Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible afa nyen biani?

CHAPITRE BALE-OKO NA MBASAMBALA

Ga ndulu na Nzapa na lege ti sambela

Ga ndulu na Nzapa na lege ti sambela

Ngbangba ti nyen a lingbi e sambela Nzapa?

A lingbi e sala nyen si Nzapa amä asambela ti e?

Nzapa ayeke kiri tënë na asambela ti e tongana nyen?

TONGANA a yeke ti haka sese na dunia kue so na yâ ni a yeke wara lâ, nze na atongoro, sese ayeke tâ kete mingi. Biani, na lê ti Jéhovah “so asala yayu na sese”, amara ayeke gi tongana kete goutte ti ngu oko na yâ mbeni seau (Psaume 115:15; Esaïe 40:15). Me Bible atene: “L’Eternel ayeke ndulu na azo kue so adi iri ti Lo, ala so adi iri ti Lo na lege ti tene-biani. Lo mû na ala so akpe mbito ti Lo ye so bê ti ala aye, Lo mä toto ti ala, na Lo sö ala.” (Psaume 145:18, 19). Gbu li kete na ndo ye so tënë so aye ti tene! Lo ti Ngangu Ahon Kue so asala ye kue na dunia ayeke ndulu na e na fade lo yeke mä sambela ti e tongana e ‘di iri ti Lo na lege ti tâ tënë.’ So tâ kota matabisi si e yeke na ni ti sambela Nzapa!

2 Me tongana e ye ti tene Jéhovah amä asambela ti e, a lingbi e sambela lo tongana ti so lo fa ni. Na e lingbi ti sala tongaso gi tongana e hinga ye so Bible afa na ndo sambela. A yeke kota ye mingi ti tene e hinga ye so Bible afa na ndo tënë so, teti sambela amû maboko na e ti kiri ti ga ndulu mingi na Jéhovah ahon ti kozo.

NGBANGA TI NYEN TI SAMBELA JÉHOVAH?

3 Mbeni kota nda ti tënë so apusu e ti sambela Jéhovah ayeke so lo mveni la atisa e ti sambela lo. Mbeti ti lo awa e tongaso, a tene: “I gi bê ti i na ye oko pëpe; me na yâ ye kue i fa na Nzapa ye so i ye, na lege ti sambela na ti hunda mingi na tënë ti merci. Na fade siriri ti Nzapa so ahon bibe kue abata bê ti i na abata bibe ti i na yâ Christ Jésus.” (aPhilippien 4:6, 7). Biani, mara ti kota matabisi tongaso so Mokonzi ti dunia kue azia na gbele e, e ye pëpe ti bâ ni tongana ye senge.

Mbeni wali so ayeke sambela

“Lo so asala yayu na sese” ayeke dengi mê ti lo ndulu ti mä asambela ti e

4 Mbeni nda ti tënë nde so apusu e ti sambela lo ayeke so salango tongaso lakue ayeke kpengba songo ti e na lo. Atâ kamarade ayeke ku gi pëpe ngoi so ala yeke na bezoin ti mbeni ye na mbage ti mba ti to nda ti sala lisoro. Ahon so, anzoni kamarade ayeke bi bê na mba, na songo ti ala ayeke kpengba gi ti gue na li ni na ngoi so ala yeke fa atënë ti bê ti ala na popo ti mba. Na yâ ti aye mingi, ye ni ayeke tongaso nga tongana a ndu songo ti e na Jéhovah Nzapa. Buku so amû maboko na mo mingi awe ti hinga ye so Bible afa na ndo Jéhovah na asalango ye ti lo nga na aye so lo leke ti sala. A mû maboko na mo ti bâ Jéhovah tongana tâ zo biani. Fadeso, sambela ayeke mû lege na mo ti fa atënë ti gbê ti bê ti mo na lo tongana Babâ ti mo so ayeke na yayu. Na ngoi so mo yeke sala tongaso, mo yeke bâ so mo kiri mo ga ndulu mingi na Jéhovah ahon ti kozo.—Jacques 4:8.

