Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible afa nyen biani?

CHAPITRE MIOMBE

Royaume ti Nzapa ayeke nyen?

Royaume ti Nzapa ayeke nyen?

Bible afa na e tënë wa na ndo ti Royaume ti Nzapa?

Royaume ti Nzapa ayeke sala ande nyen?

Lawa si Royaume ni ayeke sala na sese ye so bê ti Nzapa aye?

AZO mingi na ndo ti sese ahinga sambela ti “Babâ ti e so ayeke na yayu”. A yeke sambela so Jésus Christ lo mveni amû ni tongana mbeni tapande ti sambela teti adisciple ti lo. Atënë mingi ti manda ayeke na yâ ti sambela so, na tongana e bâ gi tënë na ndo ti akozo ye ota so lo hunda ti sambela ngbanga ni, a yeke mû ande maboko na mo ti manda ambeni ye nde so Bible afa biani.

2 Na tongo nda ti sambela so, Jésus atene na ala so ayeke mä lo: “A lingbi i sambela na lege so: Babâ ti e so ayeke na yayu, e ye iri ti Mo aga nzoni-kue. E ye royaume ti Mo aga. E ye ala sala na sese ye so bê ti Mo aye legeoko tongana ala sala na yayu.” (Matthieu 6:9-13). Aye ota so lo fa ge ti sambela ngbanga ni aye ti tene nyen?

3 E manda ye mingi awe na ndo ti iri ti Nzapa, Jéhovah. E manda nga ye kete na ndo ye so bê ti Nzapa aye: aye so lo sala awe teti azo na so lo yeke sala ande teti ala. Me Jésus atene nga na e ti sambela tongaso: “E ye royaume ti Mo aga.” Lo ye ti tene nyen ge? Royaume ti Nzapa ni ayeke nyen? Na lege wa gango ti Royaume so ayeke sala si iri ti Nzapa aga nzoni-kue? Nga, kamba wa ayeke na popo ti gango ti Royaume ni na salango ye so bê ti Nzapa aye?

ROYAUME TI NZAPA AYEKE NYEN?

4 Royaume ti Nzapa ayeke mbeni yanga-ti-komande wala ngorogbia so Jéhovah Nzapa si aleke gere ni; a yeke nga lo si asoro Gbia ni. Gbia ti Royaume ti Nzapa ni ayeke zo wa? A yeke Jésus Christ. Jésus so a zia lo Gbia ayeke kota ahon tanga ti amokonzi kue ti sese, na a hiri lo “Kota Gbia, Gbia ti agbia na Seigneur ti aseigneur”. (1 Timothée 6:15). Lo yeke na ngangu ti sala nzoni mingi na azo ahon mokonzi kue na sese. Atâa nzoni ti mokonzi ni ayeke tongana nyen, mbeni oko ti lingbi na Jésus ayeke pëpe.

5 Royaume ti Nzapa ayeke duti ande na ndo wa si lo komande? Biani, hunda gi tele ti mo: Jésus ayeke na ndo wa? Na hundango tongaso, mo yeke dabe ti mo so mo manda na yâ ti mbeni chapitre so ahon so a fâ lani Jésus na ndo ti keke ti pasi me na pekoni a zingo lo na kuâ. Kete na pekoni, lo gue na yayu (Kusala 2:33). Tongaso, a yeke kâ na yayu ni si Royaume ti Nzapa ayeke. Ndani la si Bible ahiri ni ‘royaume ti yayu.’ (2 Timothée 4:18). Atâa so Royaume ti Nzapa ayeke na yayu, lo yeke komande ande sese.—Apocalypse 11:15.

6 Aye wa asala si Jésus ayeke mbeni Gbia so ayeke nde mingi? Kozo ye ni ayeke so lo yeke kui ande lâ oko pëpe. Tongana a haka lo na agbia ti sese, Bible atene so “gi Lo oko ayeke na fini ti lakue lakue, Lo duti na lumière so zo alingbi si dä pëpe”. (1 Timothée 6:16). So aye ti tene so aye ti nzoni kue so Jésus asala ayeke ngbâ ande teti lakue. Nga, lo yeke sala ande aye mingi so biani ayeke sala nzoni na azo.

