Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

8: Akota yongoro zo na ndo ti sese

8: Akota yongoro zo na ndo ti sese

TONGANA mbeni zo ayeke tambela na mbage ti mo na lo yo alingbi na go ti da ti mo, mo yeke tene nyen? So tâ yongoro zo! Ândö kâ, a yeke wara mara ti azo tongaso na ndo ti sese. Bible atene ababâ ti ala ayeke a-ange so alondo na yayu aga na sese. A lingbi ti duti tongaso tongana nyen?

Akota yongoro zo so ayeke sioni mingi

Girisa pëpe so sioni ange Satan ayeke gi lani kue ti pusu azo ti sara sioni. Lo tara même ti handa a-ange ti Nzapa ti ga sioni. Na pekoni, ambeni ti a-ange ni amû peko ti lo. Ala ke ti sara kua so Nzapa amû na ala na yayu. Ala ga na sese na ala yü tere ti zo. Ngbanga ti nyen?

Bible atene a yeke ngbanga ti so ala bâ apendere wali na sese so na ala ye ti duti na ala. Tongaso, ala ga na sese ti mû awali so ti ga awali ti ala. Bible atene ye so ayeke sioni mingi, ngbanga ti so Nzapa asara a-ange ti duti na yayu.

Tongana a-ange so na awali ti ala adü amolenge, amolenge ti ala ayeke lani nde mingi. Na ngoi ti dungo ala, a bâ ala tongana asenge molenge. Me tongana ala komanse ti kono awe, ala yeke yo, ala yeke yo, nga ala yeke kpengba, ala yeke kpengba, juska ala ga akota yongoro zo.

Akota yongoro zo so ayeke sioni mingi. Ala mû kota ngangu ti tere ti ala ti sara sioni na azo. Ala gi ti pusu azo kue ti ga sioni legeoko tongana ala.

Hénoc akui ti lo awe, me mbeni zo ti nzoni ayeke fadeso na ndo ti sese. Iri ti zo so ayeke Noé. Noé amä yanga ti Nzapa lakue.

Mbeni lâ Nzapa atene na Noé, lo tene so ngoi asi awe ti tene ni futi azo ti sioni kue. Me Nzapa ayeke bata ande na fini Noé na sewa ti lo nga na mingi ti anyama. Nzapa asara ni tongana nyen?

Genèse 6:1-8; Jude 6.



Ahundango tënë

  • Nyen la asi tongana ambeni ange ti Nzapa amä yanga ti Satan?
  • Ngbanga ti nyen ambeni ange azia kusala ti ala na yayu ti ga na sese?
  • Ngbanga ti nyen a yeke lani sioni ti tene a-ange so aga na sese na ala yü tere ti zo?
  • Amolenge ti a-ange ni ayeke lani nde mingi tongana nyen?
  • Tongana ti so mo bâ na lê ti foto so, amolenge ti a-ange so asara nyen tongana ala ga akota yongoro zo?
  • Na peko ti kuâ ti Hénoch, mbeni zo ti nzoni ayeke lani na sese. A yeke zo wa, na ngbanga ti nyen Nzapa aye lo lani mingi?

Ambeni hundango tënë

  • Diko Genèse 6:1-8.

    Tongana nyen Genèse 6:6 afa so sarango ye ti e alingbi ti zia ngia wala vundu na bê ti Jéhovah? (Ps. 78:40, 41; aProv. 27:11).

  • Diko Jude 6.

    Na ngoi ti Noé, ambeni ange “abata kozo ndo ti ala pëpe”. Ye so afa nyen na e laso? (1 aCor. 3:5-9; 2 Pi. 2:4, 9, 10).