Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Mbeti ti ambaï ti yâ ti Bible

7: Mbeni koli so ayeke na mbeto pëpe

7: Mbeni koli so ayeke na mbeto pëpe
Hénoc

TONGANA azo aga mingi na sese so, ambeni mingi asara sioni tongana Caïn. Me mbeni zo oko ayeke nde na tanga ti azo kue. A yeke Hénoc. Hénoc ayeke lani na mbeto pëpe. Kamême so azo so angoro lo asara aye ti sioni mingi, lo ngbâ ti voro Nzapa lakue.

Mo hinga teti nyen azo asara sioni lani kâ? Bâ, zo wa la asara lani si Adam na Eve ake yanga ti Nzapa na ate lê ti keke so Nzapa atene ti te pëpe? A yeke mbeni sioni ange. Bible airi lo Satan. Lo ngbâ lakue ti gi lege ti handa azo kue.

Nzi na fango zo

Mbeni lâ Jéhovah Nzapa atene na Hénoc ti fa na azo ambeni tënë so ala ye ti mä pëpe. Lo tene tongaso: ‘Nzapa ayeke futi ande mbeni lâ azo ti sioni kue.’ Azo so amä tënë so asara ngonzo mingi. Peut-être ala gi lege lani ti fâ Hénoc. Tongaso, a hunda na Hénoc ti sara mbeto pëpe ti fa na azo ye so Nzapa aga nduru ti sara.

Nzapa azia pëpe si Hénoc aduti lango mingi na popo ti azo ti sioni so. Hénoc ayeke gi na ngu 365 tongana lo kui. Ngbanga ti nyen e tene “gi na ngu 365”? Teti, na lâ ni kâ, azo ayeke ngangu mingi ahon ti fadeso na ala ninga mingi na sese. Bâ, molenge ti Hénoc, Métusélah, ayeke lani na ngu 969 tongana lo kui!

Azo so ayeke sara sioni

Na peko ti kuâ ti Hénoc, azo aga gi sioni. Bible atene ‘atënë kue ti bê ti ala ayeke sioni lakue’ na ‘sese so asi na sioni.’

Mo hinga mbeni oko ti aye so asara si sioni asi singo na sese lani kâ? A yeke ngbanga ti so Satan awara mbeni fini lege ti pusu azo ti sara sioni. E yeke bâ ande tënë na ndo ni.

Genèse 5:21-24, 27; 6:5; aHébreu 11:5; Jude 14, 15.



Ahundango tënë

  • Hénoch ayeke lani nde tongana nyen?
  • Ngbanga ti nyen azo ti ngoi ti Hénoch asara aye ti sioni mingi tongaso?
  • Aye ti sioni wa azo ni ayeke sara lani? (Bâ foto ni.)
  • Ngbanga ti nyen a hunda lani na Hénoch ti sara mbeto pëpe?
  • Azo ni ayeke ngbâ lani na fini juska ngu oke? Me ngu ti Hénoch asi gi oke?
  • Nyen la asi lani na peko ti kuâ ti Hénoch?

Ambeni hundango tënë

  • Diko Genèse 5:21-24, 27.

    Mara ti songo wa Hénoch ayeke na ni lani na Jéhovah? (Gen. 5:24).

    Ti Bible, zo wa la angbâ na fini a ninga ahon tanga ti azo kue? Lo yeke lani na ngu oke na kuâ ti lo? (Gen. 5:27).

  • Diko Genèse 6:5.

    Dutingo ti aye na sese aga lani sioni tongana nyen na peko ti kuâ ti Hénoch? Tongana nyen ye so akpa ti ngoi ti e? (2 Tim. 3:13).

  • Diko aHébreu 11:5.

    Hénoch asara lani nyen si “lo lingbi na lê ti Nzapa”? Ye ti pekoni ayeke so wa? (Gen. 5:22).

  • Diko Jude 14, 15.

    Tongana nyen aChrétien laso alingbi ti sara ye na mbeto pëpe tongana Hénoch na ngoi so ala yeke fa tënë ti gango ti bira ti Harmaguédon na azo? (2 Tim. 4:2; aHéb. 13:6).