7 Bâ gi prophétie so; a yeke mbeni prophétie so aga tâ tënë na ndo ti Jésus: “Fade Yingo ti L’Eternel aduti na ndo Lo, yingo ti ndara na ti hingango nda ti ye, yingo ti wango tënë na ti ngangu, yingo ti hingango ye na ti kpengo mbito ti L’Eternel. Fade ngia ti Lo ayeke ti kpe mbito ti L’Eternel; fade Lo fâ ngbanga pëpe na lege ti ye so lê ti Lo abâ, na Lo leke tënë pëpe na lege ti tënë so mê ti Lo amä; me fade Lo fâ ngbanga ti awanzinga mbilimbili, na Lo leke tënë na lege ni teti azo ti tâ be-ti-molenge ti sese so.” (Esaïe 11:2-4). Atënë so afa so Jésus ayeke duti ande mbeni Gbia ti mbilimbili, so ayeke bâ mawa ti azo ti sese. Mo yeke na nzara ti wara mara ti Gbia tongaso pëpe?

8 Mbeni ye nde ayeke nga dä ti hinga na ndo ti Royaume ti Nzapa: Jésus ayeke komande ande gi lo oko pëpe. Ambeni zo nga ayeke komande na tele ti lo na yâ Royaume ni. Na tapande, bazengele Paul atene na Timothée: “Tongana e gbu ngangu, fade e komande legeoko na Lo nga.” (2 Timothée 2:12). Biani, Paul, Timothée na ambeni Chrétien be-ta-zo nga so Nzapa asoro ala ayeke duti na tele ti Jésus na yâ Royaume ni na yayu ti komande. Ala oke si ayeke wara matabisi so?

9 Tongana ti so chapitre 7 ti buku so afa ni kozo, a mû lani na bazengele Jean mbeni suma so na yâ ni lo bâ “Molenge Ti Ngasangbaga [Jésus Christ] aluti na Hoto ti Sion [dutingo ti lo ti Gbia na yayu], na azo [saki] ngbangbo oko na bale-osio na ndo ni [saki] osio ayeke na Lo, ala so a sala iri ti Lo na iri ti Babâ ti Lo na ndo lê ti ala.” Azo 144 000 so ayeke azo wa? Jean lo mveni akiri tënë na e: “Azo so ayeke ala so ague na peko ti Molenge Ti Ngasangbaga na ndo kue so Lo gue. A vo ala so na popo ti azo, si ala ga kozo hale teti Nzapa na teti Molenge Ti Ngasangbaga.” (Apocalypse 14:1, 4). Biani, ala yeke adisciple be-ta-zo ti Jésus Christ so a soro ala gi ti komande na yayu na tele ti lo. Tongana a zingo ala na kuâ ti wara fini na yayu, “fade ala yeke le-gbia na ndo ti azo ti sese” legeoko na Jésus (Apocalypse 5:10, Fini Mbuki, 2001). Ti londo na ngoi ti abazengele ti ga na ni, Nzapa amû ngoi ti soro aChrétien be-ta-zo ti tene na nda ni a wara azo 144 000.

10 Lege so a leke na ye ti tene Jésus na azo 144 000 akomande sese afa na gigi tâ ndoye. E tene tongaso teti kozoni kue Jésus ahinga ye so a hiri a tene dutingo zo na bango pasi. Paul atene so Jésus ayeke pëpe “[mbeni zo so alingbi pëpe ti bâ mawa ti awokongo ti e, NW ], me a tara Lo na ye kue legeoko tongana e, me Lo sala siokpari pëpe.” (aHébreu 4:15; 5:8). Use ni, ala so a soro ala nga ti komande na tele ti lo ahu pono ti aye ti ngangu, na ala gbu ngangu tongana azo. Na ndo ni, ala tiri na awokongo so a dü ala na ni, na ala hon na yâ ti amara ti kobela nde nde. Biani, ala yeke hinga ande akpale ti azo nzoni.

