Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible afa nyen biani?

CHAPITRE BALE-OKO NA MIOMBE

Tënë ti batême na songo ti mo na Nzapa

Tënë ti batême na songo ti mo na Nzapa

Tongana mbeni zo aye ti wara batême tongana Chrétien, a yeke batize lo tongana nyen?

Aye wa a lingbi mo sala ni kozo ti lingbi na batême?

Zo ayeke mû tele ti lo na Nzapa na lege wa?

Kota nda ti tënë so ayeke pusu e ti wara batême ayeke nyen?

NA NGOI ti abazengele lani, mbeni Chrétien so iri ti lo ayeke Philippe amû ngoi ti lo ti fa na mbeni kota zo ti Ethiopie so Jésus la ayeke Messie so a fa tënë ti lo na zendo. Tënë so a fa na kota zo so na yâ Mbeti ti Nzapa andu bê ti lo ngangu, si lo yeda ti sala mbeni ye. A si na mbeni place, koli ti Ethiopie so atene na Philippe: “Bâ, ngu ayeke, ye nyen akanga lege na mbi ti wara batême?” Na lege so, lo fa so lo ye lani ti wara batême.—Kusala 8:26-36.

Kota zo ti yangbo ti Éthiopie na ngoi ti aChrétien

2 Tongana mo wara lege awe ti manda nzoni akozo chapitre ti buku so na tele ti aTémoin ti Jéhovah, bê ti mo alingbi ti pusu mo ti tene: ‘Nyen la akanga lege na mbi ti wara batême?’ Juska fadeso, mo manda aye na ndo zendo so Bible afa ni ti fini ti lakue lakue na yâ Paradis (Luc 23:43; Apocalypse 21:3, 4). Mo manda nga so azo so akui ahinga ye oko pëpe me beku ayeke dä ti tene ala kiri na fini (Zo-ti-fa-tene 9:5; Jean 5:28, 29). Peut-être mo yeke ga na abungbi ti aTémoin ti Jéhovah a ninga kete awe, na mo bâ na lê ti mo tongana nyen ala yeke fa na yâ fini ti ala tâ lege so a lingbi a voro Nzapa (Jean 13:35). Na kota ye ni ahon kue ayeke so peut-être mo to nda ti lë songo na Jéhovah Nzapa awe.

3 Na lege wa mo lingbi ti fa so mo ye ti sala na Nzapa? Jésus atene na adisciple ti lo: ‘I gue, i fa tënë na amara kue si ala ga adisciple, i batize ala.’ (Matthieu 28:19). Jésus mveni azia tapande na lege so: lo nga kue a batize lo na ngu. A mû gi ngu ni a tuku na tele ti lo wala na li ti lo pëpe (Matthieu 3:16). Tënë “batize” alondo na mbeni tënë ti yanga ti Grec so aye ti tene “yôro kue na ngu”. Tongaso, ti batize mbeni zo si lo ga Chrétien aye ti tene ti yôro lo kue na ngu.

4 Azo kue so aye ti sala songo na Jéhovah Nzapa, a yeke hunda na ala ti wara batême. Batême ni ayeke fa na lê ti azo polele so mo yeke na nzara ti sala na Nzapa. A fa so mo yeke na ngia ti sala ye so bê ti Jéhovah aye (Psaume 40:8, 9). Ye oko, ti lingbi na batême, a hunda mo ti sala ambeni ye kozo.

A HUNDA TI WARA HINGANGO YE NGA NA MABE

5 Mo to nda ti salango kozo ye ni awe. Na lege wa? Na lege so mo manda ti hinga Jéhovah Nzapa na Jésus Christ, peut-être na mandango Bible yeke yeke na lege ti mbeni kapa (Jean 17:3). Me aye angbâ na mo mingi ti manda. A-Chrétien ayeke na nzara ti “hinga biani ye so Lo [Nzapa, lo] ye”. (aColossien 1:9). Tongana mo yeke ga na abungbi ti aTémoin ti Jéhovah, a yeke mû maboko na mo mingi ti wara hingango ye so. A yeke kota ye mingi ti ga na abungbi so (aHébreu 10:24, 25). Ti ga na abungbi so lakue ayeke mû ande maboko na mo ti hinga ye mingi na ndo ti Nzapa.

