Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

4: A tomba ala na yaka ti Eden

4: A tomba ala na yaka ti Eden

BÂ YE so asi fadeso. A tomba Adam na Eve na yâ ti pendere yaka ti Eden. Mo hinga ngbanga ti nyen?

A tomba Adam na Eve na yâ ti yaka ti Eden

A yeke ngbanga ti so ala sara mbeni ye ti sioni mingi. Ni la Jéhovah atomba ala. Mo hinga sioni ye so Adam na Eve asara?

Ala sara mbeni ye so Nzapa atene na ala ti sara pëpe. Nzapa atene na ala ti te lê ti keke ti yaka ni kue. Me mbeni keke oko, Nzapa atene na ala ti te lê ni pëpe, na tongana ala te ni, ala yeke kui. Keke so ayeke ti Nzapa. E hinga so a yeke sioni ti mû ye ti mbeni zo nde. A yeke tongaso pëpe? Me nyen la asi?

Mbeni lâ tongana Eve ayeke gi lo oko na yâ ti yaka ni, mbeni ngbo asara tënë na lo. So tënë! Lo tene na Eve ti te lê ti keke so Nzapa atene na ala ti te ni pëpe. Me, lani tongana Jéhovah asara ngbo, lo sara lo ti tene tënë pëpe. Tongaso, a lingbi gi ti duti mbeni zo nde si asara si ngbo ni asara tënë. A yeke zo wa?

A yeke Adam pëpe. Tongaso, a lingbi ti duti mbeni oko ti azo so Jéhovah asara ala kozoni si lo sara sese. Azo so ayeke a-ange, na e lingbi ti bâ ala pëpe. Me mbeni ange abâ tere ti lo kota mingi. Lo pensé so lo lingbi ti komande tongana Nzapa. Lo ye si azo amä yanga ti lo, me ti Jéhovah pëpe. Ange so la asara si ngbo ni asara tënë.

Ange so ahanda Eve. Tongana lo tene na Eve so lo Eve ni lo yeke ga tongana Nzapa tongana lo te lê ti keke so, Eve amä na bê dä. Lo te ni, na Adam ate ni nga. Adam na Eve ake yanga ti Nzapa, na ndali ni a tomba ala na yâ ti pendere ndo ti ala ni.

Me mbeni lâ Nzapa ayeke sara si lê ti sese kue aga pendere tongana yaka ti Eden. E yeke bâ ande tongana nyen mo nga mo lingbi ti sara si sese ni aga pendere. Me ti fadeso, zia e bâ ye so asi na Adam na Eve.

Genèse 2:16, 17; 3:1-13, 24; Apocalypse 12:9.



Ahundango tënë

  • Na lê ti foto ni, nyen la asi na Adam na Eve nyen?
  • Jéhovah atomba ala ngbanga ti nyen?
  • Tënë ti nyen si mbeni ngbo atene na Eve?
  • Zo wa la asara lani si ngbo ni asara tënë na Eve?
  • Ngbanga ti nyen a tomba Adam na Eve na yâ ti pendere ndo ti ala ni?

Ambeni hundango tënë

  • Diko Genèse 2:16, 17 na 3:1-13, 24.

    Tongana nyen tënë so ngbo ni ahunda na Eve afa Jéhovah tongana sioni zo? (Gen. 3:1-5; 1 Jean 5:3).

    Ye so Eve asara afa na e ti sara hange na ye wa? (aPhil. 4:8; Jacq. 1:14, 15; 1 Jean 2:16).

    Tongana nyen Adam na Eve ake ti yeda na sioni so ala sara? (Gen. 3:12, 13).

    Tongana nyen achérubin so a zia ala na yaka ti Eden na mbage ti tö amû mbage ti komandema ti Jéhovah? (Gen. 3:24).

  • Diko Apocalypse 12:9.

    Satan awara lege ti pusu azo mingi ti tene ala ke komandema ti Nzapa? (1 Jean 5:19).