Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible afa nyen biani?

AMBENI TËNË TI BÂ NA NDO NI

Lâ ti fango ngbanga ayeke nyen?

Lâ ti fango ngbanga ayeke nyen?

TONGANA a sala na mo tënë ti Lâ ti fango ngbanga, nyen la aga na li ti mo? Ti azo mingi, tongana a sala tënë ti Lâ ti fango ngbanga, ala yeke pensé ti ala na mbeni ngende ti gbia so Nzapa aduti na ndo ni. Azo kutu mingi mingi ayeke hon na gbele lo na a yeke fâ ngbanga ti ala oko oko. Azo ti nzoni ayeke gue na yâ ti paradis na yayu, me azo ti sioni ayeke gue ti ala na lê ti wâ teti lakue lakue. Me Bible afa ti lo Lâ ti fango ngbanga ni na mbeni lege nde. Lo fa ni pëpe tongana mbeni ngoi so a zia azo na yâ ti kota mbito, me tongana mbeni ngoi ti beku na so ye kue ayeke kiri ti ga nzoni.

Na Apocalypse 20:11, 12, e diko tënë so bazengele Jean afa na ndo ti Lâ ti fango ngbanga so; lo tene: “Mbi bâ kota vulu trône na Lo so aduti na ndo ni, Lo so sese na yayu akpe lê ti Lo, na a wara ndo teti ala pëpe. Mbi bâ awakinda, akete zo na akota zo, ala yeke luti na gbele trône so; na a lungula mbeti nde nde, na a lungula mbeni mbeti so ayeke mbeti ti iri ti azo so ayeke na fini. Na a fâ ngbanga ti awakinda na lege ti ye so a sala na mbeti nde nde so, alingbi na kusala ti ala.” Lo so aduti ti fâ ngbanga ni ayeke zo wa?

Biani, Jéhovah Nzapa si ayeke kota Wafango ngbanga ni. Ye oko, lo zia kusala ti fango ngbanga ni na maboko ti mbeni zo nde. Na Kusala 17:31, bazengele Paul atene so Nzapa ‘adiko lâ ni so fade Lo fâ ngbanga ti sese so mbilimbili na lege ti Zo so Lo hiri Lo na gigi.’ Zo ni so Lo hiri lo ti fâ ngbanga ni so ayeke Jésus Christ so Lo zingo lo na popo ti akuâ (Jean 5:22). Lawa si Lâ ti fango ngbanga ni ayeke komanse? Na a yeke mû ngoi oke?

Mbeti ti Apocalypse afa so Lâ ti fango ngbanga ni ayeke komanse na peko ti bira ti Harmaguédon tongana a hunzi awe ti futi aye ti sese ti Satan so kue* (Apocalypse 16:14, 16; 19:19-20:3). Na peko ti Harmaguédon, fade a yeke kanga Satan na ayingo sioni ti lo teti ngu saki oko. Na ngoi ni so, azo 144 000 so ayeke zingo na kuâ ti wara fini na yayu ayeke duti ajuge nga ala yeke “komande legeoko na Christ ngu [saki] oko.” (Apocalypse 14:1-3; 20:1-4; aRomain 8:17). Tongaso, Lâ ti fango ngbanga ni ayeke pëpe gi mbeni ye so ayeke hon gi na loro na so aninga gi ngbonga 24 awe, a yeke tongaso pëpe. Me a yeke mbeni ye so ayeke mû ande ngoi mingi, so ayeke ninga ngu saki oko.

Teti angu saki oko so, fade Jésus Christ ayeke “fâ ngbanga ti azo so ayeke na fini na ti awakinda”. (2 Timothée 4:1). “Azo so ayeke na fini” so a sala tënë ti ala ge ayeke “azo mingi so asi singo” so ayeke sö kuâ na Harmaguédon (Apocalypse 7:9-17). Bazengele Jean abâ nga na suma “awakinda…, ala yeke luti na gbele trône” ti fango ngbanga. Tongana ti so Jésus amû zendo ni, “azo kue so ayeke na dukua, fade ala mä yanga ti [Christ], na ala sigigi” na ngoi so ala yeke zingo na kuâ (Jean 5:28, 29; Kusala 24:15). Me fade a yeke luti na ndo ti nyen ti fâ ngbanga ti ala kue?