Ti wara tâ hingango ye ti Mbeti ti Nzapa ayeke mbeni kota ye ti sala kozoni na batême

Mandango Bible

6 Biani, a hunda pëpe na mo ti hinga ye kue na yâ ti Bible si mo lingbi na batême. Kota zo ti Ethiopie so Philippe afa tënë na lo ayeke lani na mbeni hingango ye awe na ndo Mbeti ti Nzapa, me atâa so kue lo hunda ti tene a mû maboko na lo ti gbu nda ti ambeni versê (Kusala 8:30, 31). Legeoko nga, mo yeke na aye mingi so angbâ ti tene mo manda. Na ti tâ tënë ni, mo yeke ngbâ ande lakue ti manda ye na ndo ti Nzapa (Zo-ti-fa-tene 3:11). Ye oko, kozoni ti tene a zi lege na mo ti wara batême, a hunda mo ti hinga akozo fango ye ti Bible na ti yeda na ni (aHébreu 5:12). Na yâ ti akozo fango ye ti Bible so, a yeke wara tâ tënë na ndo dutingo ti ala so akui, nga nene ti hinga iri ti Nzapa na Royaume ti lo.

7 Me gi ti hinga aye na yâ Bible alingbi pëpe, teti “tongana mabe ayeke pëpe, zo alingbi ga nzoni na lê ti Nzapa pëpe”. (aHébreu 11:6). Bible atene na e so tongana ambeni zo ti gbata ti Corinthe giriri amä fango tënë ti aChrétien, “ala mä na bê, na ala kamata batême.” (Kusala 18:8). Legeoko nga, a lingbi ye so mo yeke manda na yâ Bible apusu mo ti mä na bê so biani Bible ayeke Tënë ti Nzapa. A lingbi a pusu mo ti duti na mabe na yâ azendo ti Nzapa nga na yâ ngangu so sandaga ti Jésus ayeke na ni ti sö fini ti mo.—Josué 23:14; Kusala 4:12; 2 Timothée 3:16, 17.

FA TÂ TËNË TI BIBLE NA AMBENI ZO

8 Na ngoi so mabe ti mo ayeke kono ti gue na li ni, mo yeke bâ so mo yeke gi na nzara ti tene na ambeni zo tënë ti aye so mo yeke manda (Jérémie 20:9). Tongaso, bê ti mo ayeke pusu mo ngangu ti fa na ala tënë na ndo Nzapa nga na aye so lo leke ti sala.—2 aCorinthien 4:13.

A lingbi mabe apusu mo ti fa tënë na ambeni zo

Mbeni koli so ayeke fa tënë ti mabe ti lo

9 Mo lingbi ti to nda ti fa tâ tënë ti Bible na ambeni zo. Peut-être, na lege ti ndara, mo yeke sala lisoro na ndo ni na afami ti mo, akamarade ti mo, azo so alango ndulu na mo nga na azo ti place ti kua ti mo. Tongana ngoi ayeke hon, mo yeke duti ande na nzara ti tï na popo ti aTémoin ti Jéhovah ti fa tënë legeoko na ala. Tongaso, duti na kamene pëpe ti sala tënë ni polele na Témoin ti Jéhovah so ayeke manda Bible na mo. Tongana a bâ polele so mo lingbi awe ti fa tënë na tele ti aita ti kongregation, fade a yeke leke ti tene mo na ita so ayeke manda Bible na mo awara tele na a-ancien use ti sala lisoro.

10 Ye so ayeke mû lege ande na mo ti hinga tele nzoni na ambeni ancien ni so ayeke bâ ndo na ndo ti kongregation ti Nzapa (Kusala 20:28; 1 Pierre 5:2, 3). A-ancien ni ayeke gi ti bâ wala mo gbu nda ti akozo fango ye ti Bible nzoni awe na mo mä na bê dä. Nga, ala yeke gi ti bâ wala mo yeke bata andia ti Nzapa na yâ fini ti mo na mo ye biani ti ga Témoin ti Jéhovah. Tongana ala bâ so mo sala aye so kue, ala yeke tene ande na mo so mo lingbi ti to nda ti fa tënë na tele ti aita ti kongregation.

11 Me a-ancien so alingbi ti bâ peut-être so a yeke nzoni mo gbian ambeni ye na yâ fini ti mo kozoni si a zi lege na mo ti fa tënë legeoko na kongregation. Peut-être ala bâ so a lingbi mo zia lege ti ambeni ye so mo ngbâ ti sala me so ambeni zo abâ ni pëpe. Ni la, kozoni si mo hunda ti ga wafango tënë, a yeke ti mo ti zia lege ti salango akota siokpari tongana pitan, nyongo ye ahon ndo ni nga na nyongo mbangi.—1 aCorinthien 6:9, 10; aGalate 5:19-21.