ROYAUME TI NZAPA AYEKE SALA ANDE NYEN?

11 Tongana Jésus atene lani so a lingbi adisciple ti lo asambela ti tene Royaume ti Nzapa aga, lo tene nga so a lingbi ala sambela ti tene a sala “na sese” ye so bê ti Nzapa aye. Nzapa ayeke na yayu, na a-ange be-ta-zo ayeke sala lakue ye so bê ti lo aye kâ. Ye oko, na yâ ti chapitre 3 ti buku so, e manda so mbeni ange so aga sioni azia lani ti sala ye so bê ti Nzapa aye, na lo pusu Adam na Eve ti sala siokpari. Na chapitre 10, fade e yeke manda ye mingi na ndo ti aye so Bible afa na ndo ti sioni ange so e hinga lo na iri ti Satan Zabolo. A zia lege lani na Satan nga na a-ange so asoro ti mû peko ti lo, so a hiri ala ayingo sioni, ti ngbâ na yayu teti mbeni ngoi. Ye so afa so na yayu lani, a yeke a-ange kue pëpe so ayeke kâ si ayeke sala ye so bê ti Nzapa aye. Me aye ayeke gue ti gbian na ngoi so Royaume ti Nzapa ato nda ti komandema ti lo. Fini Gbia ni, Jésus Christ, aleke lani ti sala bira na Satan.—Apocalypse 12:7-9.

12 Atënë ti prophétie ti Apocalypse so afa ye so ayeke si na pekoni: “Na mbi mä mbeni yanga so asala tënë ngangu na yayu, a tene, Fadeso salut, na ngangu, na royaume ti Nzapa ti e, na ngangu ti komande ti Christ ti Lo asi awe; teti a bi [Satan] zo so aklame aita ti e na sese awe, lo so aklame ala na gbele Nzapa lâ na bï.” (Apocalypse 12:10). Mo bâ akota ye use so asi, na so a fa pekoni na yâ ti versê so? Kozo ye ni ayeke so Royaume ti Nzapa so Jésus Christ aga Gbia ni ato nda ti komande. Use ni ayeke so a bi Satan na sese.

13 Aye wa asi na peko ti aye use so? Na ndo ti ye so asi na yayu kâ, e diko: “Tongaso i sala ngia, O ayayu, na i so i duti na yâ ni!” (Apocalypse 12:12). Biani, a-ange be-ta-zo ti yayu awara ngia ngbanga ti so tombango Satan na ayingo sioni ti lo asala si gi acréature ti yingo so ayeke be-ta-zo na Jéhovah Nzapa si angbâ na yayu. A zi lege na tâ siriri nga na mango tele kue ti duti kâ. A yeke sala fadeso na yayu ye so bê ti Nzapa aye.

14 Me ti sese, fadeso a yeke tongana nyen? Bible atene: “Vundu aga na sese na kota ngu ti ingo! Teti zabolo azu na sese na i na ngonzo mingi, teti lo hinga lâ ti lo angbâ mingi pëpe.” (Apocalypse 12:12). Satan ayeke na ngonzo teti so a tomba lo na yayu na ngoi ti lo angbâ mingi pëpe. Na kota ngonzo, lo ga na “vundu” na ndo ti sese. Fade e yeke manda tënë mingi na ndo ti “vundu” so na yâ chapitre ti peko. Me na batango ye so na li, e lingbi ti hunda tele ti e: Tongana nyen Royaume ni alingbi ti sala na sese ye so bê ti Nzapa aye?

