Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Jésus: Lege ni, tâ tënë na fini

 CHAPITRE 137

Azo ngbangbo mingi abâ Jésus kozo na Pentecôte

Azo ngbangbo mingi abâ Jésus kozo na Pentecôte

MATTHIEU 28:16-20 LUC 24:50-52 KUSALA 1:1-12; 2:1-4

  • JÉSUS AFA TERE TI LO NA AZO MINGI

  • JÉSUS AGUE NA YAYU

  • JÉSUS ATUKU YINGO VULU NA NDO TI ADISCIPLE 120

Na peko ti londongo ti Jésus na kuâ, lo leke ti tene lo na abazengele ti lo 11 awara tere na ndo ti mbeni hoto na Galilée. Ambeni disciple ni nde nga kue ague kâ, ala yeke 500 tongaso. Na popo ti azo ni so, ambeni ayeke kozo na kite so Jésus ade ti zingo ape (Matthieu 28:17; 1 aCorinthien 15:6). Me, tënë so Jésus ayeke tene kâ fafadeso ayeke aidé ande ala oko oko kue ti hinga biani so Jésus akiri na fini awe.

Jésus atene so Nzapa amû na lo komandema kue na yayu nga na sese. Ni la, Jésus atene na ala atene: “Tongaso ala gue, ala sara si azo na popo ti amara kue aga adisciple. Ala batize ala na iri ti Babâ, ti Molenge na ti yingo vulu. Ala fa na ala ti bata aye kue so mbi mû yanga na ala ti sara.” (Matthieu 28:18-20). Biani, Jésus akiri na fini awe, me tënë ti fango nzoni tënë agbu bê ti lo nga.

Jésus amû kua ti sarango adisciple so na azo kue so aga adisciple ti lo, atâa a yeke akoli, awali nga na amolenge. Awato apeut ti tara ti kanga lege na kua ti fango tënë wala ti fango ye ni, me Jésus adë bê ti ala, lo tene: “A mû na mbi komandema kue na yayu nga na sese.” Tënë so aye ti tene nyen la? Lo fa ndani, lo tene: “Mbi yeke na tere ti ala lakue, juska na lâ ni so aye ti ngoi so ayeke gue ti hunzi.” Jésus atene pëpe so azo kue so ayeke mû mbage na kua ti fango tënë so ayeke wara ande ngangu ti sara amiracle. Me, yingo vulu ayeke duti ande na ndo ti ala.

Na peko ti londongo ti Jésus na kuâ, lo fa tere ti lo na adisciple ti lo na yâ ti “lango 40”. Lo mû atere nde nde, na lo fa tere ti lo “na lege ti gbâ ti afä so a lingbi ti dë kite na ni ape,” lo sara na ala tënë ti aye so “andu Royaume ti Nzapa.”—Kusala 1:3; 1 aCorinthien 15:7.

Aye afa so na ngoi so abazengele angbâ na Galilée, Jésus atene na ala ti kiri na Jérusalem. Na ngoi so lo sara bungbi na ala na yâ ti gbata ni, lo tene: “Ala sigi na Jérusalem ape, me ala ngbâ ala ku ye so Babâ ni amû zendo ni, ye so ala mä tënë ni na yanga ti mbi. Jean abatize ti lo azo na ngu, me ti ala, na yâ ti alango kete a yeke batize ala ande na yingo vulu.”—Kusala 1:4, 5.

Na pekoni, Jésus akiri atingbi tere na abazengele ti lo. “Lo gue na ala juska na Béthanie,” so ayeke na mbage ti est ti Hoto ti akeke ti olive (Luc 24:50). Atâa aye kue so Jésus atene na ala na ndo ti guengo ti lo, ala ngbâ lakue ti pensé so Royaume ti lo ayeke duti ande na ndo ti sese ge.—Luc 22:16, 18, 30; Jean 14:2, 3.

