Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Jésus: Lege ni, tâ tënë na fini

 CHAPITRE 135

Jésus afa tere ti lo na azo mingi na peko ti londongo ti lo na kuâ

Jésus afa tere ti lo na azo mingi na peko ti londongo ti lo na kuâ

LUC 24:13-49 JEAN 20:19-29

  • JÉSUS ASIGI NA NDO TI LEGE TI EMMAÜS

  • JÉSUS AZI NDA TI TËNË TI NZAPA NA ADISCIPLE TI LO FANI MINGI

  • THOMAS AZIA LEGE TI DENGO KITE

Na dimanche, lango 16 ti Nisan, adisciple aduti gi na vundu. Ala hinga li ti ala na ndani so yâ ti dû ti kuâ so ayeke senge so ape (Matthieu 28:9, 10; Luc 24:11). A si na kota lâ, Cléopas nga na mbeni disciple ni alondo na Jérusalem ti gue na Emmaüs, so ayo akilomètre 11 tongaso.

Na ngoi so ala yeke na lege, ala yeke sara tënë na ndo ti ye so alondo ti passé so. Na pekoni, mbeni zo so ala hinga lo ape aga na tere ti ala. Lo hunda ala lo tene: “Atënë wa la ala yeke pika patara na ndo ni na lege so?” Cléopas angbâ ahunda lo atene: “A sara tongana nyen si mo hinga ape aye so asi na yâ ti Jérusalem na yâ ti alango so? Wala mo yeke ti mo wande?” Zo ni akiri ahunda ala atene: “Aye wa?”—Luc 24:17-19.

Ala tene: “Aye so andu Jésus, zo ti Nazareth. . . . E ku lani ti tene koli so aduti zo so ayeke zi azo ti Israël.”—Luc 24:19-21.

Cléopas na amba ti lo ni akomanse ti fa peko ti aye so asi na lango ni so. Ala tene so ambeni wali so ague na dû ti kuâ ti Jésus ni awara yâ ti dû ni senge, na awali ni abâ na lê ti ala ambeni ye so ahon gbungo li ti zo. Ala bâ ambeni ange so atene na ala so Jésus akiri na fini awe. Ala tene nga so ambeni na popo ti ala nga kue akiri ague, me “ala wara ni gi tongana ti so awali ni atene”.—Luc 24:24.

Adisciple use so ahinga li ti ala oko ape na ye ni so asi so. Zo ni so angbâ atene mbeni ngangu tënë ti leke yâ ti sioni bango ndo ti ala ni so, na tënë ni andu bê ti ala mingi. Lo tene: “Ala, azo so li ti ala ayeke dä ape so nga so bê ti ala ayeda hio ape na atënë so aprophète atene giriri! A hunda ape ti tene aye ti pasi so asi na Christ si lo wara gloire ti lo?” (Luc 24:25, 26). Lo komanse ti fa na ala nda ti aversê ti Mbeti ti Nzapa so asara tënë na ndo ti Christ.

Mo ye ti bâ, ala ota kue asi na Emmaüs. Adisciple use so aye ti kiri ti mä ambeni tënë ni encore, ni la ala vorongo yanga na zo ni, ala tene: “Ngbâ na e ge, ndali ti so lâ aga nduru ti linda awe, nga lango ti laso aga nduru ti hunzi awe.” Lo yeda ti ngbâ, na ti tene lo na ala ate kobe place oko. Na ngoi so zo ni asambela, lo fâ yâ ti mapa na lo mû ni na ala, ge la si ala ga ti hinga zo ni, me lo girisa na lê ti ala gi tongaso (Luc 24:29-31). Fadeso, ala hinga biani so Jésus akiri na fini awe!

Na nzerengo tere, adisciple use so akomanse ti fa peko ti aye so asi na ala so, ala tene: “Na ngoi so lo yeke sara fade tënë na e na lege so nga lo yeke zi nda ti Mbeti ti Nzapa kue na e so, tënë ni andu bê ti e ngangu!” (Luc 24:32). Ala kpe loro akiri na Jérusalem, na ndo so ala yeke wara abazengele nga na ambeni zo ni. Kozo ti tene Cléopas na mba ti lo ni akomanse ti fa peko ti ye so asi na ala, ambeni zo atene: “Ti tâ tënë ni, a zingo Seigneur na kuâ awe, na lo si na Simon!” (Luc 24:34). Na pekoni, ala use kue akomanse ti fa tongana nyen la Jésus afa tere ti lo na ala. Ala nga kue ayeke témoin ni.

