Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible afa nyen biani?

AMBENI TËNË TI BÂ NA NDO NI

A dü lani Jésus na nze ti décembre?

A dü lani Jésus na nze ti décembre?

BIBLE afa na e pëpe lango so a dü na Jésus. Me lo fa na e ambeni ye so apusu e ti yeda gi so a dü lani Jésus pëpe na nze ti décembre.

Na nze ti décembre, ndo ni ayeke ka tongana nyen na Bethléhem, kodoro so a dü Jésus dä? Nze ti aJuif so a hiri ni Kislev ayeke mbeni nze so ayeke na popo ti nze ti novembre na ti décembre. Na nze ni so ka, dê ayeke sala mingi na ngu apika mingi. Na peko ti nze ti Kislev, mo yeke wara nze ti Tébeth (so ayeke na popo ti décembre na janvier). Na ngoi ni so, dê ni akiri aso ngangu, nga, ngoi na ngoi, mo lingbi ti bâ neige na li ti ahoto. Zia e bâ ye so Bible atene na ndo ni na ngoi ti anze so.

Esdras so asû ambeni buku ti Bible afa so nze ti Kislev ayeke mbeni nze so dê na ngu-nzapa ayeke mingi. Na pekoni so lo fa tënë ti azo mingi so abungbi lani na Jérusalem na “lâ bale-use ti nze gumbaya ni”, so ti tene nze ti Kislev, Esdras afa so “tele ti ala adö…teti ngu-nduzu apika mingi.” Ndali ti so ye ni ayeke tongaso ka na nze ni, azo so abungbi tele ti ala atene: “A yeke ngoi so ngu-nduzu apika mingi, e lingbi luti na gigi pëpe.” (Esdras 10:9, 13; Jérémie 36:22). Hunda tele ti mo kete: Tongana a si na nze ti décembre, fade aberger ti ndo ni ayeke zia si anyama ti ala angbâ na gigi na bï? Oko pëpe.

Aberger na angasangbaga ti ala

Na bï ni so a dü na Jésus, aberger ayeke na benyama, ala yeke bata anyama ti ala.

Me Bible atene ti lo so, na bï ni so a dü na Jésus, aberger ayeke na benyama, ala yeke bata anyama ti ala. Luc atene na yâ ti évangile so lo sû ni, so aberger ‘aduti na benyama ti bata angasangbaga ti ala na bï’ ndulu na Bethléhem (Luc 2:8-12). Bâ so a tene aberger ni ayeke bata anyama ti ala na benyama na bï. Ti mo tongana mo diko tënë ti yâ ti aversê so, a kpa ngoi ti décembre na Bethléhem, so ngu-nzapa apika mingi na dê ayeke ya ngangu? Ên-ën, a kpa ni pëpe. So aye ti fa so a dü Jésus pëpe na nze ti décembre.*

Mbeti ti Nzapa afa polele lango so Jésus akui na ni, me lo fa ye mingi pëpe so amû lege ti hinga lango so a dü na lo. Ye so adabe ti e na atënë ti Gbia Salomon so: “Nzo iri ayeke nzoni ahon mafuta ti ngele ngangu; na lâ ti kui ayeke nzoni ahon lâ ti dungo zo.” (Zo-ti-fa-tene 7:1). Na dikongo tënë ti versê so, e yeke bâ so a yeke na lege ni tongana Bible afa aye mingi na ndo ti kusala ti Jésus nga na kuâ ti lo me aye mingi pëpe na ndo ti ngoi ti dungo lo.


*  Ti wara ambeni tënë mingi na ndo ti ye so, bâ buku ti aTémoin ti Jéhovah so iri ni ayeke Comment raisonner à partir des Écritures, na lembeti 161-165.

← Bâ chapitre ni