Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

6: Caïn na Abel

6: Caïn na Abel

BÂ CAÏN na Abel fadeso. Ala use kue akono awe. Caïn aga zo ti fango yaka. Lo lu alê ti kobe, alê ti keke na akugbe ti kasa.

Caïn na Abel ayeke mu amatabisi na Nzapa

Abel aga zo ti batango angasangbaga. Lo ye mingi ti bata amolenge ti angasangbaga. Ala kono aga akota ngasangbaga, na tongaso Abel abata kota kundu ti angasangbaga.

Mbeni lâ Caïn na Abel amû matabisi na Nzapa. Caïn aga na akobe ti yaka ti lo. Abel aga na ngasangbaga so ayeke nzoni ahon angasangbaga ti lo kue. Jéhovah ayeda na Abel nga na matabisi ti lo ni. Me lo yeda pëpe na Caïn nga na matabisi ti lo ni. Mo hinga ngbanga ti nyen?

A yeke gi pëpe ngbanga ti so matabisi ti Abel ayeke nzoni ahon ti Caïn. Me a yeke ngbanga ti so Abel ayeke nzoni zo. Lo ndoye Jéhovah na ita ti lo. Me Caïn ayeke sioni na lo ndoye ita ti lo pëpe.

Ni la, Nzapa atene na Caïn ti gbian sioni lege ti lo. Me Caïn amä pëpe. Ngonzo asara lo mingi ndali ti so Nzapa aye Abel mingi ahon lo. Tongaso, Caïn atene na Abel: ‘Zia e gue na benyama!’ Kâ, tongana ala yeke gi ala use, Caïn apika ita ti lo Abel. Lo pika lo ngangu mingi si Abel akui. Ye so Caïn asara ayeke sioni mingi!

Caïn ayeke kpe na peko ti so lo fâ Abel

Kamême so Abel akui, Nzapa agirisa lo pëpe. Abel ayeke lani nzoni mingi, na Jéhovah ayeke girisa lâ oko pëpe azo ti nzoni. Ni la, Jéhovah Nzapa ayeke kiri ande mbeni lâ na Abel na fini. Na ngoi ni ande, Abel ayeke kui mbeni pëpe. Lo lingbi ande ti duti lakue lakue na ndo ti sese ge. Ti hinga anzoni zo tongana Abel, a yeke nzoni?

Me Nzapa aye azo tongana Caïn pëpe. Tongana Caïn afâ ita ti lo, Nzapa atomba lo yongoro na tere ti tanga ti afami ti lo. Na ngoi so Caïn ayeke gue ti duti na mbeni ndo nde, lo mû na tere ti lo mbeni oko ti aita ti lo ti wali so aga wali ti lo.

Tongana ngoi ayeke hon, Caïn na wali ti lo adü amolenge. Ambeni molenge ti Adam na Eve asara mariage na ala dü amolenge nga. A ninga pëpe, azo aga mingi na ndo ti sese. Zia e bâ tënë na ndo ambeni ti ala.

Genèse 4:2-26; 1 Jean 3:11, 12; Jean 11:25.



Ahundango tënë

  • Fa kua so Caïn na Abel ayeke sara lani.
  • Amatabisi wa Caïn na Abel aga na ni na Jéhovah?
  • Ngbanga ti nyen Jéhovah ayeda na matabisi ti Abel? Ngbanga ti nyen lo yeda na ti Caïn pëpe?
  • Caïn ayeke lani tongana nyen? Jéhovah atara ti mû maboko na lo tongana nyen?
  • Caïn asara nyen na ngoi so lo na ita ti lo ayeke gi ala use na benyama?
  • Fa ye so asi na Caïn na peko ti so lo fâ ita ti lo.

Ambeni hundango tënë

  • Diko Genèse 4:2-26.

    Tongana nyen Jéhovah afa so Caïn ayeke mû mbeni sioni lege? (Gen. 4:7).

    Tongana nyen Caïn afa so bê ti lo ayeke sioni? (Gen. 4:9).

    Jéhovah abâ tukungo mênë ti azo so asara sioni pëpe tongana nyen? (Gen. 4:10; Es. 26:21).

  • Diko 1 Jean 3:11, 12.

    Ngbanga ti nyen Caïn asara ngonzo ngangu? E lingbi ti manda nyen laso na ndo ti sarango ye ti lo so? (Gen. 4:4, 5; aProv. 14:30; 28:22).

    Tongana nyen Bible afa so même tongana azo ti sewa ti e kue ake Jéhovah, e lingbi lakue ti ngbâ be-ta-zo na lo? (Ps. 27:10; Mat. 10:21, 22).

  • Diko Jean 11:25.

    Tënë wa Jéhovah atene na ndo ti ala so kue akui teti ye so ayeke mbilimbili? (Jean 5:24).

TI HINGA AMBENI TËNË

Abel—“Atâa so lo kui awe, lo ngbâ ti sara tënë”

E lingbi ti manda nyen na ndo ti Abel atâa so Bible asara tënë na ndo ti lo mingui ape?