Lege ti wara ye ni

Soro mbeni yanga ti kodoro

Gue na gbe ti menu

Gue na tënë ti yâ ni

aTémoin ti Jéhovah

Sango

Mo ye ti hinga tâ tënë?

Mo ye ti hinga tâ tënë?

TÂ TËNË na ndo ti atënë wa? Ta tënë na ndo ti ambeni kota tënë so azo ayeke hunda ka na tere ti ala. Peut-être mo hunda tere ti mo na atënë so awe:

  • Nzapa ayeke pensé nga na e la?

  • Bira na pasi ayeke hunzi mbeni lâ?

  • Nyen la ayeke si na zo na peko ti kuâ nyen?

  • Beku ayeke dä ndali ti azo so akui awe?

  • A lingbi mbi sambela tongana nyen si Nzapa amä mbi?

  • Mbi lingbi ti sara nyen ti duti na ngia na yâ ti fini ti mbi?

Mo yeke gi akiringo tënë ni na ndo wa? Tongana mo gue na ndo so a yeke kä ambeti dä, mo lingbi ti wara gbâ ti ambeti so atara ti kiri tënë na ahundango tënë so. Me, mingi ni, mbeni buku atene tënë tongaso, mbeni atene ti lo nde. Ti ambeni, atënë ti yâ ni akpa anzoni tënë me kete na pekoni a ga ngbene ye wala a kiri a gbian yâ ni.

Me mbeni mbeti ayeke dä so ayeke na akiringo tënë so zo alingbi ti zia bê ti lo dä. Mbeti so atene mvene lâ oko pëpe. Mbeni lâ Jésus Christ asambela Nzapa, lo tene: “Tënë ti Mo ayeke tene-biani”, wala tâ tënë (Jean 17:17). Laso e hinga e tene Tënë so ayeke Mbeti ti Nzapa. Atënë so ayeke ga na peko ayeke fa na mo kete mbage ti atâ kiringo tënë so Bible amû polele na ndo ti ahundango tënë so e hunda fade ge.

 Nzapa ayeke pensé nga na e la?

YE SO APUSU ZO TI HUNDA TËNË SO: E yeke na yâ ti sese so asi singo na aye ti sioni nga na aye ti kirikiri. Abungbi ti nzapa mingi afa so pasi alondo na Nzapa.

YE SO BIBLE AFA: Nzapa ayeke lâ oko pëpe na gunda ti aye ti sioni. Job 34:10 atene: “Nzapa alingbi sara sioye kete pëpe, Lo Ti Ngangu Ahon Kue alingbi sara sioni oko pëpe.” Nzapa aleke mbeni nzoni ye ndali ti azo. A yeke ndali ni la si Jésus afa na e ti sambela, lo tene: “Babâ ti e so ayeke na yayu, e ye . . . royaume ti Mo aga. E ye ala sara na sese ye so bê ti Mo aye legeoko tongana ala sara na yayu.” (Matthieu 6:9, 10). Nzapa apensé na e mingi la si lo sara kue ti tene ye so lo leke na bê ti lo ti sara aga tâ tënë.—Jean 3:16.

Bâ nga Genèse 1:26-28; Jacques 1:13 na 1 Pierre 5:6, 7.

Bira na pasi ayeke hunzi mbeni lâ?

YE SO APUSU ZO TI HUNDA TËNË SO: Bira angbâ lakue ti fâ gbâ ti azo. E kue e hinga ye so a tene pasi awe.

YE SO BIBLE AFA: Nzapa asara tënë ti mbeni ngoi so na yâ ni lo yeke zia ande siriri na ndo ti sese mobimba. Ande na gbe ti Royaume ti lo, wala ngorogbia ti lo so ayeke na yayu, azo ayeke “manda lege ti sara bira mbeni pëpe.” Me ala yeke “pika épée ti ala si a ga soc’’. (Esaïe 2:4). Nzapa ayeke hunzi ande pasi nga na aye ti kirikiri kue. Bible amû zendo so, a tene: “Fade [Nzapa ambô] ngule kue na lê ti ala, na kui ayeke mbeni pëpe. Vundu, wala toto, wala sana, ayeke mbeni pëpe teti kozo ye ni [so andu nga pasi na aye ti kirikiri ti laso] ahon awe.”—Apocalypse 21:3, 4.