15 Biani, dabe mo na ye so Nzapa aye ti sala teti sese. Mo manda tënë na ndo ni awe na chapitre 3. Na Eden, Nzapa afa lani so ye so lo ye ayeke ti tene sese ti e so aga mbeni paradis, so azo so alango dä ayeke mbilimbili na ayeke kui pëpe. Satan apusu lani Adam na Eve ti sala siokpari, na ye so asala si ye so Nzapa aleke ti sala teti sese aga tâ tënë pëpe na ngoi ni kâ. Me ye so achangé ye oko pëpe na yâ ye so Nzapa aleke ti sala. Jéhovah aleke lakue ti tene mbeni lâ, “sese ni aga ye ti héritier ti azo ti mbilimbili, na…ala duti dä lakue.” (Psaume 37:29). Na a yeke ye so Royaume ti Nzapa ayeke sala ande. Na lege wa?

So a tomba na yayu Satan na ayingo sioni ti lo, a ga na vundu na ndo ti azo, me vundu ni ayeke hunzi ande

Bira, kengo ndia, kota nzara

16 Bâ tënë ti prophétie so a wara na Daniel 2:44. Versê ni atene: “Na lâ ti agbia so, fade Nzapa ti yayu ayä royaume so afuti lâ oko pëpe, na Lo zia royaume ni na tïtî ambeni zo nde pëpe; me fade royaume so afâ mbeni royaume so kue ndulu ndulu, na a sala si royaume nde nde so kue awe; na fade royaume so angbâ lakue lakue.” Ye so afa nyen na e na ndo ti Royaume ti Nzapa?

17 Kozoni kue, a fa na e so a yeke zia ande gere ti Royaume ti Nzapa “na lâ ti agbia so,” wala na ngoi so ambeni royaume nde ayeke ngbâ na kusala. Use ni, a fa na e so fade Royaume ni ayeke ngbâ teti lakue. A yeke hon lo na ngangu pëpe, na mbeni ngorogbia nde ayeke mû place ti lo pëpe. Ota ni, e manda so fade bira ayeke sungba na popo ti Royaume ti Nzapa na aroyaume ti sese so. Fade Royaume ti Nzapa ayeke hon ala na ngangu. Na nda ni, lo yeke duti ande gi oko ngorogbia ti komande na ndo ti azo. Na lâ ni kâ, fade azo ayeke wara ngia na gbe ti yanga-ti-komande so komandema ni ahon ti atanga ni kue so ala hinga na yâ fini ti ala.

18 Bible ayeke na atënë mingi ti tene na ndo ti ndangba bira so ayeke sungba na popo ti Royaume ti Nzapa na ayanga-ti-komande ti sese so. Na tapande, lo fa na e so na ngoi so nda ni ayeke pusu ndulu, ayingo sioni na lege ti amvene ayeke handa “agbia ti sese kue”. Ngbanga ti nyen? “Ti bungbi ala [agbia ni] teti bira ti kota lâ ti Nzapa, Lo Ti Ngangu Ahon Kue.” Fade a yeke bungbi agbia so “na ndo so ala di iri ni na yanga ti Hébreu, Harmaguédon.” (Apocalypse 16:14, 16). Ndali ti atënë so a wara na yâ ti aversê use so, a hiri ndangba bira so ayeke sungba na popo ti angorogbia ti azo na Royaume ti Nzapa bira ti Harmaguédon.

19 Royaume ti Nzapa ayeke sala ande nyen na lege ti bira ti Harmaguédon? Kiri mo dabe mo na ye so Nzapa aleke ti sala teti sese. Jéhovah Nzapa aleke lani ti tene sese ni asi na azo ti nzoni, so ayeke mbilimbili-kue na so ayeke sala na lo na yâ Paradis. Me nyen la akanga lege na ye so ti ga tâ tënë laso? Kozoni kue, e yeke awasiokpari, e yeke tï kobela na e yeke kui. Ye oko, na chapitre 5, e manda so Jésus akui lani teti e si e lingbi ngbâ na fini teti lakue lakue. Peut-être mo dabe mo na atënë so a sû na yâ ti Évangile ti Jean: “Nzapa andoye sese so tongaso, Lo mû Molenge ti Lo ngengele oko, si zo so amä na bê na Lo alingbi kui pëpe, me lo yeke na fini ti lakue lakue.”—Jean 3:16.