Abazengele ni ahunda Jésus atene: “Seigneur, mo yeke kiri na royaume ni na Israël fafadeso?” Lo tene gi na ala, lo tene: “A yeke ti ala pëpe ti hinga ngoi wala alango so a fa awe, so Babâ azia na gbe ti komandema ti lo wani.” Na pekoni, lo kiri lo luti mingi na ndo ti kua so lo mû na ala, lo tene: “Ala yeke wara ande ngangu tongana yingo vulu aga na ndo ti ala, na ala yeke duti atémoin ti mbi na Jérusalem, na yâ ti Judée kue nga na Samarie, juska na ambage ti sese so ayeke tâ yongoro.”—Kusala 1:6-8.

Abazengele ayeke na ndo ti Hoto ti akeke ti olive na tere ti Jésus, so azingo na kuâ, na ngoi so lo komanse ti monté ti gue na yayu na lê ti ala. Kete na pekoni, mbeni mbinda asara si ala bâ lo encore ape. Na peko ti londongo ti Jésus na kuâ, lo mû fade tere ti zo. Me ti fadeso, Jésus azia tere ti zo ni, lo mû tere so ayeke ti yingo la lo gue na ni na yayu (1 aCorinthien 15:44, 50; 1 Pierre 3:18). Na ngoi so abazengele ni angbâ ti bâ peko ti Jésus, “akoli use so ayü vuru bongo” aga aluti na tere ti ala. Azo ni so ayeke a-ange la si amû tere ti zo, na ala hunda abazengele ni, ala tene: “Azo ti Galilée, ala ngbâ ti luti ti bâ ndo na lê ti nduzu ngbanga ti nyen? Jésus so a mû lo na tere ti ala a gue na lo na nduzu awe so, lo yeke kiri ande gi tongana ti so ala bâ lo na guengo ni na nduzu so.”—Kusala 1:10, 11.

Na ngoi so Jésus ayeke zia sese ti gue na yayu, azo mingi la abâ lo ape, gi abazengele ti lo oko la abâ ni. ‘Lo yeke kiri ande gi tongaso’, azo mingi la ayeke bâ lo ape, gi adisciple ti lo so angbâ be-ta-zo la ayeke hinga gango ti lo na yâ ti Royaume ni.

Abazengele ni akiri na Jérusalem. Na yâ ti alango so aga na pekoni, ala bungbi tere place oko na tanga ti adisciple, so na popo ni a yeke wara “Marie mama ti Jésus na aita ti Jésus ti koli.” (Kusala 1:14). Ala ngbâ gi ti sambela. Mbeni tënë so ala yeke sambela ndali ni, a yeke tënë ti sorongo mbeni disciple ni ti tene lo mû place ti Judas Iscariote, tongaso si wungo ti abazengele ni kue asi 12 (Matthieu 19:28). Ala ye ti wara mbeni disciple so aduti témoin ti akua so Jésus asara nga na ti londongo ti lo na kuâ. Ala bi mbeni ye ti hinga ye so bê ti Nzapa aye. A yeke ti ndangba ni ti tene Bible atene so azo asara ye tongaso la (Psaume 109:8; aProverbe 16:33). Ye ni atï na ndo ti Matthias, so lo yeke peut-être lani na popo ti adisciple 70 so Jésus atokua ala ti fa tënë. Fadeso, “a diko lo na tere ti abazengele 11.”—Kusala 1:26.

Lango bale-oko na peko ti so Jésus amonté na yayu, lango ti Matanga ti Pentecôte ti aJuif, ti ngu 33, asi. Adisciple 120 tongaso abungbi tere na yâ ti mbeni kubu so ayeke na nduzu na Jérusalem. Mo ye ti bâ, mbeni toto ti ye tongana ti pupu so aya ngangu amû yâ ti da ni kue. Ala bâ amenga tongana amenga-wa, yâ ni akangbi, na a duti na li ti ala oko oko kue. Ala komanse ti sara tënë na ayanga ti kodoro nde nde. Yingo vulu so Jésus amû zendo ni lani so la aga na ndo ti ala so.—Jean 14:26.