A LINGBI E SALA NYEN SI JÉHOVAH AMÄ ASAMBELA TI E?

5 Jéhovah ayeke mä asambela kue? Bâ tënë so lo tene na azo ti Israël so ake yanga ti lo na ngoi ti Prophète Esaïe. Lo tene: “Tongana i sambela lege mingi mingi, fade Mbi mä pëpe; maboko ti i asi na mênë.” (Esaïe 1:15). Tongaso, ambeni ye ayeke dä so tongana e sala ni, a yeke pusu Nzapa ti ke ti mä sambela ti e. Ni la, tongana e ye ti tene Nzapa amä e, a lingbi e sala ambeni ye kozoni si.

6 Kozo ye so a lingbi e sala ayeke ti fa mabe na gigi (Marc 11:24). Bazengele Paul asû na mbeti, lo tene: “Tongana mabe ayeke pëpe, zo alingbi ga nzoni na lê ti Nzapa pëpe; teti zo so aga na Nzapa, a yeke ngbanga ti lo ti mä na bê so Nzapa ayeke, na Lo yeke Zo ti futa ye na ala so agi Lo.” (aHébreu 11:6). Zo so ayeke na tâ mabe ayeke pëpe zo so ahinga gi awe so Nzapa ayeke, na so lo yeke mä sambela. A hunda na lo ti sala akusala ti fa so e yeke na mabe. Ni la, a lingbi e fa na gigi polele na yâ asalango ye ti e ti lâ oko oko so biani e yeke na mabe.—Jacques 2:26.

7 Jéhovah ahunda nga ti tene ala so asambela lo asala ni na tâ be-ti-molenge nga na bê kue. E yeke na anda ti tënë ti duti na tâ be-ti-molenge tongana e yeke sambela Jéhovah? Biani, e yeke na ni. Na tapande, tongana azo awara lege ti sala tënë na mbeni gbia ti kodoro, mingi ka ala yeke sala ye na mbeni lege so afa so ala ne lo ndali ti kota ndo so lo yeke na ni tongana mokonzi. Fadeso e haka ni na Jéhovah tongana e yeke sambela lo: a lingbi e ne kota ndo ti lo ahon ti agbia so pëpe? (Psaume 138:6). Salango tongaso ayeke duti na lege ni teti lo yeke “Nzapa Ti Ngangu Ahon Kue”. (Genèse 17:1). Tongana e sambela Nzapa, a lingbi lege so e yeke ga ndulu na lo na ni afa so e yeda na tâ be-ti-molenge so lo yeke kota ahon e. Mara ti salango ye na tâ be-ti-molenge tongaso ayeke pusu ande e ti tene na lo atënë ti bê ti e tongana e yeke sambela lo, na ti kpe ti kiri gi na ndo ti a-oko tënë lakue.—Matthieu 6:7, 8.

8 Mbeni ye ni nde so a lingbi e sala ti tene Nzapa amä asambela ti e ayeke ti sala ye alingbi na asambela ni. Jéhovah aku na mbage ti e ti sala ye kue so ayeke na ngangu ti e ti wara ye so e hunda na yâ sambela. Na tapande, tongana e tene na Nzapa na yâ sambela ti e ti “mû na e laso kobe ti e ti lâ na lâ”, a lingbi e mû ngangu ti e kue ti sala kua kue so e yeke na ngangu ti sala (Matthieu 6:11; 2 aThessalonicien 3:10). Tongana e sambela ti hon ndo ti mbeni wokongo so e yeke na ni, a lingbi e sala kue ti kpe aye so alingbi ti gue na e ti tï na yâ tara (aColossien 3:5). Me tongana e sala aye ota so a hunda ti sala ti tene Nzapa amä sambela ti e, ambeni tënë nga nde ayeke dä so a lingbi e hinga akiringo tënë ni.