Mo ye ti bâ, mbeni ye apika bê ti ala ngangu, Jésus asi na ala na yâ ti da so ala yeke na yâ ni so! Li ti ala akpe kue, ngbanga ti so ala kanga fade yanga-da na ndo ti ala, ndali ti so ala yeke na mbeto ti aJuif. Jésus aga aluti tâ gi na milieu ti ala. Lo ngbâ lo tene yeke: “Siriri na ala.” Me, tere ti ala adö. Tongana ti so a si na ala kozo awe, ala pensé ti ala atene “so mbeni yingo la!”—Luc 24:36, 37; Matthieu 14:25-27.

Ti fa na ala so a yeke mbeni yingo la ala yeke bâ so ape wala a yeke bango li ape, me so lo yeke na nyama ti tere, Jésus afa na ala amaboko ti lo nga na gere ti lo, lo tene: “Li ti ala aga kirikiri ngbanga ti nyen? Ala yeke na kite na bê ti ala ngbanga ti nyen? Ala bâ maboko ti mbi nga na gere ti mbi; so mbi la. Ala ndu mbi ala bâ. Mbeni yingo ayeke na nyama ti tere nga na bio ape, tongana ti so ala bâ mbi yeke na ni so.” (Luc 24:36-39). Tere ti ala anzere nga bê ti ala adö, me ala ngbâ lakue na kite.

Nga, ti aidé ala ti bâ so a yeke lo la, lo hunda ala lo tene: “Ala yeke na ye ti tengo ni ge?” Ala mû na lo mbeni nduru zongo susu. Lo mû ni, lo te ni. Na pekoni, lo tene na ala: “Na ngoi so mbi yeke lani na tere ti ala [kozoni si mbi kui], mbi tene so a lingbi aye kue so a sû ni ândo na ndo ti mbi na yâ ti Ndia ti Moïse, na yâ ti ambeti ti aProphète nga na aPsaume asi biani.”—Luc 24:41-44.

Jésus a-aidé fade Cléopas na mba ti lo ti mä yâ ti Mbeti ti Nzapa, na fadeso lo yeke sara ni na ala kue so abungbi ge. Lo tene: “A sû tënë so na yâ ti Mbeti ti Nzapa: Christ ayeke bâ pasi, na lo yeke zingo na popo ti akuâ na ota lango ni, si na iri ti lo, ti londo na Jérusalem, a fa na amara kue tënë ti changengo bê ti wara pardon ti siokpari. A lingbi ala duti atémoin ti aye so.”—Luc 24:46-48.

Thomas ayeke ge na popo ti ala ape ndali ti mbeni raison so e hinga ape. Na lango so aga na pekoni, amba ti lo ni atene na lo atene: “E bâ Seigneur awe!” Thomas angbâ atene na ala atene: “Tongana mbi bâ kä ti apointe na yâ ti amaboko ti lo ape, na mbi yôro li ti maboko ti mbi na yâ ti kä ti apointe ni ape nga mbi yôro maboko ti mbi na yâ ti kä ti tere ti kate ti lo so ape, mbi yeke mä na bê oko ape.”—Jean 20:25.

Lango miombe na pekoni, adisciple akiri abungbi tere ti ala, ala kanga yanga-da ni na ndo ti ala, na ti so ni so, Thomas ayeke dä. Jésus, so amû tere ti zo, asi na ala na lo bara ala, lo tene: “Siriri aduti na ala.” Lo tourné na mbage ti Thomas, lo tene na lo: “Zia li ti maboko ti mo ge, nga bâ amaboko ti mbi. Mû maboko ti mo, mo yôro ni na tere ti kate ti mbi na mo zia ti dë kite, me mo mä na bê.” Thomas ni angbâ adekongo atene: “Seigneur ti mbi na Nzapa ti mbi!” (Jean 20:26-28). Fadeso, Thomas amä na bê awe so Jésus akiri na fini tongana mbeni ngangu zo ti yingo so ayeke sara kua na iri ti Nzapa.

Jésus angbâ atene na lo atene: “Mo mä na bê ngbanga ti so mo bâ mbi? Ngia ayeke na ala so amä na bê atâa so ala bâ ye ni ape.”—Jean 20:29.