Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

9: Noé aleke arche

9: Noé aleke arche
Azo so ayeke he Noé hengo

NOÉ ayeke na wali na lo dü amolenge ti koli ota. Iri ti ala ayeke Sem, Cham na Japhet. Ala nga kue ayeke na awali ti ala. Tongaso, azo miombe ayeke na yâ ti sewa ti Noé.

Mbeni lâ, Nzapa ahunda na Noé ti sara mbeni ye so zo ahinga li ti lo na ni pëpe. Lo tene na lo ti leke mbeni kota arche, so akono tongana kota bateau me so akpa mbeni yongoro kota sanduku. A kangbi yâ ti arche ni na a-étage ota, na a leke akete chambre dä. Noé na sewa ti lo nga na anyama na akobe aduti na yâ ti achambre so.

Nzapa atene na Noé ti sara si ngu alingbi ti lï na yâ ti arche ni pëpe. Nzapa atene: ‘Mbi yeke sara si Kota Moa aga ti futi sese so kue. Zo kue so ayeke na yâ ti arche ni pëpe ayeke kui.’

Noé na amolenge ti lo amä yanga ti Jéhovah na ala komanse ti leke arche ni. Me ambeni zo ayeke he gi ala hengo. Azo so angbâ gi na sioni ti ala. Zo oko amä na bê pëpe so Nzapa ayeke futi ala.

Sewa ti Noé ayeke ga na anyama nga na kobe na yâ ti arche ni

A hunda ngoi mingi ti leke arche ni ngbanga ti so a kono mingi. Na nda ni, kusala ni ahunzi. Fadeso, Nzapa ahunda na Noé ti ga na anyama na yâ ti arche ni. Nzapa atene na lo ti ga na ambeni nyama ni use use, koli na wali. Me ti ambeni nyama ni nde, lo tene na lo ti ga na ala mbasambala mbasambala. Nzapa atene na lo ti ga na andeke ti mara nde nde kue. Noé asara tâ gi ye so Nzapa ahunda na lo.

Na nda ni, Noé na sewa ti lo alï na yâ ti arche ni, na Nzapa akanga yanga ni. Na yâ ti arche, Noé na sewa ti lo ayeke ku. Tara ti bâ tere ti mo na yâ ti arche ni na kungo ni, na tere ti Noé na sewa ti lo. Fade Kota Moa ayeke ga biani tongana ti so Nzapa atene?

Genèse 6:9-22; 7:1-9.



Ahundango tënë

  • Azo oke ayeke na yâ ti sewa ti Noé? Iri ti amolenge ti lo ti koli ota ayeke nyen?
  • Ye wa so ayeke nde mingi Nzapa ahunda na Noé ti sara? Ngbanga ti nyen lo hunda na Noé ti sara ye so?
  • Azo ti ngoi ti Noé atene ti ala nyen tongana Noé asara tënë ti arche ni na ala?
  • Nzapa atene na Noé ti sara nyen na anyama?
  • Na peko ti so Nzapa akanga yanga ti arche ni, Noé na sewa ti lo alingbi lani gi ti sara nyen?

Ambeni hundango tënë

  • Diko Genèse 6:9-22.

    Nyen la asara lani si Noé aduti mbeni kpengba wavorongo tâ Nzapa? (Gen. 6:9, 22).

    Jéhovah abâ sarango ngangu na zo tongana nyen? A lingbi ye so asara nyen na ndo ti angia so e soro ti sara, aye so e ye ti diko nga so e ye ti bâ? (Gen. 6:11, 12; Ps. 11:5).

    Tongana nyen e lingbi ti mû tapande ti Noé tongana bungbi ti Jéhovah afa lege na e? (Gen. 6:22; 1 Jean 5:3).

  • Diko Genèse 7:1-9.

    Jéhovah abâ lani Noé tongana zo ti mbilimbili atâa so lo yeke mbilimbili-kue pëpe. Ye so adë bê ti e tongana nyen? (Gen. 7:1; aProv. 10:16; Es. 26:7).