A HUNDA MO TI GBIAN BÊ TI MO NGA NA LEGE TI MO

12 A hunda nga na mo ti sala ambeni ye nde ti lingbi na batême. Bazengele Pierre atene: “I changé bê ti i, i changé lege ti i, si Nzapa alingbi mbô siokpari ti i.” (Kusala 3:19). Ti gbian bê ti mo aye ti tene ti sala vundu na yâ bê ti mo kâ teti mbeni ye so mo sala. Ti mbeni zo so kozo lo bi tele ti lo na yâ aye ti pitan, a yeke duti na lege ni tongana a hunda lo ti gbian bê ti lo. Ye oko, même mbeni zo so kozo lo bi tele ti lo pëpe na yâ tambela ti kirikiri, a ku nga na mbage ti lo ti gbian bê ti lo. Ngbanga ti nyen tongaso? Ngbanga ti so azo kue na sese ayeke awasiokpari na ala kue aku na mbage ti Nzapa ti pardone siokpari ti ala (aRomain 3:23; 5:12). Kozoni si mo manda Bible, mo hinga lani pëpe ye so bê ti Nzapa aye. Tongaso, a yeke fade ngangu na mo ti leke fini ti mo ti lingbi na ye so Nzapa aye. Ndani la a hunda mo ti gbian bê ti mo.

13 Na pekoni so mo gbian bê ti mo awe, a hunda nga na mo ti gbian lege ti mo. A lingbi mo gbian bê ti mo na mo ngbâ gi ge pëpe. A lingbi mo ke nga angbele salango ye ti mo na mo leke na bê ti mo ti tene fadeso mo sala gi ye so ayeke nzoni. Ti gbian bê ti mo na ti gbian lege ti mo ayeke aye so a lingbi mo sala ni kozo si mo wara batême.

A HUNDA MO TI MÛ TELE TI MO NA NZAPA

14 Mbeni kota ye nde ti sala ayeke dä kozoni ti wara batême. A lingbi mo fa na Jéhovah na yâ sambela so mo mû tele ti mo na lo.

15 Tongana mo tene na Jéhovah Nzapa na yâ sambela so mo yeke mû tele ti mo na lo, mo yeke mû zendo so fade mo yeke sala gi na lo na lâ ti fini ti mo kue (Deutéronome 6:15). Me ngbanga ti nyen mbeni zo ayeke sala nzara ti mû tele ti lo na Nzapa tongaso? Zia e mû mbeni tapande: mbeni koli ato nda ti sala nzara ti mbeni wali. Tongana ngoi ayeke hon si lo yeke hinga lo nzoni ahon ti kozo na lo yeke bâ anzoni salango ye ti lo, bê ti lo ayeke pusu lo gi ti ye wali so mingi. Na nda ni, a yeke duti na lege ni ti tene lo hunda wali ni ti sala mariage na lo. Tâ tënë, ti sala mariage aye ti tene ande so lo wara ambeni kungba ti yô na ndo ni. Me ndoye ayeke pusu ande lo ti sala ni.

16 Legeoko nga, tongana mo wara lege ti hinga Jéhovah nzoni na ti ye lo, bê ti mo ayeke pusu mo ti sala na lo na ngangu ti mo kue, na mo yeke gi lakue ti sala ye mingi na ndo ni na yâ vorongo ti lo. Zo kue so aye ti mû peko ti Molenge ti Nzapa, Jésus Christ, a lingbi lo “ke tele ti lo mveni”. (Marc 8:34). E yeke ke tele ti e na lege so e yeke sala kue si anzara ti bê ti e nga na aye so e zia na gbele e ti sala akanga lege pëpe na e ti mä yanga ti Nzapa na yâ ye kue. Ni la, kozoni si mo lingbi na batême, a lingbi mo fa so ye so aga kozo na yâ fini ti mo ayeke salango ye so bê ti Jéhovah Nzapa aye.—1 Pierre 4:2.

HON NDO TI SALANGO MBITO TI TÏ

17 Ambeni zo aye ti mû tele ti ala na Jéhovah pëpe teti so ala sala mbito ti mû mara ti kota desizion tongaso. Peut-être ala sala mbito ti duti na tënë ti kiri na ni na Nzapa teti so ala mû tele ti ala na lo awe. Ala sala mbito ti tï na pekoni na ti bi vundu na bê ti Jéhovah, na ye so apusu ala ti pensé so a hon tënë ala mû tele ti ala na Nzapa pëpe.