AKIRINGO TËNË NA AMBENI TËNË NA NDO SAMBELA

9A lingbi e sambela zo wa? Jésus afa lani na adisciple ti lo ti sambela “Babâ ti e so ayeke na yayu”. (Matthieu 6:9). So aye ti tene so a lingbi e sambela gi Jéhovah Nzapa. Ye oko, Jéhovah ahunda ti tene e yeda na kota ndo so Molenge ti lo ngengele oko Jésus Christ ayeke na ni. Tongana ti so e manda na chapitre 5, a tokua lani Jésus na sese ti mû fini ti lo ti zi azo na gbe ti ngbâa ti siokpari na kui (Jean 3:16; aRomain 5:12). A yeke lo la Nzapa azia lo Kota Prêtre na Juge (Jean 5:22; aHébreu 6:20). Ndani la Mbeti ti Nzapa awa e ti sambela Nzapa na iri ti Jésus. Lo mveni lo tene: “Mbi yeke Lege ni, na Tene-biani na Fini. Mbeni zo aga na Babâ pëpe, gi na lege ti Mbi.” (Jean 14:6). Ti tene Nzapa amä asambela ti e, a lingbi e sambela tâ gi Jéhovah oko na lege ti Molenge ti lo.

10A fa lege so a lingbi e duti na ni si e sambela? Ên-ën. Jéhovah afa pëpe mbeni lege so a lingbi e leke na maboko ti e wala e duti na ni kozoni si e sambela lo. Bible afa so a yeke na lege ni ti sambela atâa e duti dutingo, e kuku na gere ti e wala e luti lutingo (1 Chronique 17:16; Néhémie 8:6; Daniel 6:10; Marc 11:25). Kota ye ni ayeke pëpe lege so e yeke duti na ni so azo alingbi ti bâ ni, me a yeke lege so e leke na bê ti e nzoni. Biani, na ngoi so e yeke sala kua ti e ti lâ oko oko wala na ngoi so mbeni ye ti ngangu asi so a hunda ti sala ye hio, e lingbi ti sambela na yâ ti bê ti e wala na kete go na ndo kue so e yeke dä. Jéhovah ayeke mä asambela tongaso même tongana azo so ayeke na tele ti e ahinga pëpe so e yeke sambela.—Néhémie 2:1-6.

11Atënë wa la e lingbi ti zia na yâ ti asambela ti e? Bible atene: “E zia bê ti e na Lo tene ti ye so: tongana e hunda ye na lege ti ye so Lo ye, Lo mä e.” (1 Jean 5:14). Tongaso, tënë kue so ague oko na ye so bê ti Nzapa aye, e lingbi ti zia ni na yâ ti sambela. Jéhovah aye si e sambela lo na ndo ti ambeni ye so agbu bê ti e mingi? Biani, lo ye tongaso. Sambela so e yeke tene na Jéhovah ayeke tongana mbeni lisoro so e yeke sala na mbeni kota kamarade ti e. E lingbi ti zi bê ti e na Nzapa ti ‘fa tënë ti bê ti e na gigi’ na lo (Psaume 62:9). A yeke na lege ni tongana e hunda Nzapa yingo vulu ti lo, teti yingo vulu ayeke mû maboko na e ti sala ye so ayeke nzoni (Luc 11:13). E lingbi nga ti hunda lo ti mû maboko na e ti mû anzoni desizion nga ti wara ngangu ti hon ndo ti akpale ti e (Jacques 1:5). Tongana e sala siokpari, a lingbi e hunda pardon na Nzapa na lege ti sandaga ti Christ (aEphésien 1:3, 7). Biani, a lingbi atënë so e zia na yâ ti asambela ti e aduti pëpe gi aye so andu gi e mveni. A lingbi e gi ti pensé nga na ambeni zo, na tapande azo ti da ti e nga na aita ti e ti bungbi.—Kusala 12:5; aColossien 4:12.