Bâ nga Psaume 37:10, 11; 46:10 na Michée 4:1-4.

Nyen la ayeke si na zo na peko ti kuâ nyen?

YE SO APUSU ZO TI HUNDA TËNË SO: Mingi ti abungi ti nzapa ti sese so afa so mbeni ye na yâ ti tere ti zo ayeke sigigi na peko ti kuâ ti zo ni. Ambeni atene so akuâ alingbi ti sara sioni na azo so angbâ na fini, wala Nzapa ayeke bi azo ti sioni na lê ti wâ ti bâ pasi lakue lakue.

YE SO BIBLE AFA: Tongana zo akui, lo kui awe. Zo-ti-fa-tene 9:5 atene: “Akinda ahinga ye oko pëpe.” So akuâ ahinga ye oko pëpe wala ala lingbi ti sara mbeni ye oko pëpe, ala lingbi ti sara sioni na azo pëpe wala ti mû maboko na ala.—Psaume 146:3, 4.

Bâ nga Genèse 3:19 na Zo-ti-fa-tene 9:6, 10.

 Beku ayeke dä ndali ti azo so akui awe?

YE SO APUSU ZO TI HUNDA TËNË SO: E ye ti ngbâ na fini, na e ye ti ngbâ na tere ti azo so e ye ala. Ni la, a yeke na lege ni ti tene e duti na kota nzara ti kiri ti bâ azo ti e so akui awe.

E SO BIBLE AFA: Nzapa ayeke zingo ande mingi ti azo so akui awe. Jésus atene so “azo kue so ayeke na du-kua, fade . . . ala sigigi.” (Jean 5:28, 29). Ti gue oko na ye so Nzapa aleke ti sara giriri kozoni, azo so ayeke zingo ande na kuâ ayeke wara lege ti duti na ndo ti sese so ayeke ga paradis (Luc 23:43). Azo so amä yanga ayeke duti ande na nzoni seni ti tere nga ala yeke ngbâ na fini lakue lakue. Bible atene: “Sese ni aga ye ti héritier ti azo ti mbilimbili, na fade ala duti dä lakue.”—Psaume 37:29.

Bâ nga Job 14:14, 15; Luc 7:11-17 na Kusala 24:15.

A lingbi mbi sambela tongana nyen si Nzapa amä mbi?

YE SO APUSU ZO TI HUNDA TËNË SO: Na yâ ti mingi ti abungbi ti nzapa, azo ayeke sambela ka. Me mingi ti ala abâ so Nzapa amä sambela ti ala pëpe.

YE SO BIBLE AFA: Jésus afa so a lingbi e tene gi a-oko tënë pëpe na yâ ti sambela ti e. Lo tene: “Tongana i sambela, i sara gi tënë oko lege mingi pëpe.” (Matthieu 6:7). Tongana e ye ti tene Nzapa amä asambela ti e, a lingbi e sambela na lege so lo yeda na ni. Ti sara ni, a yeke nzoni e hinga ye so bê ti Nzapa aye na e sambela alingbi na ni. Kozo mbeti ti Jean 5:14 atene: “Tongana e hunda ye na lege ti ye so [Nzapa aye], Lo mä e.”

Bâ nga Psaume 65:3; Jean 14:6, 14 na 1 Jean 3:22.

Mbi lingbi ti sara nyen ti duti na ngia na yâ ti fini ti mbi?

YE SO APUSU ZO TI HUNDA TËNË SO: Azo mingi atene ti ala so nginza, kota iri wala pendere ti ala ayeke sara si ala yeke duti na ngia. Tongaso, ala gi ti wara aye so, me na nda ni ala ga ti bâ so ala yeke na ngia pëpe.

