Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Mbeti ti ambaï ti yâ ti Bible

3: Adam na Eve

3: Adam na Eve

NYEN la ayeke nde na lê ti foto so? A yeke azo so ayeke na lê ni. A yeke kozo koli na kozo wali. Zo wa asara ala? A yeke Nzapa. Mo hinga iri ti lo? A yeke Jéhovah. Iri ti kozo koli na ti kozo wali ayeke Adam na Eve.

Adam na Eve na yâ ti yaka ti Eden

Jéhovah Nzapa asara Adam tongaso: Lo mû pupu-sese na lo leke na tere ti zo, tere so ayeke mbilimbili-kue. Na pekoni, lo wu pupu na duhon ti zo ni, na Adam aga zo so ayeke na fini.

Jéhovah Nzapa ayeke na mbeni kusala ndali ti Adam. Lo tene na Adam ti zia iri na li ti mara ti anyama nde nde kue. Peut-être Adam abâ ala a ninga kozoni si lo zia iri na li ti ala oko oko alingbi na ala. Na ndembe so Adam angbâ ti zia iri na li ti anyama ni, lo komanse ti bâ mbeni ye. Mo hinga ni?

Na popo ti anyama kue, akoli ni ayeke dä na awali ni ayeke dä nga. Koli-doli na wali-doli ayeke dä; koli-bamara na wali-bamara ayeke dä. Ala kue ayeke na amolenge. Me Adam ayeke na mbeni mba ti lo zo pëpe. Tongaso, Jéhovah asara si Adam atï na yâ ti kota lango. Nzapa amû mbeni bio ti kate ti lo na lo sara wali na Adam, na wali ni aga ti lo.

So ngia si Adam ayeke na ni fadeso! Bâ tongana nyen Eve nga kue ayeke na ngia mingi ti duti na yâ ti pendere ndo so! Fadeso, ala lingbi ti dü molenge na ti tene ala kue aduti na ngia.

Jéhovah aye lani si Adam na Eve aduti lakue na fini. Lo ye si ala sara si sese kue aga pendere tongana yaka ti Eden. So ngia si Adam na Eve ayeke lani na ni tongana ala yeke gbu li na ndo ti kusala so! Tongana mo yeke kâ lani, mo yeke ye ande ti sara si sese kue aga mbeni pendere ndo? Me ngia ti Adam na Eve aninga mingi pëpe. Zia e bâ ye so asi.

Psaume 83:19; Genèse 1:26-31; 2:7-25; 22:14.



Ahundango tënë

  • Nyen la mo bâ na yâ ti foto ti Mbaï 3 ni me so mo bâ na yâ ti foto ti Mbaï 2 pëpe?
  • Zo wa asara lani kozo koli? Iri ti kozo koli ni so ayeke nyen?
  • Kusala wa Nzapa amû na Adam?
  • Ngbanga ti nyen Nzapa asara lani si Adam atï na yâ ti kota lango?
  • Adam na Eve alingbi lani ti ngbâ na fini teti lango oke? Kusala wa Jéhovah aye si ala sara?

Ambeni hundango tënë

  • Diko Psaume 83:19, Gen. 22:14.

    Iri ti Nzapa ayeke nyen? Dutingo ti lo ayeke tongana nyen tongana a haka ni na ti azo? (Jér. 16:21; Dan. 4:17).

  • Diko Genèse 1:26-31.

    Kota ye wa Nzapa aleke na lango omene ni? Tongana nyen ye so ayeke nde mingi na anyama? (Gen. 1:26).

    Jéhovah amû nyen na azo nga na anyama ti tene ala te? (Gen. 1:30).

  • Diko Genèse 2:7-25.

    A hunda lani nyen na Adam ti sara tongana lo yeke zia iri na ndo ti anyama? (Gen. 2:19).

    Tongana nyen Genèse 2:24 amû maboko na e ti hinga bango ndo ti Jéhovah na ndo ti mariage, kangbingo tere nga na divorce? (Mat. 19:4-6, 9).