Azo so ayeke sambela na yâ ti aye nde nde

Nzapa alingbi ti mä sambela ti mo na ngoi kue

12 A lingbi akozo ye so e gi ti yôro na yâ ti asambela ti e aduti atënë so andu Jéhovah Nzapa. Biani, e yeke na anda ti tënë ti sepela lo na bê ti e kue na ti kiri singila na lo ndali ti nzobe so lo fa (1 Chronique 29:10-13). Jésus afa tapande ti mbeni sambela so a wara ni na Matthieu 6:9-13; na yâ ni, lo fa na e ti sambela ti tene iri ti Nzapa aga nzoni-kue. Na pekoni, lo fa ti sambela ti tene Royaume ti Nzapa aga na ti tene a sala na sese ye so bê ti lo aye legeoko tongana a sala na yayu. A yeke gi na pekoni so lo hunzi ti fa aye so andu Jéhovah awe si Jésus afa tënë ti aye so andu zo ni mveni, so lo lingbi ti zia ni na sambela. Tongana e sala tongana ti so lo fa ni, ti zia Nzapa aga na kozo ndo na yâ asambela ti e, e yeke fa so tënë so agbu bê ti e ayeke gi pëpe nzoni ti e mveni.

13A fa tënë na ndo ti yongo ti asambela ti e? Na ndo asambela so e yeke tene ni gi e oko wala na iri ti gbâ ti azo, Bible afa pëpe tënë na ndo ti yongo ti asambela so. Asambela ni alingbi ti duti gi ndulu, na tapande tongana e yeke na tele ti kobe. A lingbi nga ti yo, na tapande tongana e yeke zi bê ti e na Jéhovah na ndo ti mbeni tënë (1 Samuel 1:12, 15). Me Jésus afâ ngbanga lani na ndo ti azo so abâ tele ti ala nzoni ahon azo kue, na so ayeke mû ayongoro sambela gi ti tene azo abâ ala (Luc 20:46, 47). Mara ti asambela tongaso asala ye oko pëpe na Jéhovah. Kota ye ni ayeke ti tene asambela ti e alondo na bê. Ni la, asambela kue so Nzapa ayeke mä alingbi ti yo alingbi tele pëpe, teti sambela oko oko ague oko na aye so zo ni aye wala so asi na lo.

14A lingbi e sambela lege oke? Bible awa e ti ‘sambela lakue, ti zia pëpe’ na ti “zia ti sambela pëpe.” (Luc 18:1; aRomain 12:12; 1 aThessalonicien 5:17). Biani, aversê so aye ti tene pëpe so a lingbi a bâ e gi na sambelango ni ti londo na ndapelele juska ti si na bï. Nde na so, Bible ayeke wa e ti sambela lakue, ti ngbâ lakue ti kiri singila na Jéhovah ndali ti nzobe ti lo na mbage ti e nga ti kpe na mbage ti lo ti wara fango lege, dengo bê nga na ngangu. A yeke ye ti dengo bê biani ti bâ so Jéhovah azia katikati pëpe na yongo ti asambela ti e, na lo fa pëpe fani oke si e lingbi ti sambela lo. Tongana e bâ matabisi ti sambela tâ na nene ni biani, fade lege ayeke zi na e mingi ti sambela Babâ ti e ti yayu.

15Ngbanga ti nyen a lingbi e tene “Amen” na hunzingo ti mbeni sambela? Tënë “Amen” aye ti tene “ni la”, wala “zia a duti gi tongana ti so a tene”. Atapande so a wara na Mbeti ti Nzapa afa so a yeke na lege ni ti tene “Amen” na hunzingo ti asambela ti e wala ti asambela so a tene ni na iri ti gbâ ti azo (1 Chronique 16:36; Psaume 41:14). Tongana e tene “Amen” na hunzingo ti sambela ti e mveni, e fa so atënë so e tene na yâ ti sambela ni, a yeke tâ na bê ti e kue si e tene ni. Tongana e tene “Amen” atâa gi yeke wala na kota go, na hunzingo ti sambela ti mbeni zo, e yeke fa so e yeda na atënë so lo tene na yâ ti sambela ni.—1 aCorinthien 14:16.

