensé ape so ala la ayeke kota ahon amba ti ala, na so amba ti ala la adoit ti sara kua na ala. Nde na so, a yeke nzoni ala sara ye tongana ti Jésus, pëpe na ziango na sese ngobo ti sukulango gere ti mba, me na dutingo nduru ti sara kua ndali ti amba ti ala, nga na mungo mbage ti mbeni zo ape.

TI HINGA AMBENI TËNË

Pierre amanda na tere ti Seigneur ti pardone zo

Jésus afa na Pierre nyen na ndo ti pardon? Nyen la Jésus asara ti fa so lo pardone Pierre awe?