18 Na ngoi so mo yeke manda ti ndoye Jéhovah, bê ti mo ayeke pusu ande mo ti mû tele ti mo na lo na ti sala ye alingbi na yanga so mo mû na lo (Zo-ti-fa-tene 5:3). Tongana mo mû tele ti mo na Nzapa awe, kite ayeke pëpe so mo yeke ye ande ti “tambela na lege so alingbi na Seigneur, ti mû ngia na Lo na yâ ye kue”. (aColossien 1:10). Teti so mo ndoye Nzapa, mo yeke tene ande pëpe so a yeke tâ ngangu mingi ti sala ye so lo ye. Kite ayeke pëpe so mo yeke ye ande dä na tënë ti bazengele Jean so: “So ayeke ndoye ti Nzapa: e bata komandema ti Lo. Na komandema ti Lo ayeke tongana nengo ye pëpe.”—1 Jean 5:3.

19 A hunda pëpe ti tene mo duti mbilimbili-kue kozoni si mo mû tele ti mo na Nzapa. Jéhovah ahinga so aye ayeke dä so mo lingbi ti sala pëpe, na lo ku lâ oko pëpe na mbage ti mo ti sala aye so ahon ngangu ti mo (Psaume 103:14). Lo ye si mo wara nzoni, na fade lo yeke mû maboko na mo (Esaïe 41:10). Hinga biani so tongana mo zia bê ti mo kue na Jéhovah, “fade Lo sala si lege ti mo aga mbilimbili.”—aProverbe 3:5, 6.

FA SO MO MÛ TELE TI MO NA NZAPA AWE NA WARANGO BATÊME

20 Tongana mo gbu li ti mo na ndo ti aye so e fa fade ge, ye so alingbi ti mû maboko na mo ti mû tele ti mo na Jéhovah na yâ sambela. Zo kue so aye Nzapa tâ na bê ti lo, a lingbi lo “sala tënë ni na gigi na yanga ti lo ti wara salut.” (aRomain 10:10). Mo yeke sala ni tongana nyen?

Mo mû tele ti mo na Nzapa awe na yâ sambela?

Mbeni koli so ayeke sambela

21 Tongana mo ye ti wara batême, sala tënë ni na surveillant-président ti kongregation ti mo. Fade lo yeke leke ti tene ambeni ancien abâ na mo ambeni hundango tënë so afa akozo fango ye ti Bible so a lingbi mo hinga ni. Tongana a-ancien so abâ so mo lingbi awe, ala yeke tene ande na mo so mo lingbi ti wara batême na kota bungbi so ayeke ga.* Na ngoi ti akota bungbi tongaso, a yeke leke ka mbeni diskur so ayeke fa nda ti batême. Na pekoni, ita so amû diskur ni ayeke tisa ala so kue aye ti wara batême na kota bungbi ni ti kiri tënë na ahundango tënë use. A yeke mbeni lege teti ala ti “sala tënë” ti mabe ti ala “na gigi”.

22 A yeke batême ni mveni la ayeke fa na gigi so mo mû tele ti mo na Nzapa awe na fadeso mo yeke Témoin ti Jéhovah. A yeke batize azo ni na yorongo ala kue na ngu ti fa na gigi so ala mû tele ti ala na Jéhovah.

NDA TI BATÊME SO MO WARA

23 Jésus atene so fade a yeke batize adisciple ti lo “na iri ti Babâ, na ti Molenge, na ti Yingo Vulu”. (Matthieu 28:19). So aye ti tene so zo ni so aye ti wara batême ayeda na ngangu ti komande ti Jéhovah Nzapa na ti Jésus Christ (Psaume 83:19; Matthieu 28:18). Nga, lo hinga so yingo vulu ayeke ngangu ti Nzapa ti sala na kusala, na lo yeda na kusala ti yingo vulu so.—aGalate 5:22, 23; 2 Pierre 1:21.

Batême ayeke tongana ti so e kui awe na lege ti angbele salango ye ti e na e yeke fadeso na fini ti sala ye so bê ti Nzapa aye

Mbeni koli so ayeke wara batême

24 Ye oko, batême ayeke gi tënë ti yorongo tele ti mo mveni na ngu pëpe. A yeke fä ti mbeni ye so ayeke kota mingi. Tongana a yôro zo ni na ngu, a yeke tongana ti so zo ni akui awe na lege ti angbele salango ye ti lo. Tongana a sigigi na lo na ngu, a yeke tongana ti so lo kiri fadeso na fini ti sala ye so bê ti Nzapa aye. Dabe mo nga so mo mû tele ti mo na Jéhovah Nzapa lo mveni me pëpe na mbeni kusala, mbeni zo wala na mbeni bungbi. Mungo tele ti mo na Nzapa nga na warango batême ayeke tongo nda ti mbeni tâ salango kamarade na Nzapa, mbeni songo so ayeke tingbi mo na lo ngangu.—Psaume 25:14.