20 Mbeni kpale ni nde ayeke so azo mingi ayeke sala aye ti sioni. Ala yeke tene mvene, ala yeke sala ye na handa na ala yeke sala pitan. Ala ye pëpe ti sala ye so bê ti Nzapa aye. Na lâ ti bira ti Nzapa so a hiri ni Harmaguédon, fade a yeke futi azo so ayeke sala sioni (Psaume 37:10). Me mbeni ye ni nde so asala si na sese a yeke sala pëpe ye so bê ti Nzapa aye ayeke ngbanga ti so angorogbia ayeke wa azo pëpe ti sala ni. Angorogbia mingi, ngangu atia ala, ala yeke sioni wala tambela ti azo ti yâ ni ayeke kirikiri. Tongaso, Bible atene polele: “Zo akomande mbeni zo, na a sala sioni na lo.”—Zo-ti-fa-tene 8:9.

21 Na peko ti Harmaguédon, gi ngorogbia oko, so ti tene Royaume ti Nzapa, si ayeke komande na ndo ti azo. Royaume so ayeke sala ande na sese ye so bê ti Nzapa aye, na fade a yeke ga na aye ti nzoni na azo. Na tapande, a yeke futi ande Satan na ayingo sioni ti lo (Apocalypse 20:1-3). Na lege ti ngangu ti sandaga ti Jésus, fade azo ti mbilimbili ayeke tï ande kobela mbeni pëpe na ayeke kui mbeni pëpe. Na gbe ti komandema ti Royaume ni, ala yeke wara lege ande ti ngbâ na fini teti lakue lakue (Apocalypse 22:1-3). Fade a yeke sala si sese aga paradis. Na lege so, fade Royaume ti Nzapa ayeke sala na sese ye so bê ti Nzapa aye, na lo yeke sala si iri ti Nzapa aga nzoni-kue. So aye ti tene nyen? A ye ti tene so na nda ni, na gbe ti Royaume ti Nzapa, zo kue ayeke gonda iri ti Jéhovah.

LAWA SI ROYAUME TI NZAPA AYEKE SALA NA SESE YE SO BÊ TI NZAPA AYE?

22 Tongana Jésus atene na adisciple ti lo ti sambela ti tene ‘Royaume ti Nzapa aga’, a yeke polele so Royaume ni ade aga pëpe na ngoi ni kâ. Royaume ni aga lani na ngoi so Jésus ama na yayu? Oko pëpe, ngbanga ti so Pierre na Paul atene so na peko ti londongo ti Jésus na popo ti akuâ, prophétie ti Psaume 110:1 aga tâ tënë na ndo ti lo: “L’Eternel atene na Seigneur ti mbi, Mo duti na koti ti Mbi, juska Mbi sala si awato ti Mo aga mbata ti gere ti Mo.” (Kusala 2:32-35; aHébreu 10:12, 13). Mbeni ngoi ayeke hon kozoni si Royaume ni aga.

Na gbe ti komandema ti Royaume ni, fade a yeke sala na sese ye so bê ti Nzapa aye legeoko tongana a sala na yayu

