Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Mbeti ti ambaï ti yâ ti Bible

116: Mo yeke wara ande fini ti lakue lakue?

116: Mo yeke wara ande fini ti lakue lakue?

NYEN la kete molenge-wali so na akamarade ti lo ayeke diko so? Ala yeke diko tâ gi mbeti so ayeke na maboko ti mo so. A yeke Mbeti ti ambaï ti yâ ti Bible. Ala yeke diko tâ gi mbaï so mo kue mo yeke diko so: “Mo yeke wara ande fini ti lakue lakue?”

Molenge-koli so ayeke diko mbeti

Ala yeke manda nyen? Kozo ye ni ayeke so: tongana e ye ti ngbâ na fini lakue lakue, a lingbi e hinga ye na ndo ti Jéhovah nga na ndo ti Molenge ti lo Jésus. Bible atene: ‘Ti tene zo awara fini ti lakue lakue, a lingbi lo manda ye na ndo ti oko tâ Nzapa nga na ndo ti Molenge ti lo so Lo tokua lo na ndo ti sese, Jésus Christ.’

Tongana nyen e lingbi ti manda ye na ndo ti Jéhovah Nzapa nga na Molenge ti lo Jésus? Mbeni lege ti sara ni ayeke ti diko Mbeti ti ambaï ti yâ ti Bible kue, a to nda ni na kozo mbaï ni juska na ndangba ni. A fa aye mingi na ndo ti Jéhovah nga na Jésus. Tâ tënë? A fa nga aye mingi na ndo ti aye so ala sara na aye so ala yeke sara ande. Ye oko, a lingbi e sara mbeni ye nga, me gi ti diko mbeti ni senge tongaso pëpe.

Mbeti ti Nzapa

Mbeti wa la ayeke na sese na lê ti foto so? A yeke Bible. Hunda mbeni zo ti diko na mo aversê so asara tënë na ndo ti ambaï ni so. Bible afa na e aye kue so a lingbi e hinga ti voro Jéhovah na lege ni nga ti wara fini ti lakue lakue. Tongaso, zia si mandango Bible lakue aga ye ti tere ti e.

Me gi ti manda ye na ndo ti Jéhovah Nzapa nga na Jésus Christ alingbi pëpe. E lingbi ti hinga ye mingi na ndo ti ala nga na ndo ti aye so ala fa, me e lingbi ti wara fini ti lakue lakue pëpe. A lingbi e sara nga nyen?

A lingbi e sara nga ye alingbi na aye e so e manda. Mo dabe ti mo na Judas Iscariote? Lo yeke oko ti abazengele 12 ti Jésus. Judas ahinga lani ye mingi na ndo ti Jéhovah nga na Jésus. Me nyen la asi na lo nyen? Kete na pekoni, lo to nda ti gi gi ye ndali ti lo wani na lo kä Jésus na awato ti lo teti alê ti nginza 30 ti argent. Tongaso Judas ayeke wara fini ti lakue lakue pëpe.

Mo dabe ti mo na Guéhazi, koli so e manda tënë ti lo na yâ ti mbaï 69? Lo ye lani ti wara ambeni bongo nga na nginza so ayeke ti lo pëpe. Tongaso lo tene mvene ti wara aye so kue. Me Jéhovah ase lo. Jéhovah ayeke se nga e tongana e sara ye alingbi na andia ti lo pëpe.

Me anzoni zo mingi ayeke nga dä so asara lakue na Jéhovah be-ta-zo. E nga kue e ye ti sara ye tongana ala. Tapande ti Samuel ayeke nzoni ti tene e mû pekoni. Na yâ ti mbaï 55, lo yeke lani gi na ngu osio wala oku tongaso na ngoi so lo to nda ti sara na Jéhovah na tabernacle ti lo. Ni la, atâa mo yeke kete tongana nyen, mo lingbi ti sara na Jéhovah.

Biani, zo so e kue e ye ti mû peko ti lo ayeke Jésus Christ. Même lani so lo ngbâ kete, lo yeke na yâ ti temple na lo yeke sara lisoro na azo na ndo ti Babâ ti lo ti yayu, tongana ti so mbaï 87 afa. Zia e sara tongana lo, e fa na azo kue ye na ndo ti nzoni Nzapa ti e Jéhovah nga na Molenge ti lo, Jésus Christ. Tongana e sara aye so, e yeke duti ande lakue lakue na yâ ti fini paradis so Nzapa ayeke zia ni ande na ndo ti sese.

Jean 17:3; Psaume 145:1-21.



Ahundango tënë

  • A lingbi e hinga nyen tongana e ye ti wara fini ti lakue lakue?
  • Legeoko tongana kete molenge-wali so na akamarade ti lo na lê ti foto ge, tongana nyen e lingbi ti manda ye na ndo ti Jéhovah Nzapa nga na Jésus?
  • Mbeti wa mo bâ nga ni na lê ti foto so? Ngbanga ti nyen a yeke nzoni e diko ni lakue?
  • Tongana mo manda ye awe na ndo ti Jéhovah na Jésus, a lingbi mo sara nga nyen ti wara fini ti lakue lakue?
  • E manda nyen na yâ ti mbaï 69?
  • Na yâ ti mbaï 55, nzoni tapande wa Samuel azia na e tongana lo de lani kete?
  • Tongana nyen e lingbi ti mû tapande ti Jésus Christ? Tongana e sara tongaso, nyen la ayeke ku e na yâ ti ngoi so ayeke ga?

Ambeni hundango tënë

  • Diko Jean 17:3.

    Tongana nyen Mbeti ti Nzapa afa so ti hinga Jéhovah Nzapa na Jésus Christ aye gi ti tene pëpe ti hinga gi na li ti e aye so asi? (Mat. 7:21; Jacq. 2:18-20; 1 Jean 2:17).

  • Diko Psaume 145:1-21.

    Fa ambeni nda ti tënë so e yeke na ni ti sepela Jéhovah (Ps. 145:8-11; Apoc. 4:11).

    Na lege wa Jéhovah ayeke “nzoni na azo kue”? A lingbi ye so apusu e nduru na lo mingi ahon ti kozo tongana nyen? (Ps. 145:9; Mat. 5:43-45).

    Tongana e ye Jéhovah mingi, ye so ayeke pusu e ande ti sara nyen? (Ps. 119:171, 172, 175; 145:11, 12, 21).