Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

1: Nzapa akomanse ti sara ye

1: Nzapa akomanse ti sara ye

AYE kue ti nzoni alondo na Nzapa. Lo sara lâ si e bâ ndo na kota lâ, na lo sara nze na atongoro si e bâ ndo na bï. Nzapa asara sese ti tene e duti dä.

Me lâ, nze, atongoro nga na sese ayeke pëpe akozo ye so Nzapa asara. Mo hinga ye so lo sara kozoni? Kozoni, Nzapa asara azo so ayeke tongana lo. E lingbi ti bâ azo so pëpe, legeoko tongana ti so e lingbi ti bâ Nzapa pëpe. Na yâ ti Bible, a iri azo so a-ange. Nzapa asara a-ange ti duti na lo na yayu.

Kozo ange so Nzapa asara lo ayeke nde mingi. Lo yeke kozo Molenge ti Nzapa, na lo sara kusala na tere ti Babâ ti lo. Lo mû maboko na Nzapa ti sara tanga ti aye kue. Lo mû maboko na Nzapa ti sara lâ, nze, atongoro nga na sese so e yeke na ndo ni.

Me sese ayeke lani tongana nyen na lâ ni kâ? Na tongo nda ni, zo oko alingbi lani ti duti na ndo ti sese pëpe. Lani, gi kota ngu ti ingo si amû lê ti sese kue. Me Nzapa aye si azo aduti na ndo ti sese. Tongaso, lo komanse ti leke aye na ndo ti sese ndali ti e. Lo sara nyen?

Kozoni, a hunda ti tene lumière aduti na ndo ti sese. Tongaso, Nzapa asara si lumière ti lâ asu na ndo ti sese. Lo sara si bï na kota lâ ayeke dä. Na pekoni, Nzapa asara si kuru sese asigigi na yâ ti kota ngu ti ingo.

Na tongo nda ni, ye oko ayeke na ndo ti kuru sese ni pëpe. A kpa ye so ayeke na lê ti foto so mo bâ ge. Afleur na akeke na anyama ayeke lani dä pëpe. Asusu ayeke même nga na yâ ti kota ngu ti ingo pëpe. Gbâ ti kusala angbâ na Nzapa ti sara ti tene sese aga nzoni si azo na anyama alingbi ti duti dä.

Jérémie 10:12; aColossien 1:15-17; Genèse 1:1-10.

Sese so ye oko ayeke dä pëpe


Ahundango tënë

  • Aye kue ti nzoni alondo na zo wa? Ambeni ayeke nyen?
  • Kozo ye so Nzapa asara ayeke nyen?
  • Ngbanga ti nyen kozo ange so Nzapa asara lo ayeke nde mingi?
  • Sese ayeke lani tongana nyen na lâ ni kâ? (Bâ foto ni.)
  • Nyen la Nzapa asara kozoni ti tene anyama na azo aduti na ndo ti sese?

Ambeni hundango tënë

  • Diko Jérémie 10:12.

    Aye so Nzapa aleke afa na mo nyen na ndo ti lo? (Es. 40:26; aRom. 11:33).

  • Diko aColossien 1:15-17.

    Jésus amû mbage lani tongana nyen na yâ ti lekengo aye? A lingbi ye so asara si e bâ lo tongana nyen? (aCol. 1:15-17).

  • Diko Genèse 1:1-10.

    Sese abâ gigi tongana nyen? (Gen. 1:1).

    Nzapa asara nyen na kozo lango so lo leke aye? (Gen. 1:3-5).

    Fa ye so asi lani na use lango so Nzapa aleke aye (Gen. 1:7, 8).