Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible afa nyen biani?

AMBENI TËNË TI BÂ NA NDO NI

“Kota Babylone” ayeke nyen?

“Kota Babylone” ayeke nyen?

MBETI ti Apocalypse amû ambeni tënë so, gi na kozo dikongo ni tongaso, mo lingbi ti gbu nda ni kue pëpe. Na tapande, lo sala tënë ti mbeni wali ti pitan so iri ti lo ayeke “Kota Babylone” na so a sû iri ti lo ni na ndo lê ti lo. A tene so wali so aduti na ndo ti “azo mingi mingi, na amara”. (Apocalypse 17:1, 5, 15). Teti so mbeni tâ wali alingbi pëpe ti sala mara ti ye tongaso, ye so amû lege ti tene so Kota Babylone ni alingbi pëpe ti duti mbeni tâ zo. Me tongana lo yeke tâ zo pëpe, lo yeke nyen?

Mbeti ti Apocalypse 17:18 afa oko wali so tongana mbeni “kota kodoro so akomande agbia ti sese.” Tongana a sala tënë ti “kodoro”, e yeke pensé na azo mingi so abungbi oko na mbeni ndo. Teti so “kota kodoro” so ayeke komande “agbia ti sese”, wali so iri ti lo ayeke Kota Babylone alingbi gi ti duti mbeni kota bungbi so akono juska ti mû ndo ti sese kue na so ayeke na ngangu na ndo ti azo mingi. Na a yeke tâ na lege ni ti bâ Kota Babylone tongana mbeni kota bungbi so atingbi azo mingi na ndo sese kue. Me mara ti bungbi wa la? A yeke mbeni kota bungbi so a yeke wara na yâ ni gi azo ti vorongo nzapa. Bâ tongana nyen ambeni versê ti mbeti ti Apocalypse apusu e ti tene tongaso.

Tongana a sala tënë ti mbeni kota bungbi, a lingbi ti duti bungbi ti poroso, ti dengo buze wala ti vorongo nzapa. Wali so a hiri lo Kota Babylone ayeke ti lo mbeni kota bungbi ti azo ti poroso pëpe, teti Mbeti ti Nzapa atene so “agbia ti sese”, so ti tene abungbi ti poroso ti sese so, “asala pitan” na lo. Pitan ti lo so a sala tënë ni ge aye ti fa ambele so lo te na amokonzi-poroso ti sese so, na a yeke ndali ni la si a hiri lo “kota wali ti pitan”.—Apocalypse 17:1, 2; Jacques 4:4.

Kota Babylone ni alingbi pëpe ti duti mbeni kota bungbi ti azo ti dengo buze, teti a fa so na ngoi so a yeke futi lo, “acommerçant ti sese” ayeke toto kuâ ti lo. Na ti bâ ni nzoni, a fa agbia ti sese nga na azo ti dengo buze a tene ala “luti yongoro” si ala yeke bâ Kota Babylone ni (Apocalypse 18:3, 9, 10, 15-17). Tongaso, a yeke na lege ni ti tene so Kota Babylone ayeke pëpe mbeni kota bungbi ti azo ti poroso wala ti azo ti dengo buze, me a yeke mbeni kota bungbi ti azo ti vorongo nzapa nde nde.

Mbeni ye ni nde so apusu e ti bâ Kota Babylone so tongana mbeni kota bungbi ti avorongo nzapa ayeke so a tene lo handa amara kue na lege ti “tënë ti yorö” ti lo (Apocalypse 18:23). Teti so alege ti salango yorö kue ayeke ti abungbi ti vorongo nga ala londo na ayingo sioni, a yeke ye ti dongo bê pëpe so Bible afa Kota Babylone tongana “da ti ayingo sioni kue”. (Apocalypse 18:2; Deutéronome 18:10-12). A tene nga so kota bungbi so ake tâ na beoko tâ bungbi ti vorongo Nzapa, na lo yeke sala sioni na “aprophète” nga na “azo ti be-vulu”. (Apocalypse 18:24). Sioni bê ti Kota Babylone so na mbage ti tâ bungbi ti vorongo Nzapa ayeke tâ mingi a sala si lo sala sioni mingi na “atémoin ti Jésus” juska même ti fâ ambeni (Apocalypse 17:6). Ni la, a yeke polele so wali so a hiri lo Kota Babylone ayeke gi bungbi ti avorongo nzapa ti wataka ti sese kue. Na yâ ni a wara abungbi ti vorongo nzapa kue so ake Jéhovah Nzapa.

← Bâ chapitre ni