Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

112: Bateau atuku na ngu na tere ti zoa

112: Bateau atuku na ngu na tere ti zoa

BÂ BATEAU ni! Yâ ni afâ kete kete! Mo bâ azo so atï na yâ ti ngu ni? Ambeni asigigi awe. Paul ayeke nga na popo ti ala? Nyen la asi na lo nyen? Zia e bâ.

Azo so asö kuâ tongana bateau atuku na ngu

Girisa pëpe, Paul asara ngu use na kanga na kodoro ti Césarée. Na pekoni, a mû lo nga na ambeni zo ti kanga a zia ala na yâ ti bateau ti gue na Rome. Tongana ala hon nduru na zoa ti Crète, kota pupu ti ngu asara. Pupu ni aya ngangu si azo ni alingbi ti fa lege na bateau ni mbeni pëpe. Ala yeke bâ nga lâ na atongoro pëpe. Na nda ni, tongana alango mingi ahon, azo ni kue abâ so ala yeke sö kuâ mbeni pëpe.

Tongaso, Paul alondo, lo tene: ‘Zo oko na popo ti ala ayeke kui pëpe. Gi bateau ni si ayeke buba. Na bï so, mbeni ange ti Nzapa aga atene na mbi, a tene: “Paul, sara mbeto pëpe. A lingbi mo luti na gbele César, gbia ti Rome. Nzapa ayeke sö ande azo kue so ayeke na yâ ti bateau ni.” ’

Na bê ti bï ti lango 14 ni na peko ti so kota pupu ti ngu ni ato nda ni, azo ti kpengo na bateau ni abâ so, tongana ala yeke gue yeke yeke na li ni, ngu ni alï tongana ti kozo pëpe. Mbeto asara ala ti tene bateau ni apika tere ti lo na akota tênë. Ndali ni ala mû akota wen so a kanga kamba dä na ala bi ni na yâ ti ngu tongaso si bateau ni aluti. Tongana ndo ahan awe, ala bâ sese. Ala tara ti gue na bateau ni na yanga ti ngu.

Tongana bateau ni aga nduru na yanga ti ngu ni, a kpo mbutu si a kale. Akota mapo ti ngu ni aga apika bateau ni, si yâ ni ato nda ti fâ kete kete. Mokonzi ti aturugu ni atene: ‘Azo kue so ahinga ngu, ala tï na yâ ti ngu kozoni, na ala gue na yanga ti ngu ni kâ. Ti atanga ni, ala gbu afango keke ti bateau ni, ala gue na peko ti ala.’ Azo ni asara tongaso. Ye so asara si azo 276 kue so ayeke fade na yâ ti bateau ni asi nzoni na yanga ti ngu, tongana ti so ange ni atene.

Iri ti zoa so ala si dä ayeke Malte. Azo ti zoa ni ayeke nzoni mingi, na ala bâ lege ti azo ti bateau ni nzoni. Tongana kota pupu ti ngu ni akaï awe, a zia Paul na yâ ti mbeni bateau nde ti gue na lo na Rome.

Kusala 27:1-44; 28:1-14.



Ahundango tënë

  • Nyen la asi na bateau so Paul ayeke na yâ ni tongana bateau ni ahon na mbage ti zoa ti Crète?
  • Paul atene nyen na azo so ayeke na yâ ti bateau ni?
  • Nyen la asara si yâ ti bateau ni afâ kete kete?
  • Mokonzi ti aturugu ni amû yanga na azo ni ti sara nyen? Mingi ti azo ni asara tongana nyen ti si nzoni na yanga ti sese ni?
  • Iri ti zoa so ala si dä ayeke nyen? Nyen la a sara na Paul tongana kota pupu ti ngu ni akaï?

Ambeni hundango tënë

  • Diko Kusala 27:1-44.

    Tongana nyen dikongo mbaï ti guengo ti Paul na Rome amû lege na e ti bâ so biani mbaï ti Bible ayeke tâ ye? (Kus. 27:16-19, 27-32; Luc 1:3; 2 Tim. 3:16, 17).

  • Diko Kusala 28:1-14.

    Tongana bê ti azo ti zoa ti Malte so ayeke apaïen apusu ala ti ‘yamba nzoni mingi’ bazengele Paul na amba ti lo ti bateau ni, a lingbi bê ti aChrétien apusu nga ala ti fa nyen? Ala yeke fa ni mbilimbili na le ge wa? (Kus. 28:1, 2, Fini Mbuki, 2001; aHéb. 13:1, 2; 1 Pi. 4:9).