Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

110: Timothée amû maboko na Paul

110: Timothée amû maboko na Paul

MASEKA-KOLI so mo bâ ge na tere ti Paul so ayeke Timothée. Timothée na afami ti lo alango na kodoro ti Lystres. Mama ti lo ayeke Eunice na âta ti lo ti wali ayeke Loïs.

A sara ngu oko tongaso awe so Paul na Barnabas asi lani ti kozoni na Lystres ti fa tënë. Fadeso, lo kiri lo ga ti fani ota ni. Ti so ni, lo na kamarade ti lo Silas la aga.

Timothée na Paul

Mo hinga tënë so Paul ayeke tene na Timothée? Lo hunda lo, lo tene: ‘Mo ye ti ga legeoko na mbi nga na Silas? E ye si mo mû maboko na e ti fa tënë na azo so alango na ando so ayo.’

Timothée ayeda. Tongaso, kete na pekoni, lo zia afami ti lo na lo mû peko ti Paul na Silas. Me kozoni si e bâ tënë na ndo ti tambela ti ala ni, zia e bâ ye so asi na Paul. A sara ngu 17 awe ngbene ye so Jésus asi na lo na lege ti Damas.

Girisa pëpe, Paul ague lani na Damas ti sara sioni na adisciple ti Jésus, me fadeso lo wani ayeke mbeni disciple ti Jésus! Na pekoni, ambeni zo agi lege ti fâ Paul ngbanga ti so aye so lo fa na ndo ti Jésus anzere na ala pëpe. Me adisciple amû maboko na lo ti kpe. Ala zia lo na yâ ti mbeni sakpa na ala yô ni na li ti gbagba ti kodoro ni si ala zia lo na sese na peko ti gbagba ni.

Na pekoni, Paul ague na Antioche ti fa tënë. A yeke na ndo so la si a to nda ti iri adisciple ti Jésus aChrétien, wala “Azo ti Christ”. Paul na Barnabas alondo na Antioche ala gue na ambeni kodoro so ayeke yongoro na Antioche ti fa tënë kâ. Mbeni kodoro so ala si dä ayeke Lystres, kodoro ti Timothée.

Fadeso, tongana ngu oko tongaso ahon awe, Paul akiri na Lystres na ngoi ti use tambela ti lo. Tongana Timothée azia kodoro ti Lystres ti gue oko na Paul nga na Silas, mo hinga ndo so ala gue dä? Bâ carte ni, na zia e bâ ambeni ndo ni.

Kozoni ala gue na Iconium, so ayeke nduru na Lystres. Na pekoni ala gue na use kodoro ni so iri ni ayeke Antioche, nga ala gue na Troas, na Philippes, na Thessalonique nga na Bérée. Mo bâ Athènes na ndo ti carte ni? Paul afa nga tënë kâ. Na pekoni, ala fa tënë ngu oko na ndambo na kodoro ti Corinthe. Na nda ni, ala luti kete na Ephèse, si ala mû bateau ala kiri na Césarée. Na pekoni ala gue na Antioche, ndo so Paul angbâ dä.

Tongaso, Timothée atambela akilomètre mingi na tere ti Paul ti fa “nzo tënë” na ti sara si akongregation mingi abâ gigi. Tongana mo ga kota, mo yeke sara ande na Nzapa be-ta-zo tongana Timothée?

Kusala 9:19-30; 11:19-26; chapitre 13 ti si na 17; 18:1-22.

Mbeni carte

1. Rome; 2. Malte; 3. Bérée; 4. Thessalonique; 5. Corinthe; 6. Philippes; 7. Athènes; 8. Crète; 9. Troas; 10. Ephèse; 11. Milet; 12. Colosses; 13. Antioche; 14. Iconium; 15. Lystres; 16. Chypre; 17. Antioche; 18. Césarée; 19. Joppé; 20. Damas; 21. Jérusalem; 22. Kota ngu-ingo (Méditerranée)



Ahundango tënë

  • Maseka-koli so na lê ti foto so ayeke zo wa? Lo lango na kodoro wa? Iri ti mama ti lo na ti âta ti lo ti wali ayeke nyen?
  • Timothée atene nyen tongana Paul ahunda lo wala lo ye ti ga na tere ti lo na Silas ti gue ti fa tënë na ayongoro ndo?
  • Na ndo wa si a to nda ti iri adisciple ti Jésus “Azo ti Christ”, wala aChrétien?
  • Na peko ti so Paul, Silas na Timothée azia Lystre, ala gue na ambeni kodoro wa?
  • Tongana nyen Timothée amû maboko na Paul? A lingbi amaseka ahunda tere ti ala na tënë wa laso?

Ambeni hundango tënë

  • Diko Kusala 9:19-30.

    Tongana nyen bazengele Paul asara ye lani na ndara tongana a gi ti kanga lege na nzo tënë so lo yeke fa ni? (Kus. 9:22-25, 29, 30; Mat. 10:16).

  • Diko Kusala 11:19-26.

    Tongana nyen mbaï so ayeke na Kusala 11:19-21, 26 afa so yingo ti Jéhovah ayeke fa lege na kusala ti fango tënë?

  • Diko Kusala 13:13-16, 42-52.

    Tongana nyen Kusala 13:51, 52 afa so adisciple azia lani pëpe si kangango lege so alondo na awato awoko ala? (Mat. 10:14; Kus. 18:6; 1 Pi. 4:14).

  • Diko Kusala 14:1-6, 19-28.

    Tongana nyen tënë “ala zia ala na tïtî Seigneur” Jéhovah amû maboko na e ti gi bê ti e ahon ndo ni pëpe na ngoi so e yeke mû maboko na afini zo? (Kus. 14:21-23; 20:32; Jean 6:44).

  • Diko Kusala 16:1-5.

    So Timothée aduti nduru ti yeda ti tene a fâ lo na ganza afa nene ti “sara ye kue teti Tene-nzoni” tongana nyen? (Kus. 16:3; 1 aCor. 9:23; 1 aThes. 2:8).

  • Diko Kusala 18:1-11, 18-22.

    Mbeti ti Kusala 18:9, 10 afa nyen na ndo ti mungo mbage ti Jésus mveni ti fa lege na kusala ti fango tënë? Ye so amû lege na e laso ti duti na kite pëpe na ndo ti nyen? (Mat. 28:20).

TI HINGA AMBENI TËNË

Timothée aye lani ti mû maboko na azo

Mo lingbi ti sara nyen ti duti na ngia mingi tongana ti Timothée?