Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

109: Pierre na ndo ti Corneille

109: Pierre na ndo ti Corneille

PIERRE la aluti ge so, na akoli so ayeke na peko ti lo so ayeke ambeni kamarade ti lo. Me koli so atï na gere ti Pierre ngbanga ti nyen? A yeke nzoni ti tene lo sara tongaso? Koli so ayeke zo wa?

Pierre ayeke wara tere na Corneille

Koli so ayeke Corneille. Lo yeke mbeni turugu ti kota kamba ti Rome. Corneille ahinga Pierre pëpe, me a tene na lo ti iri Pierre ti ga na da ti lo. Zia e bâ tongana nyen la ye ni asi.

Akozo disciple ti Jésus ayeke aJuif, me Corneille ayeke ti lo Juif pëpe. Atâa so kue, lo ye Nzapa mingi, lo yeke sambela lo nga lo yeke sara anzoni ye mingi na azo. Na mbeni lakui, mbeni ange asi na lo na atene: ‘Mo zia ngia na bê ti Nzapa mingi, na lo yeke kiri tënë na sambela ti mo. Tokua ambeni zo ti ga na mbeni koli so iri ti lo ayeke Pierre. Lo yeke na kodoro ti Joppé na da ti Simon, so ayeke na yanga ti kota ngu ti ingo.’

Hio na pekoni, Corneille atokua azo ti gi Pierre. Na ndade ni, tongana azo ni asi nduru na kodoro ti Joppé, Pierre ayeke na li ti da ti Simon. Li ti da ni ayeke kpangbala. Kâ Nzapa asara si Pierre abâ mbeni kota lê ti bongo so alondo na yayu aga na sese. Na yâ ti bongo ni, a wara anyama ndenge na ndenge. Ndia ti Nzapa ake ti tene a te anyama so. Me mbeni go atene: ‘Pierre, londo! Fâ anyama so, mo te!’

Pierre akiri tënë, lo tene: ‘Ên-ën. Mbi de ti te lâ oko pëpe mbeni nyama so ayeke sioni.’ Me go ni atene na lo: ‘Ye so Nzapa asara si a ga nzoni awe, mo zia ti iri ni sioni ye.’ Ye so asi fani ota. Na ndembe so Pierre ayeke hunda tere ti lo na ndo ti aye so kue, azo so Corneille atokua ala asi na da ti Simon na ala hunda ti bâ Pierre.

Pierre ague awara ala, lo tene: ‘Mbi yeke zo so ala yeke gi lo. Ala ga ngbanga ti nyen?’ Tongana azo ni afa so mbeni ange atene na Corneille ti iri Pierre na da ti lo, Pierre ayeda ti gue. Na ndade ni, Pierre na ambeni kamarade ti lo ague na Césarée ti bâ Corneille.

Corneille abungbi asewa nga na asongo ti lo na da ti lo. Tongana Pierre aga, Corneille ague ti yamba lo. Lo tï na gere ti Pierre, tongana ti so mo bâ ge. Me Pierre atene: ‘Londo! Mbi nga kue mbi yeke senge zo tongana mo.’ Tâ tënë, Mbeti ti Nzapa afa so a yeke na lege ni pëpe ti kuku na gbe ti mbeni zo ti voro lo. A lingbi e voro gi Jéhovah.

Pierre ayeke fa tënë fadeso na azo ni kue. Lo tene: ‘Mbi bâ so Nzapa ayeda na azo kue so aye ti sara na lo.’ Na ngoi so lo ngbâ ti sara tënë, Nzapa atokua yingo vulu ti lo na ndo ti ala, na azo ni ato nda ti sara tënë na ayanga nde nde. Bê ti adisciple so aga legeoko na Pierre adö, ngbanga ti so ala yeke aJuif na ala bâ ti ala atene Nzapa ayeke sara nzoni gi na aJuif. Ye so afa na ala so, na lê ti Nzapa, mbeni mara ayeke nzoni wala ayeke kota ahon mbeni pëpe. So ayeke mbeni nzoni ye ti tene e dabe ti e na ni lakue. Mo tene ti mo nyen?

Kusala 10:1-48; 11:1-18; Apocalypse 19:10.



Ahundango tënë

  • Koli so akuku na gbe ti Pierre so ayeke zo wa?
  • Tënë wa mbeni ange atene na Corneille?
  • Nzapa amû lege na Pierre ti bâ nyen tongana lo yeke duti na ndo ti da ti Simon na Joppé?
  • Ngbanga ti nyen Pierre atene na Corneille ti kuku pëpe na gbe ti lo ti voro lo?
  • Ngbanga ti nyen bê ti adisciple so aga legeoko na Pierre adö?
  • Kota ye wa a lingbi e manda na ndo ti guengo ti Pierre na ndo ti Corneille?

Ambeni hundango tënë

  • Diko Kusala 10:1-48.

    Atënë ti Pierre na Kusala 10:42 afa nyen na ndo ti kusala ti fango nzo tënë ti Royaume? (Mat. 28:19; Marc 13:10; Kus. 1:8).

  • Diko Kusala 11:1-18.

    Tongana Jéhovah afa polele ye so lo ye na mbage ti azo so ayeke aJuif pëpe, Pierre abâ ni tongana nyen? E lingbi ti mû tapande ti lo tongana nyen? (Kus. 11:17, 18; 2 aCor. 10:5; aEph. 5:17).