Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

114: Hunzingo ti aye ti sioni kue

114: Hunzingo ti aye ti sioni kue

NYEN la mo yeke bâ ge nyen? Gbâ ti aturugu na ndo ti avuru mbarata. Me bâ ndo so ala londo dä. Ambarata ni alondo na yayu kâ na yâ ti ambinda na ala yeke ga na loro na ndo ti sese ge! Ti tâ tënë ni, ambarata ayeke kâ na yayu?

Jésus tongana Gbia na yayu

Oko pëpe. So ayeke atâ mbarata pëpe. E hinga ni ngbanga ti so ambarata alingbi ti kpe loro na yâ ti ambinda pëpe. Me tongana a bâ ni nzoni, Bible asara tënë ti ambarata na yayu. Ngbanga ti nyen?

Ngbanga ti so giriri a sara kusala mingi na ambarata na yâ ti abira. Ni la, tongana Bible asara tënë ti azo ti kpengo na ambarata so alondo na yayu ti ga na sese, a ye ti fa so Nzapa ayeke tiri ande bira na azo na ndo ti sese. Iri ti ndo so a yeke tiri bira ni dä ayeke nyen? Mo hinga? A yeke Harmaguédon. Bira so ayeke futi asioni ye kue na ndo lê ti sese.

Jésus la ayeke mû li ni na yâ ti bira ti Harmaguédon so. Dabe ti mo so Jéhovah asoro Jésus ti ga Gbia ti Royaume ti lo. Ni la si Jésus ayü kpoto ti gbia na li ti lo. Yongoro zembe so ayeke na tïtî lo ayeke ti fâ na awato ti Nzapa kue. Bê ti e adö ndali ti so Nzapa ayeke futi ande azo ti sioni kue?

Kiri mo bâ mbaï 10. Mo bâ nyen dä? Ni la, Kota Moa so afuti lani azo ti sioni. Zo wa si aga na Kota Moa so? Jéhovah Nzapa. Bâ fadeso mbaï 15. Nyen la asi ge nyen? Jéhovah atokua wâ na ndo ti Sodome na Gomorrhe si a futi ni kue.

Gue fadeso na mbaï 33. Bâ ye so asi na ambarata nga na apuse ti bira ti azo ti Egypte. Zo wa la asara si ngu amene ala kue, zo wa? A yeke Jéhovah. Lo sara so ti bata azo ti lo. Bâ mbaï 76. Jéhovah azia même si a futi azo ti Israël so ayeke azo ti lo ndali ti sioni so ala sara.

Tongaso, a lingbi bê ti e adö pëpe tongana Jéhovah atokua ande aturugu ti lo kâ na yayu ti ga ti zi aye ti sioni kue na ndo ti sese. Aye ayeke duti ande tongana nyen na pekoni? Zia e bâ ni na mbaï ti peko.

Apocalypse 16:16; 19:11-16.



Ahundango tënë

  • Ngbanga ti nyen Bible asara tënë ti ambarata na yayu?
  • Iri ti bira so Nzapa ayeke ga ti sara na azo ti sioni na ndo ti sese ge ayeke nyen? Nda ti bira so ayeke nyen?
  • Na lê ti foto so, zo wa la ayeke mû li ni na yâ ti bira ni? Lo yü mbeni couronne ngbanga ti nyen? Lo yeke sara nyen na yongoro zembe ti lo ni?
  • Tongana e kiri na mbaï 10, 15 na 33, ngbanga ti nyen a lingbi bê ti e adö pëpe so Nzapa ayeke futi azo ti sioni?
  • Tongana nyen mbaï 36 na 76 afa na e so Nzapa ayeke futi ande azo ti sioni même tongana ala tene so ala yeke voro lo?

Ambeni hundango tënë

  • Diko Apocalypse 19:11-16.

    Tongana nyen Mbeti ti Nzapa afa polele so a yeke Jésus Christ si ayeke kpe na vuru mbarata so? (Apoc. 1:5; 3:14; 19:11; Es. 11:4).

    Tongana nyen mênë so a tuku na ndo ti bongo ti Jésus afa biani so lo yeke sö ande benda na yâ ti aye kue? (Apoc. 14:18-20; 19:13).

    Azo wa e lingbi ti tene so ala yeke na popo ti aturugu so ayeke mû peko ti Jésus na ndo ti vuru mbarata ti lo? (Apoc. 12:7; 19:14; Mat. 25:31, 32).