Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible afa nyen biani?

AMBENI TËNË TI BÂ NA NDO NI

Jésus Christ: Messie so a fa tënë ti gango ti lo

Jésus Christ: Messie so a fa tënë ti gango ti lo

TI MÛ maboko na e ti hinga Messie, lo so ayeke ga ti zi e, Jéhovah Nzapa amû yingo ti lo na aprophète mingi ti fa anzene nzene ye na ndo dungo ti lo, kusala ti lo nga na kuâ ti lo. A yeke wara aprophétie so na yâ ti Bible, na ala kue aga tâ tënë na ndo ti Jésus Christ. Ye ti dongo bê ni ayeke so ala fa tâ na lege ni aye so ayeke si nga na anzene nzene ye kue. Zia e bâ gi ambeni prophétie oko oko so afa atënë na ndo dungo ti Messie nga na aye so ayeke si na lo na ngoi so lo ngbâ kete.

Prophète Esaïe afa so fade Messie ni ayeke ga na yâ hale ti Gbia David (Esaïe 9:6). A yeke lani ye so asi: a dü Jésus na yâ hale ti David.—Matthieu 1:1, 6-17.

Mbeni prophète ti Nzapa ni nga so iri ti lo ayeke Michée afa so fade molenge ni ayeke ga mbeni mokonzi, na a yeke dü lo na “Bethléhem Ephrata”. (Michée 5:1). Na ngoi so a dü na Jésus, agbata ayeke lani use na Israël so amû iri ti Bethléhem. Oko ni ayeke ndulu na Nazareth na mbage ti banga ti kodoro ni, na use ni ayeke ndulu na Jérusalem na Juda. Giriri, a yeke hiri lani Ephrata, Bethléhem so ayeke ndulu na Jérusalem. A dü lani Jésus na yâ ti gbata so, tongana ti so prophétie ni atene.—Matthieu 2:1.

Mbeni prophétie ni nde afa so fade a yeke hiri Molenge ti Nzapa ti “sigigi na sese ti Egypte.” Na ngoi so Jésus ade lani gi kete, a gue na lo na Egypte. Na peko ti kuâ ti Hérode, a mû lo kâ a kiri na lo na kodoro ti lo. A yeke tongaso si prophétie ni aga tâ tënë.—Osée 11:1; Matthieu 2:15.

Na lê ti tableau [“Aprophétie na ndo Messie”], a zia molongo ti aversê na gbe ti li ti tënë “Prophétie ni”. Aversê ni afa anzene nzene tënë so andu Messie. E wa mo ti haka aversê so na ala so a zia ni na gbe ti li ti tënë “Gango tâ tënë ni”. Tongana mo sala tongaso, a yeke kiri ti kpengba mabe ti mo ti bâ so biani Mbeti ti Nzapa ayeke tene gi tâ tënë.

Na ngoi so mo yeke zi Bible ti mo ti bâ aversê so, zia na li ti mo so a yeke atënë ti prophétie so a sû ni ngu mingi mingi kozoni si a dü Jésus. Jésus atene: “A lingbi tënë ti Mbi kue aga tâ tënë, so Ndia ti Moïse, na aProphète, na Psaume atene.” (Luc 24:44). Tongana ti so mo lingbi ti bâ ni na yâ Bible ti mo mveni, anzene nzene tënë kue so aprophétie so afa aga tâ tënë.

APROPHÉTIE NA NDO MESSIE
YE SO ASI PROPHÉTIE GANGO TÂ TËNË NI
A dü lo na yâ kete mara ti Juda Genèse 49:10 Luc 3:23-33
Mbeni masia si adü lo Esaïe 7:14 Matthieu 1:18-25
A dü lo na yâ hale ti Gbia David Esaïe 9:6 Matthieu 1:1, 6-17
Jéhovah ahiri lo Molenge ti ni Psaume 2:7 Matthieu 3:17
Azo ake ti mä na bê na lo Esaïe 53:1 Jean 12:37, 38
Lo linda na Jérusalem na ndo ti mbeni lele Zacharie 9:9 Matthieu 21:1-9
Mbeni kamarade ti lo si akä lo Psaume 41:10 Jean 13:18, 21-30
A kä lo teti lê ti nginza 30 Zacharie 11:12 Matthieu 26:14-16
Lo zi yanga pëpe na gbele azo so ayeke bi tënë na li ti lo Isaiah 53:7 Matthieu 27:11-14
A bi mbeni ye na sese ti bâ zo wa la ayeke mû bongo ti lo Psaume 22:19 Matthieu 27:35
A sala atënë ti mbana na lo na ngoi so a kanga lo na ndo ti keke Psaume 22:8, 9 Matthieu 27:39-43
A fâ bio ti lo oko pëpe Psaume 34:21 Jean 19:33, 36
A lu lo na popo ti azo ti mosoro Esaïe 53:9 Matthieu 27:57-60
A kiri lo na fini kozoni si kuâ ti lo ato nda ti buba Psaume 16:10 Kusala 2:24, 27
A yä lo kâ ti duti na koti ti Nzapa Psaume 110:1 Kusala 7:56

← Bâ chapitre ni