Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

2: Mbeni pendere ndo

2: Mbeni pendere ndo

BÂ SESE na ndo so! Bâ tongana nyen a yeke pendere mingi! Bâ akeke na apere, afleur na anyama so kue. Adoli na abamara ayeke na ndo wa?

Anyama na yâ ti yaka ti Eden.

Pendere ndo so alondo na ndo wa? Zia e bâ tongana nyen Nzapa aleke aye na ndo ti sese ndali ti e.

Kozoni, Nzapa asara si pere amû ndo ti kuru sese kue. Lo sara mara ti akeke nde nde, akete ni na akota ni. Akeke ni so asara si sese aga pendere, ngbanga ti so ala yeke pusu lakue. Me ala yeke mû nga na e kobe so anzere na e mingi.

Na pekoni, Nzapa asara asusu ti hon na yâ ti ngu na andeke ti huru na nduzu. Lo sara ambo na anyau na ambarata, akota nyama na akete nyama. Anyama wa mo yeke bâ na ndo so mo yeke dä? So Nzapa asara aye so kue ndali ti e, a nzere na e pëpe?

Na nda ni, Nzapa asara mbeni mbage ti sese pendere ahon atanga ni kue. Lo iri ndo so yaka ti Eden. A yeke lani nzoni ndo mingi. Aye kue na yâ ni ayeke pendere mingi. Nzapa aye si sese kue aga pendere legeoko tongana pendere ndo so lo sara.

Me kiri mo bâ foto ti pendere ndo so. Nzapa abâ so mbeni ye amanke. Mo hinga ni? Zia e bâ ni.

Genèse 1:11-25; 2:8, 9.



Ahundango tënë

  • Tongana nyen Nzapa aleke lani sese ti tene zo aduti dä?
  • Nzapa asara mara ti anyama nde nde wa? (Bâ foto ni.)
  • Ngbanga ti nyen yaka ti Eden ayeke lani nde mingi?
  • Nzapa aye lani si sese kue aga tongana nyen?

Ambeni hundango tënë

  • Diko Genèse 1:11-25.

    Nyen la Nzapa aleke na lango ota ni so lo leke na aye? (Gen. 1:12).

    Nyen la asi na lango osio ni so Nzapa aleke na aye? (Gen. 1:16).

    Mara ti anyama wa Nzapa aleke lani na yâ ti lango oku na omene ni? (Gen. 1:20, 21, 25).

  • Diko Genèse 2:8, 9.

    Nzapa azia lani na yâ ti yaka ni akeke use so ayeke nde mingi. A yeke akeke wa? Ala duti fä ti nyen?