NZAPA AYEKE KIRI TËNË NA ASAMBELA TI E TONGANA NYEN?

16 Jéhovah ayeke kiri tënë biani na asambela ti e? Biani, lo yeke kiri tënë na ni. E yeke tâ na kota nda ti tënë ti duti na kite pëpe so Nzapa ‘so amä sambela’ ayeke mä asambela so alondo na bê ti azo kutu mingi (Psaume 65:3). Jéhovah alingbi ti kiri tënë na asambela ti e na alege nde nde.

17 Jéhovah ayeke sala kusala na a-ange nga na awakua ti lo na sese ti kiri tënë na asambela (aHébreu 1:13, 14). Atapande ayeke dä mingi ti ambeni zo so asambela lani Nzapa ti mû maboko na ala ti gbu nda ti Bible na so kete na pekoni, ala wara vizite ti mbeni Témoin ti Jéhovah. Atapande tongaso afa polele na gigi so a-ange ayeke fa lege na awakua ti Jéhovah na yâ kusala ti fango nzo tënë ti Royaume (Apocalypse 14:6). Ti kiri tënë na asambela so e yeke tene na lo na ngoi ti ngangu, Jéhovah alingbi ti pusu mbeni Chrétien ti ga ti mû maboko na e.—aProverbe 12:25; Jacques 2:16.

18 Jéhovah Nzapa asala nga kusala na yingo vulu ti lo nga na Tënë ti lo, Bible, ti kiri tënë na asambela ti awakua ti lo. Ti kiri tënë na e tongana e hunda lo mungo maboko ti hon ndo ti akpale ti e, lo lingbi ti fa lege na e nga ti mû ngangu na e na lege ti yingo vulu ti lo (2 aCorinthien 4:7). Fani mingi, e yeke wara kiringo tënë na sambela ti e na yâ ti Bible, na a yeke na lege so si Jéhovah ayeke mû maboko na e ti mû adesizion na lege ti ndara. Na ngoi so e yeke manda Bible e mveni, e lingbi ti tï na ndo ti ambeni versê so andu e, na a lingbi ti duti nga tongaso tongana e diko mbeni mbeti nde ti aTémoin ti Jéhovah, na tapande buku so. E lingbi nga ti wara kiringo tënë na asambela ti e ni na lege ti mbeni ye so a fa na bungbi wala na lege ti tënë ti yanga ti mbeni ancien so abi bê ti lo na e mingi.—aGalate 6:1.

Mbeni koli na wali ti lo ayeke mû maboko na mbeni mbakoro

Ti kiri tënë na asambela ti e, Jéhovah alingbi ti pusu mbeni Chrétien ti ga ti mû maboko na e

19 Tongana kiringo tënë ti Jéhovah na asambela ti e aga hio pëpe tongana ti so e ku tele ti e na ni, zia e tene na li ti e lâ oko pëpe so a yeke ngbanga ti so Jéhovah ayeke na ngangu pëpe ti kiri tënë na asambela ni. Nde na so, a lingbi e dabe ti e so Jéhovah ayeke kiri tënë na asambela alingbi na ye so lo ye nga na ngoi so lo bâ so alingbi awe ti tene lo kiri tënë na ni. Lo hinga nzoni mingi ahon e aye so e yeke na bezoin ni nga tongana nyen ti kiri tënë na ni. Fani mingi, lo bâ so a yeke nzoni e ngbâ ti ‘hunda, ti gi na ti pika yanga-da’. (Luc 11:5-10). Na salango tongaso, e yeke fa na Nzapa so tënë ni agbu bê ti e tâ ngangu na e yeke na tâ mabe. Na ndo ni, Jéhovah alingbi ti kiri tënë na asambela ti e na mbeni lege so e bâ ti e ni pëpe. Na tapande, tongana e sambela lo ndali ti mbeni kpale, lo lingbi ti kiri tënë na ni pëpe na zingo kpale ni me na mungo na e ngangu so e yeke na bezoin ni ti luti na gbele ni.—aPhilippien 4:13.

