Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Fa ye na amolenge ti mo

 CHAPITRE 3

Rahab ahinga atene Jéhovah ayeke tâ Nzapa

Rahab ahinga atene Jéhovah ayeke tâ Nzapa

Jéricho la. A yeke mbeni kete kodoro ti Canaan, na azo ni kâ ayeke voro Jéhovah ape. Mbeni wali ayeke kâ na iri ti lo ayeke Rahab.

Na kete ti lo, Rahab amä tongana nyen la si Moïse asigigi na azo ti Israël na Égypte. Lo gue na ala na Kota Ngu-bengba, si lo kangbi yâ ni use na ala hon na yâ ni. Rahab amä nga tongana nyen la Jéhovah amû maboko na ala ti kinda awato ti ala. Ti fadeso, lo mä so azo ti Israël ni ayeke ge nduru na Jéricho ni.

Rahab abata azo ti Israël so ngbanga ti so lo hinga lo tene Jéhovah ayeke tâ Nzapa

Mbeni lâ, azo ti Israël use aga na Jéricho ti bâ yâ ti kodoro ni. Ala ga na da ti Rahab, na Rahab ayeda ti tene ala ngbâ na lo. Me na bï, gbia ti Jéricho amä atene azo ti Israël use asi na gbata ni, na ala yeke na da ti Rahab kâ. Tongaso, gbia ni atokua azo ti lo na Rahab. Andâ, Rahab ahonde akoli so na li ti da ti lo awe, si lo tene na azo ti gbia ni, lo tene: ‘Azo ti Israël ni ayeke fade ge, me ala hon awe. Tongana ala gue hio, ala yeke wara ala na lege!’ Ndali ti nyen si Rahab ahonde azo ti Israël ni?— A yeke ndali ti so lo hinga lo tene Jéhovah ayeke tâ Nzapa nga lo hinga so Jéhovah ayeke mû kodoro ti Canaan ni na azo ti Israël.

Kozo ti tene azo ti Israël ni ahon, ala tene na Rahab so lo na afami ti lo ayeke ngbâ na fini na ngoi so Nzapa ayeke buba kodoro ti Jéricho ni. Nyen la ala tene na lo ti sara?— Ala tene na lo: ‘Mû bengba kamba so, na kanga ni na fenêtre ti mo na mbage ti gigi. Tongaso si afami ti mo kue angbâ na fini.’ Rahab asara tâ gi tongana ti so ala tene na lo, lo mû kamba ni lo kanga na fenêtre ni. Nyen la asi na pekoni nyen?—

Jéhovah abata Rahab nga na afami ti lo

Alango kete na pekoni, azo ti Israël aga na Jéricho, ala tambela, ala ngoro ni lege oko, ala zi yanga ape, ala kiri. Ala sara tongaso juska lango omene. Me na mbasambala lango ni, ala ngoro Jéricho ni lege mbasambala. Na pekoni awe, ala dekongo ngangu, na Jéhovah asara si gbagba ti Jéricho ni akungbi, atï na sese. Me da so ayeke na li ti gbagba ni, so a kanga bengba kamba na fenêtre ni so, akungbi ti lo ape. Mo bâ da ni na lê ti foto so? Da ni  ayeke tongana nyen?— Rahab na afami ti lo akui ti ala ape.

Mo yeke sara tongana nyen ti fa so mo sara ye tongana Rahab?— Rahab ahinga lani atene Jéhovah ayeke tâ Nzapa ngbanga ti so lo mä tënë ti apendere ye kue so Jéhovah asara. Mo nga kue, mo ngbâ ti manda ye na ndo ti ambeni pendere ye so Jéhovah asara. Na mo, Jéhovah ayeke tâ Nzapa?— So nzoni!

DIKO NA YÂ TI BIBLE TI MO