25 Batême ni lo mveni ayeke mû salut na zo pëpe. Bazengele Paul asû na mbeti, lo tene: “Na lege ti mbito na dongo tele, i sala si salut ti i aga tâ ye.” (aPhilippien 2:12). Ye so afa so batême ayeke gi tongo nda ni, me na pekoni aye ti salango ni angbâ. Hundango tënë ni ayeke so: mo lingbi ti sala nyen ti ngbâ na yâ ndoye ti Nzapa? Fade ndangba chapitre ti buku ti e ayeke kiri tënë na ni.

YE SO BIBLE AFA

  • Ti batize mbeni zo si lo ga Chrétien, a hunda ti tene a yôro lo kue na ngu, me pëpe a tuku gi ngu na tele ti lo.—Matthieu 3:16.
  • Aye so a hunda na mbeni zo ti sala kozoni na batême ayeke ti wara hingango ye, ti fa so lo yeke na mabe, ti gbian bê ti lo, ti gbian lege ti lo na ti mû tele ti lo na Nzapa na yâ sambela.—Jean 17:3; Kusala 3:19; 18:8.
  • Ti mû tele ti mo na Jéhovah, a lingbi mo ke tele ti mo mveni, na tapande ti azo so ake tele ti ala mveni lani ti ga disciple ti Jésus.—Marc 8:34.
  • Batême ayeke tongana ti so zo ni akui awe na lege ti angbele salango ye ti lo na lo yeke fadeso na fini ti sala ye so bê ti Nzapa aye.—1 Pierre 4:2.

*  A yeke leke ka lakue ti tene, na angoi ti akota bungbi so aTémoin ti Jéhovah ayeke sala, batême aduti dä.


Ahundango tënë

1. Ngbanga ti nyen mbeni kota zo ti Ethiopie ahunda ti wara batême?

2. Ngbanga ti nyen a lingbi mo gbu li ti mo nzoni na ndo tënë ti warango batême?

3. (a) Jésus amû lani komandema wa na adisciple ti lo? (b) Tongana mbeni zo aye ti ga Chrétien, a yeke batize lo tongana nyen?

4. Batême ti mbeni zo ayeke fa nyen na gigi?

5. (a) Kozo ye so a hunda mo ti sala ti lingbi na batême ayeke nyen? (b) Ngbanga ti nyen a yeke kota ye mingi ti ga na abungbi?

6. A hunda ti tene hingango ye ti mo akono tongana nyen si mo lingbi na batême?

7. A lingbi ye so mo yeke manda na yâ Bible asala nyen na ndo mo?

8. Ye nyen ayeke pusu ande mo ti fa na ambeni zo aye so mo manda?

9, 10. (a) Mo lingbi ti to nda ti fa tënë na azo wa? (b) A lingbi mo sala nyen tongana mo ye ti tï na popo ti aTémoin ti Jéhovah ti fa tënë na tele ti ala?

11. Aye wa a lingbi ti hunda na ambeni zo ti gbian na yâ fini ti ala kozoni si a zi lege na ala ti fa tënë legeoko na kongregation ti aTémoin ti Jéhovah?

12. Ngbanga ti nyen a hunda na zo ti gbian bê ti lo kozoni si lo lingbi na batême?

13. Ti gbian lege ti mo aye ti tene nyen?

14. Kota ye wa a lingbi mo sala kozo ti wara batême?

15, 16. Ti mû tele ti mo na Nzapa aye ti tene nyen? Ye nyen ayeke pusu mbeni zo ti sala ni?

17. Anda ti tënë wa alingbi ti sala si ambeni zo aye ti mû tele ti ala na Nzapa pëpe?

18. Fa ye so alingbi ti pusu mo ti mû tele ti mo na Jéhovah.

19. Ngbanga ti nyen a lingbi mo sala mbito pëpe ti mû tele ti mo na Nzapa?

20. Tongana mo mû tele ti mo na Jéhovah na yâ sambela awe, ngbanga ti nyen a lingbi ti ngbâ gi na popo ti mo na Jéhovah pëpe?

21, 22. Mo lingbi ti “sala tënë” ti mabe ti mo “na gigi” tongana nyen?

23. Ti wara batême “na iri ti Babâ, na ti Molenge, na ti Yingo Vulu” aye ti tene nyen?

24, 25. (a) Batême ayeke fä ti nyen? (b) A lingbi e kiri tënë na hundango tënë wa?