20 E lingbi biani ti tene singila mingi na Jéhovah, Lo so asala kota dunia, ndali ti so lo yeke ndulu na ala kue so ayeke sambela lo tongana ti so lo fa (Psaume 145:18). Zia e sambela Jéhovah lakue teti a yeke kota matabisi la e yeke na ni so ti sambela lo. Tongana e sala tongaso, fade e yeke wara ngia mingi ti bâ so e kiri e ga tâ ndulu mingi na Jéhovah, Lo so lo mä asambela.

YE SO BIBLE AFA

  • Tongana e yeke sambela Jéhovah lakue, a yeke sala si e kiri e ga ndulu mingi na lo ahon ti kozo.—Jacques 4:8.
  • Ti tene Nzapa amä asambela ti e, a lingbi e sambela lo na mabe, na tâ be-ti-molenge nga na bê kue.—Marc 11:24.
  • A lingbi e sambela gi Jéhovah oko na lege ti Molenge ti lo.—Matthieu 6:9; Jean 14:6.
  • Jéhovah, ‘Lo so Lo mä sambela,’ ayeke sala kusala na a-ange ti lo, awakua ti lo na sese, yingo vulu ti lo nga na Tënë ti lo Bible ti kiri tënë na asambela ti e.—Psaume 65:3.

Ahundango tënë

1, 2. A lingbi e bâ sambela tongana tâ kota matabisi ngbanga ti nyen? Ngbanga ti nyen a yeke nzoni ti hinga ye so Bible afa na ndo sambela?

3. Mbeni kota nda ti tënë oko so apusu e ti sambela Jéhovah ayeke so wa?

4. Ti sambela Jéhovah lakue ayeke kpengba songo ti e na lo tongana nyen?

5. Ye nyen afa so Jéhovah ayeke mä asambela kue pëpe?

6. Ti tene Nzapa amä asambela ti e, kozo ye so a lingbi e sala ayeke nyen? Na e lingbi ti sala ni tongana nyen?

7. (a) Ngbanga ti nyen a yeke nzoni e fa so e ne kota ndo ti Jéhovah tongana e yeke sambela lo? (b) Tongana e yeke sambela Nzapa, e lingbi ti fa tongana nyen so e yeke na tâ be-ti-molenge nga so atënë ti e alondo na bê?

8. E lingbi ti sala ye alingbi na asambela ti e tongana nyen?

9. A lingbi e sambela zo wa, nga e sambela lo na lege ti zo wa?

10. Ngbanga ti nyen a fa pëpe lege so a lingbi e duti na ni ti sambela?

11. Ambeni tënë wa so andu gi e mveni, e lingbi ti zia na yâ ti asambela ti e?

12. E lingbi ti sala tongana nyen ti tene aye so andu Babâ ti e ti yayu aga na kozo ndo na yâ asambela ti e?

13. Mbeti ti Nzapa atene ti lo nyen na ndo yongo ti asambela ti e?

14. Bible aye ti tene nyen tongana lo wa e ti “zia ti sambela pëpe”? Ye nyen adë bê ti e na yâ tënë so?

15. Ngbanga ti nyen a lingbi e tene “Amen” na hunzingo ti asambela ti e mveni wala ti so ambeni zo atene na iri ti gbâ ti azo?

16. Tongana a yeke tënë ti sambela, e yeke na kite oko pëpe na ndo nyen?

17. Ngbanga ti nyen e lingbi ti tene so Nzapa ayeke sala kusala na a-ange nga na awakua ti lo na sese ti kiri tënë na asambela ti e?

18. Jéhovah ayeke sala kusala tongana nyen na yingo vulu nga na Bible ti kiri tënë na asambela ti awakua ti lo?

19. A lingbi e bata nyen na li tongana, na ambeni ngoi, e bâ ti e so Jéhovah ayeke kiri tënë pëpe na sambela ti e?

20. Ngbanga ti nyen a lingbi e gbu ngangu matabisi ti e ti sambela Jéhovah lakue?