Na yâ ti suma so bazengele Jean abâ, “a lungula mbeni mbeti”, na “a fâ ngbanga ti awakinda na lege ti ye so a sala na mbeti nde nde so, alingbi na kusala ti ala.” Ambeti so ayeke nyen? A yeke ambeti so a sû na yâ ni aye so azo ni asala kozoni si ala kui? Ên-ën. Ngbanga ti nyen? Bible atene: “Zo so akui awe, ngbanga ti siokpari ayeke na li ti lo mbeni pëpe.” (aRomain 6:7). Tongana ala kiri na fini, a yeke kiri pëpe na ndo ti asiokpari so ala sala kozo. Tongaso, ambeti so alingbi ti duti gi ambeni ndia so Nzapa akiri ti sigigi na ni ande. Tongana ala so asö kuâ na Harmaguédon nga ala so a yeke zingo ala na kuâ aye ti ngbâ na fini lakue, a lingbi ala bata akomandema ti Nzapa, na akomandema so abâ nga afini ndia so Jéhovah alingbi peut-être ti sigigi na ni na ngoi ti angu saki oko so. Tongaso, ti fâ ngbanga ti zo oko oko, a yeke luti ande na ndo ti aye so zo ni ayeke sala na ngoi ti Lâ ti fango ngbanga ni.

Mingi ti azo so ayeke zingo ande na kuâ na ngoi ti Lâ ti fango ngbanga so awara lege lani pëpe ti hinga tënë ti Nzapa na ti sala ye so bê ti lo aye. Me na ngoi ti fango ngbanga so, fade ala yeke wara lege ti hinga tënë ni na ti sala ye alingbi na ni. So aye ti tene so a yeke to nda ti mbeni kota kusala ti fango ye so ayeke mû ndo lê sese kue. Biani, ‘fade awakodoro ti sese ayeke manda lege ti mbilimbili.’ (Esaïe 26:9). Ye oko, a yeke duti ande pëpe azo kue si ayeke yeda ti sala ye so bê ti Nzapa aye. Esaïe 26:10 atene: “Même tongana zo asala be-nzoni na zo ti sioni, lo manda lege ti mbilimbili pëpe; fade lo sala kirikiri na yâ sese ti mbilimbili; lo ye ti bâ kota ndo ti L’Eternel pëpe.” Na Lâ ti fango ngbanga ni, fade a yeke fâ mara ti azo tongaso biaku biaku.—Esaïe 65:20.

Na hunzingo ti Lâ ti fango ngbanga ni, ala so angbâ na fini juska na nda ni “ayeke [kiri] na fini”, so ti tene ala yeke ga azo so siokpari oko angbâ na tele ti ala pëpe (Apocalypse 20:5). Lâ ti fango ngbanga ayeke duti ande ngoi so azo ayeke kiri na tâ nzoni dutingo ti ala ti kozo (1 aCorinthien 15:24-28). Na pekoni, a yeke zi Satan na kanga ti lo ti ga ti handa azo ti ndangba ni. A yeke duti ande ndangba tara so azo ti sese ayeke wara (Apocalypse 20:3, 7-10). Ala so ayeke ke ti mû peko ti Satan ayeke duti “azo ti mbilimbili” so “sese ni aga [ande] ye ti héritier ti [ala], na fade ala duti dä lakue” tongana ti so Bible amû zendo ni (Psaume 37:29). Biani, Lâ ti fango ngbanga ayeke ga ande na aye ti nzoni mingi na azo kue so ayeke ngbâ be-ta-zo na Nzapa!


*  Na ndo tënë ti Harmaguédon so, bâ buku Étude perspicace des Écritures, Volume 1, lembeti 1073-1075, nga Volume 2, lembeti 63, 64. Bâ nga chapitre 20 ti buku Voro oko tâ Nzapa. Abuku use so kue, a yeke aTémoin ti Jéhovah si asigigi na ni.

← Bâ chapitre ni

TI HINGA AMBENI TËNË

Ngoi ti “nda ni” aye ti tene nyen?

Eskê mo hinga so ye so Bible atene na ndo ti ngoi ti nda ni ayeke mbeni nzoni sango?