YE SO BIBLE AFA: Jésus afa tâ ye so ayeke mû ngia na zo tongana lo tene: “Ngia ayeke na azo so ahinga ye ti yingo amanke ala.” (Matthieu 5:3). E yeke wara tâ ngia gi tongana e sara ambeni ye ti kaï nzara so e yeke na ni so ayeke kota ahon atanga ni kue. Nzara so ayeke ti hinga tâ tënë na ndo ti Nzapa nga na aye so lo leke ti sara ndali ti e. Tâ tënë so, e yeke wara ni na yâ ti Bible. Ti hinga tâ tënë so ayeke mû lege na e ti hinga biani ye so ayeke kota ye nga ye so ayeke kota ye pëpe. Tongana e zia si tâ tënë ti yâ ti Bible afa lege na e na yâ ti adesizion ti e nga na aye so e yeke sara ayeke sara si e duti na ngia mingi.—Luc 11:28.

Bâ nga aProverbe 3:5, 6, 13-18 na 1 Timothée 6: 9, 10.

 E londo ti bâ gi akete kiringo tënë ti Bible na ndo ti ahundango tënë omene so. Mo ye ti hinga ye mingi ahon so? Tongana mo yeke na popo ti ala so “ahinga ye ti yingo amanke ala,” kite ayeke dä pëpe so mo yeke gi ti hinga ni. Mo yeke hunda tere ti mo peut-être na ambeni hundango tënë, tongana: ‘Tongana Nzapa ayeke pensé na e, ndali ti nyen lo zia lege na pasi nga na aye ti sioni juska laso? Mbi lingbi ti sara nyen ti tene dutingo ti sewa ti mbi aga nzoni?’ Bible akiri tënë na gbâ ti ambeni hundango tënë tongaso, na akiringo tënë ni adë bê ti zo.

Ye oko, mingi ti azo laso ayeke sara mbeto kete ti diko Bible. Ala bâ ti ala ni tongana mbeni buku so akono mingi na so ngoi na ngoi a yeke ngangu ti mä yâ ni. Mo ye si a mû maboko na mo ti wara akirngo tënë ni na yâ ti Bible? A-Témoin ti Jéhovah ayeke na aye use so alingbi ti mû maboko na mo.

Kozo ye ni ayeke buku Bible afa nyen biani? A sara buku so ti mû maboko na azo so ayeke na aye mingi ti sarango ni ti bâ akiringo tënë so Bible afa polele na ndo ti akota hundango tënë so azo ayeke hunda na tere ti ala. Use ye ni ayeke kapa ti mandango Bible senge senge na azo na yanga-da ti ala. Mbeni Témoin ti Jéhovah ti vaka ti mo alingbi ti ga ti manda Bible na mo senge senge na yanga-da wala na mbeni ndo so alingbi na mo. Lo lingbi ti mû kete ngoi yenga oko oko ti sara lisoro na mo na ndo ti Bible. Azo kutu mingi na ndo ti sese mobimba ayeke sara tongaso. Mingi ti ala aga ti tene na nda ni na nzerengo tere: “Mbi wara tâ tënë awe!”

Mbeni kota mosoro ti lingbi na so ayeke dä pëpe. Atâ tënë ti yâ ti Bible ayeke zi e na gbe ti atënë so zo ahinga li ti lo na ni pëpe, na gbe ti mbeto ti aye so zo ahinga nda ni nzoni pëpe, na tapande mbeto ti avuko nyau wala ahibou na ambeni ye nde tongaso, nga na gbe ti kota mbeto ti ambeni ye tongana kuâ. A mû na e beku, a sara si e hinga nda ni so e yeke na fini nga a sara si e duti na ngia. Jésus atene: “Fade i hinga tene-biani [wala tâ tênë], na fade tene-biani azi i.”—Jean 8:32.

TI HINGA AMBENI TËNË

Ndani nyen ti manda Bible?

Bible ayeke mû maboko laso na azo kutu na kutu na yâ ti dunia kue ti wara akiringo tënë na angangu tënë so ala yeke hunda na yâ ti gigi ti ala. Mo nga kue mo ye ti duti na popo ti ala?