Lindango ti lâ na ndo ti kota ngu-ingo

23 Ngoi ni ayeke hunzi lawa? A sala fadeso ngu 100 na ndo ni awe, ambeni zo so amanda Bible na bê ti ala kue adiko lani so ngoi ni ayeke hunzi na ngu 1914. (Na ndo ngu so, bâ mbage Ambeni tënë ti bâ na ndo ni.) Aye so asi na ndo ti sese na ngu 1914 nga na pekoni afa so biani awamandango Bible so adiko ye ti ala ni na lege ni. Gango tâ tënë ti aprophétie ti Bible afa so na ngu 1914, Christ aga Gbia na Royaume ti Nzapa ato nda ti komande na yayu. Tongaso, e yeke na yâ “lâ ti [Satan so] angbâ mingi pëpe.” (Apocalypse 12:12; Psaume 110:2). E lingbi nga ti tene na kite pëpe so, na yâ ngoi kete, fade Royaume ti Nzapa ayeke sala na sese ye so bê ti Nzapa aye. Mo bâ ti mo pendere tënë so tongana nyen? Mo mä na bê so a yeke ga ande tâ tënë? Fade chapitre ti peko ayeke mû maboko na mo ti bâ so Bible afa aye so biani.

YE SO BIBLE AFA

  • Royaume ti Nzapa ayeke mbeni ngorogbia na yayu so Jésus Christ si ayeke Gbia ni, na a soro na sese ge azo 144 000 ti gue kâ ti duti agbia na tele ti lo.—Apocalypse 14:1, 4.
  • Royaume ni ato nda ti komande na yayu na ngu 1914, na ti londo na lâ ni so, a tomba Satan na sese.—Apocalypse 12:9.
  • Na yâ ngoi kete, fade Royaume ti Nzapa ayeke futi ayanga-ti-komande ti azo, na fade sese ayeke ga paradis.—Apocalypse 16:14, 16.

Ahundango tënë

1. Sambela wa so azo mingi ahinga ni e yeke bâ tënë na ndo ni fadeso?

2. Fa akozo ye ota so Jésus afa na adisciple ti lo ti sambela ngbanga ni.

3. Ye wa a lingbi e hinga na ndo ti Royaume ti Nzapa?

4. Royaume ti Nzapa ayeke nyen? Zo wa ayeke Gbia ni?

5. Royaume ti Nzapa ayeke duti na ndo wa si lo komande? Lo yeke komande nyen?

6, 7. Aye wa asala si Jésus ayeke mbeni Gbia so ayeke nde mingi?

8. Azo wa ayeke duti na tele ti Jésus ti komande?

9. Azo oke ayeke komande na tele ti Jésus? Lawa si Nzapa ato nda ni ti soro ala?

10. Ngbanga ti nyen ye so a leke ti tene Jésus na azo 144 000 akomande na ndo ti azo afa na gigi tâ ndoye?

11. Ngbanga ti nyen Jésus ahunda lani na adisciple ti lo ti sambela ti tene Nzapa asala ye so bê ti lo aye?

12. Akota ye use wa so asi versê ti Apocalypse 12:10 asala tënë ni?

13. Ye nyen asi na pekoni so a tomba Satan na yayu?

14. Ye nyen asi teti so a bi Satan na sese?

15. Ye wa Nzapa aleke ti sala teti sese?

16, 17. Daniel 2:44 atene nyen na e na ndo ti Royaume ti Nzapa?

18. Iri ti ndangba bira so ayeke sungba na popo ti Royaume ti Nzapa na angorogbia ti sese so ayeke nyen?

19, 20. Aye wa asala si a yeke sala pëpe fade fadeso na sese ye so bê ti Nzapa aye?

21. Na lege wa Royaume ni ayeke sala na sese ye so bê ti Nzapa aye?

22. E hinga tongana nyen so Royaume ti Nzapa aga lani pëpe na ngoi so Jésus ayeke na sese wala fade fade na pekoni so lo kiri na yayu?

23. (a) Lawa si Royaume ti Nzapa ato nda ti komande? (b) E yeke bâ ande tënë wa na chapitre ti peko?

TI HINGA AMBENI TËNË

Ndani nyen ti manda Bible?

Bible ayeke mû maboko laso na azo kutu na kutu na yâ ti dunia kue ti wara akiringo tënë na angangu tënë so ala yeke hunda na yâ ti gigi ti ala. Mo nga kue mo ye ti duti na popo ti ala?