Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

10: Kota moa

10: Kota moa

NA GIGI ti arche ni, azo angbâ ti sara ye ti ala tongana ti kozo. Ala ngbâ ti pensé so moa ayeke ga pëpe. Âmanke ala kiri ahe ndo ahon ti kozo. Me ngia ti ala ni aga nduru ti hunzi.

Mbeto asara azo na anyama tongana ngu asuku sukungo

Mo ye ti bâ, ngu akomanse ti pika. Ngu ni apika ngangu mo bâ mo tene ngu so a tuku na yâ ti kota sembe. Noé atene tâ tënë! Me ngoi ti lï na yâ ti arche ni ahon awe. Jéhovah akanga yanga ti arche ni ngangu.

A ninga pëpe, ngu amû ndo lê ti sese kue. Ngu asua tongana kota bale. A kungbi akeke na a pusu akota tênë, na a toto ngangu. Mbeto asara azo si ala gue na li ti ahoto. Ala tene na bê ti ala so tongana ala hinga ândö, ka ala mä yanga ti Noé na ala lï na yâ ti arche ni na ngoi so yanga ni angbâ na zingo ni! Me ngoi ni ahon awe.

Ngu angbâ ti suku sukungo. A pika lâ 40 na bï 40. A suku a mû go ti ahoto juska a mû ndo ti ahoto so ayo ahon atanga ni kue. Legeoko tongana ti so Nzapa atene, azo kue na anyama kue na gigi ti arche ni akui. Me azo so ayeke na yâ ni asö kuâ.

Noé na amolenge ti lo aleke arche ni tâ nzoni mingi. Ngu ayô arche ni na nduzu si a sua na lê ti ngu ni. A si na mbeni ngoi, ngu akaï ti pika, na lâ akomanse ti su. Azo ti yâ ti arche ni abâ nyen na gigi? Gi ngu la ayeke na ndo lê ti sese kue! Me gi ye oko la angbâ, a yeke arche ni.

Arche ni ayeke sua na lê ti ngu ni

Akota yongoro zo so ayeke dä mbeni pëpe na ala lingbi ti sara sioni na azo pëpe. Ala na amama ti ala nga na tanga ti azo ti sioni kue akui. Me nyen la asi na ababâ ti ala?

Ababâ ti akota yongoro zo so ayeke atâ zo pëpe. Ala yeke a-ange so aga na sese ti duti tongana azo. Tongaso, tongana Kota Moa aga, ala kui pëpe legeoko na azo kue. Me ala zia ti yü tere ti zo, na ala kiri na yayu tongana a-ange. Me a yeda na ala mbeni pëpe ti duti na yâ ti bungbi ti a-ange ti Nzapa. Ala ga a-ange ti Satan, na Bible airi ala ayingo sioni.

Nzapa asara si pupu aya, na ngu ti Kota Moa akomanse ti kiri na gbe ni. Nze oku na pekoni, arche ni aluti na lï ti mbeni kota hoto. Alango mingi ahon, na ala so ayeke na yâ ti arche ni alingbi ti bâ li ti ambeni kota hoto. Ngu ni angbâ ti kiri gi na gbe ni.

Na pekoni, Noé atokua na gigi mbeni vuko ndeke. Ndeke ni ahuru na lê ti nduzu na lo kiri, ngbanga ti so lo wara nzoni ndo ti duti dä pëpe. Lo sara tongaso lege mingi, me lakue lo kiri lo duti na ndo ti arche ni.

Mbeni kolokoto

Noé aye ti bâ wala ngu ahule na ndo ti sese awe. Tongaso, lo tokua na gigi mbeni kolokoto. Me kolokoto ni akiri nga, ngbanga ti so lo wara mbeni ndo ti duti dä pëpe. Noé akiri atokua lo, na lo kiri na mbeni kugbe ti keke na yanga ti lo. Tongaso, Noé ahinga so ngu ahule awe. Noé atokua kolokoto ni ti lege ota ni, na lo wara mbeni hulengo ndo ti duti dä.

Fadeso, Nzapa atene na Noé: ‘Sigigi na yâ ti arche ni, mo na sewa ti mo nga na anyama ni.’ Ala ngbâ lani na yâ ti arche ni ngu oko na ndo ni. So ngia si ala yeke na ni fadeso ti kiri ti duti na gigi nga ti ngbâ na fini.

Genèse 7:10-24; 8:1-17; 1 Pierre 3:19, 20.



Ahundango tënë

  • Ngbanga ti nyen zo oko alingbi lani ti lï pëpe na yâ ti arche na peko ti so ngu akomanse ti pika?
  • Jéhovah asara lani si ngu apika teti bï oke na lâ oke? Ngu ni asuku juska na ndo wa?
  • Nyen la asi na arche ni tongana ngu akomanse ti mû ndo ti sese kue?
  • Akota yongoro zo ni asö fini ti ala na ngoi ti Kota Moa ni? Me nyen la asi ti lo na ababâ ti ala?
  • Nyen la asi na arche ni na peko ti nze oku?
  • Ngbanga ti nyen Noé atokua mbeni vuko ndeke na gigi ti arche?
  • Noé ahinga tongana nyen so ngu ni ahule awe?
  • Nzapa atene nyen na Noé na peko ti so lo na sewa ti lo asara ngu oko na ndo ni na yâ ti arche?

Ambeni hundango tënë

  • Diko Genèse 7:10-24.

    Futingo aye na ndo ti sese ayeke lani kota tongana nyen? (Gen. 7:23).

    Ngu ti Kota Moa ni aninga lango oke kozoni si a hule? (Gen. 7:24).

  • Diko Genèse 8:1-17.

    Tongana nyen Genèse 8:17 afa so ye so Jéhovah aleke giriri ti sara teti sese agbian pëpe? (Gen. 1:22).

  • Diko 1 Pierre 3:19, 20.

    Tongana a-ange so ake yanga akiri na yayu, ngbanga wa a fâ na ndo ti ala? (Jude 6).

    Tongana nyen mbaï ti Noé na sewa ti lo apusu e ti kiri ti zia bê ti e mingi na ngangu so Jéhovah ayeke na ni ti zi azo ti lo? (2 Pi. 2:9).

TI HINGA AMBENI TËNË

Noé: Lo tambela na Nzapa

Na yâ ti mbeni dunia so ye ti ngangu asi singo dä kozo na kota ngu so apika, Noé afa so lo yeke mbeni zo so ayeke na mabe so ayengi oko ape. Bâ tongana nyen la aye so lo sara lani aga na ye ti nzoni na e kue laso.

Noé ‘atambela na Nzapa’

Akpale wa Noé na wali ti lo awara na batango amolenge ti ala? Tongana nyen la ala fa mabe na lekengo arche ni?